بلوچ ھان اَنگت بیگْواہ اِنت
نبشتہ کار: ماھل بلوچ
دی بلوچستان پوسٹ
زاہد بلوچ کہ آ بلوچ ھان ئے نامءَ ھم زانگ بیت بلوچ وانندہ گل آزات ءِ یک جْوانیں کامریڈ ءُ کاملیں سنگتے اَت، آ مدام گوں راجی آجوئی جُہد ءِ دیمروئی ئے کاراں گُلائیش اَت۔ بلوچ ھان 1986 ءَ ماں نالءَ کماش الہیٰ بکش ءِ گسءَ ودی بیت ءُ وتی زِند ءَ پہ راجءِ آؤکیں بانداتءِ ھاتِر ءَ مُلمہ کنت۔ آ چو شے مرید ءِ داب ءَ پہ وتی ھانُل ءَ گنوکے اَت۔ زاھد وتی زِندءِ سَرجمیں وشّی کُشتگ اِتنت ءُ بَس پہ راجی وشیانی ھاترا جُہدءَ اَت داں منی راج پہ دائمی آجوئی ءُ ایمنیءَ گوں وتی سرڈگار ءِ سرا شادان بِہ بیت۔
زاہد پہ ھَمک بلوچ ءَ یک درد وارے اَت کہ مُدام آھانی بزگی ءُ لاچاری ءُ لگتمالی ئے ھِلاپ ءَ چو اَلبُرز ءِ کوہ ءَ مِک اَت۔آئی مُدام مہلوکءَ ھمے یکیں سِکین دات کہ شُما گُلام جوڑ کنگ بوتگ اِت، شُمارا زورگراں وتی گلام جوڑ کتگ۔ پاکستان ءُ آئی ءِ کاسگ چَٹّیں وزیر ءُ گَزیر پْروش دیگی اَنت، شُمارا بے بْرمش بوھگی نہ اِنت، شُمارا دُژمن ءِ ھر رپک ءُ پندل زانگی اَنت۔ مُدام بلوچ ھان ءِ لوٹ ھمے بوتگ کہ آئی ءِ راج کلم ءَ سِلاہ ءُ کتاب ءَ وتی راھشون بِہ کنت، آئی ءَ مُدام گوں ایمنی ءِ جُہد ءَ تپاک کُتگ۔
زاہد جان تو سرپدئے کِہ بے ترا شال چون اِنت؟ آواران تئی گستائیءَ گریت ءُ موتک کار اِیت؟ زاہد بے تو کیچ جنوزام اِنت ، پنجگور ھم نِشتگ ءُ ویران اِنت ، دشتءِ شتّیں بالاد ویران اِنت ، سرجمیں مِہرستان ءِ سارتیں سمین بے تو گْوش ئے تبد ءُ لیوار اِنت، ابیتک ءُ مُلوریں گلزمین پہ تئی وڑیں بچّے ءِ ودار ءَ تُنیگ اِنت۔
بیا زاہد جان وتن ءَ تئی وڑیں بَچ ءِ پکار اِنت کہ مُدام آئی پہازگ ءِ ھاتِر ءَ چو شاشان ءِ کُوہ ءَ مِکّ بہ بیت۔ ھما بَچّ کہ آئی ءَ مُدام پہ وتی راجی لَجّ ءُ ننّگءِ رکینگ ءِ ھاتِر ءَ وتارا ھِچ پُشت ءَ نہ داشتگ۔ وتی راج ءِ لوٹ ءُ گزرانی پہازگ ءِ ھاتِر ءَ وتی کَلم ءُ کاگد پہ نویسگ ءَ دوست نہ داشتگ اَنت۔ بیا کہ بے ترا اے گُلباگیں چَمن چو ویرانیں کبرِستان ءَ اِنت۔
زاہد تو یک ھبرے زان ئے؟ تئی روگءَ پَد کمبر جان چنچو پْرشتگ ءُ یکزدیں دردانی دیمپان اِنت۔ آ مُدام ھمے جُست ءَ کنت کہ امّا ابّا کُجا اِنت؟ پرچا منی چارگ ءَ نئیت اِنت۔۔۔۔۔۔۔۔۔۔ابّا ترا زاناں پہ من زہیر نہ کنت؟
کمبر آ وَھد ءَ سکّ کسان بوتگ، کہ زاہد جان آوار جَنگ بوتگ۔ پِت ءِ گِستائیءَ رَند کمبر برے یَک میر ءُ مُتبر ءِ کِرّ ءَ پہ وتی پِت ءِ آجوئی ءِ ھاتِر ءَ شتگ ۔ آ دگہ گار ءُ بیگواھیں بلوچ مہلوک ئے کہولانی ھمسپر بوتگ داں منی ابّا گوں کُل بیگْواھیں بلوچ پُسّگاں آجو کنگ بِہ بیت۔
بلوچستان ءِ تہءَ ایوک ءَ کمبر ءِ پِت نہ اِنت کہ گار ءُ بیگْواہ اِنت، نیئکہ ایوک ءَ کمبر اِنت کہ پہ وتی پِت ءِ آجوئی ءِ ھاتِر ءَ جہدءَ اَنت، اِدا مہلب اِنت کہ آئی ءِ پِت دوھزار ھشت ءَ چہ ھُزدار ءَ وتی کار ءِ سر ءَ چے آوار جَنگ بوتگ۔ اَنچوش کہ ما شُما کُل سرپدیں کہ دین محمد بلوچ یک ڈاکٹرے بوتگ، آ وھد ءَ کہ دین محمد آوار جَنگ بوتگ آ وھد ءَ مِہلب سک کسان بوتگ۔ ھمے دابءَ دِگہ مِسال ءُ درورے علی حیدر بلوچ اِنت کہ آئی ءِ پِت رمزان بلوچ دوھزار ءُ نُھ ءَ ما اُتھل زیرو پوئینٹ ءَ چہ آوار جَنگ بوتگ داں کہ روچ ءِ مروچی آ بیگواہ اِنت۔ علی حیدر ءُ مہلب وتی زِند ءِ گیشتر وھد ما کیمپانی تہءَ گْوازینتگ اَنت۔ یک ھزار ءُ پنچ سَد کیلومیٹر لانگ مارچ بزاں پَند کوئٹہ داں اسلام آباد ءَ ھمے کسان سالاں بُر اِتگ۔ نوں بِہ گندئے ڈاکٹر دین محمد ءُ رمزان بلوچ وتی زَہگاں جاہ میار اَنت، پرچا کہ نوں مہلب ءُ علی حیدر رُستگ ءُ مزن بوتگ اَنت۔ ھمے وڑا کمبر جان ھَم وتی کسانیں اُمبر ءَ وتی پِت ءِ آجوئی ءِ ھاتِر ءَ گوں وتی مکہیں مات ءِ ھمبرائی ءَ جُہد کنگ اِنت۔
چیئرمین زاہد ھژدہ مولُمان 2014 ءَ چہ شال ءِ برپ ءُ سارتیں دمکاں چہ آوار جَنگ بیت۔ چہ زاھد ءِ بیگْواھی ءَ رَند سنگت لتیپ جوہر گل ءِ شؤر ءُ سلاھانی رِد ءَ داں سرجمیں دو ماہ شُد ھڑتال ءَ نندایت، آئیءِ لوٹ بَس ھمیش اَت کہ منی گل ءِ سروک ءُ پاگواجہ زاہد بلوچ آجو کنگ بہ بیت۔ اگاں آئی ھَر وڑیں گناھے کُرتگ آ آمیدگِس (عدالت) ءَ پیش کَنگ بہ بیت۔ وھدے کہ لتیپ جوہر ءِ تب ءُ میل سَک ناساز ءُ نِزور بوت انت گُڑا سنگتاں آئی زِند ءِ رکینگ ءِ ھاتِر ءَ ھمے یکیں لوٹ کُت کہ تو وتی شُد اڑتالی ءَ ھلاس بکن۔ وھد گْوزان اَت ءُ زاہد ءِ گَپ کْوھن بوت، ھَرکس ھاموش بوت۔ گُڑا زاہد ءِ لوگ بانُک گوں ھردُکیں بَچّ کمبر جان ءَ اَتک ماں ماما قدیر بلوچ ءِ کیمپ ءَ گوں ماما ءِ ھمبرائی ءَ پہ زاہد ئے آجوئی ءِ ھاتِر ءَ گام جنان بوت۔ ماما قدیر بلوچ پہ ھَر گار ءُ بیگْواھیں بلوچ ءَ ماں وتی وس ءُ واک ءَ جُہد ءَ اِنت۔ آئی جِند ءِ چُک جلیل ریکی اَنچُوش پاکستان ءِ دست ءَ آوار جَنگ بوت ءُ پدا شہید کنگ ءُ آئی ءِ جون مہ کَور ءُ گیابان ءَ چگل دیگ بوت۔
ماما مئے دلانی تہ ءَ پہ مُدامی زِندگ اِنت، پرچا کہ آ یک زِندگیں اِنسانے۔ آ ھَر گار ءُ بیگْواھیں بلوچ ءَ وتی سرپد بیت۔ راست گْوشتگ ھما شاعر ءُ زانتُکار ءَ کہ پیر مَرد ءِ دَست ءِ لَٹ گار بوتگیں گونڈو دْرست یک ھِساب ء َاَنت۔
ماما ءَ 3525 روچ ءَ چہ گیش اِنت کہ آ پہ گار ءُ بیگْواھیں بلوچانی ھاتِر ءَ توارے چِست کُتگ ءُ انگت چو بولانءَ مہکم اِنت۔ شال ءِ دِلبند ءَ نے سرد ءُ سارتی چار اِتگ نیئکہ گَرم۔ بیا اِت ما شُما دْرست ماما ءِ ھمبراھی ءَ بلوچانی ھما اِنسانی لوٹ ءُ گزرانی پہازگ ءِ ھاتِر ءَ یک مُشت ءُ یَک توار بَہ اِیں، وتی گار ءُ بیگْواھیں بلوچانی آجوئی ءِ ھاتِر ءَ جُہد کن اِیں۔ چوں مہ بیت کِہ باندا مئے گار ءُ بیگْواھی ءَ کَس چُوش اِیں درد وارے مہ بیت کہ پّما آہ مہ کش اِیت یا مئے توار کس مہ بیت۔
بیا اِت منی بلوچ راج یلیں پُسّگاں گوں شُما اَرز ءُ پریات اِنت منی زاہد ءَ ھوار کل وتی بیگْواھیں بلوچ بْرات ءُ گہارانی توار جوڑ بِہ بَہ اِت، پرچا کہ گوں کُلاں ھوار زاہد مئے زاہد اِنت، بلوچستان ءِ زاہد اِنت، ھَر بلوچ ءِ درد وار اِنت، زاہد شال ءِ رتکگیں ارس اِنت، زاہد کیچ ءِ تُنیگیں اَرواہ اِنت، زاہد مند ءِ دامُن ءِ دوچ اِنت، زاہد بی ایس او ءِ چَمروک اِنت، زاہد۔۔۔۔۔۔۔۔۔۔۔
شالا زاہد جان تو آجو بات ئے گون کُل بندیگیں بلوچ پُسّگاں۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
