گند ءُ نِند ءِ گوں شھید گلام مھمد ءَ
پولکار ظہور پزل ءُ اصغر وفا
پنچمی ءُ گُڈی بھر
چارمی بھر
کہ اے جاورانی تہا مے جہد ءِ سوب مندی یا بے سوبی ءِ مستریں مرکز مے جند اِنت ما چہ ھدءَ وتی توارءَ پہ دنیاءَ سرکنیں یا چہ وڑا وتا ھور ءُ یکجا کنیں اے ھبر پدر اِنت کہ مے سوب مندی گوں مے یک جاگہیءُ ھوریءَ اِنت ھرپیم کہ ما شنگ شانگ ءُ ناتپاک بیں ھمنچو تاوان کشیں . نوکیں میان استمانی رھبند ءِ ھبر کہ بوگءَ اِنت آئیءِ شکل تنی وھدی پدر نہ اِنت کہ اے چی انت آیا آ کومانءَ مھکم کنت یا آہاں تباہ ءُبرباد کنت آیا بلوچستانءَ بہرءُ بانگ کنگءِ پندلے است اِنت یا ایشی ءَ مھکم کنگءِ البت یک چیزے زاھر اِنت آ ایش اِنت کہ اگں بلوچ جہد بکنت ءُ دیمءَ بروت تہ دنیا چرآئیءَ ھچ پیمءَ بے کمار بوت نہ کنت بلوچ سر زمینءِ جیوپولیٹکل پوزیشن دنیاءِ واستا چہ ساری ءَ زیات دلگیر اِنت بلوچستانءِ مزن ءُ پراہیں زر ءُ آئیءِ ٹلیں کوہ آئی ءِ پُروسیلہ ایں زمین ءُ ایدگہ دولت ھرکسی چمانی دیمءَ زاہر اَنت نوں اگں بلوچ کوم وتی اندرءَ زبری ءُ کوتے ودی کنت تہ دنیا آئیءِ نیمگءَ المءَ چاریت البت نزورءُ ناتوان ءَ کس جست نہ کنت ھرکس دنیاءِ دلگوشءَ پہ زورءُ کوت ءُ زانتکاری ءُ زیرکی وتی نیمگءَ ترینت کنت وھدے تو دیمءَ شتے ءُ کوت مند بوتے گڑا ھرکسی واھگ بیت کہ گوں تو تعلک داری ءُ رشتہ جوڑ بکنت اے چیز گوں دنیاءِ دراہیں کوماں بیت اے ملک ءِ جند ءِ تہا ھم بازیں کومانی نیامءَ یک گرءُ چیلے است اِنت بنیاد پرستانی ھوالہءَ جاگیردارانی ھوالہءَ کبائلی کوتانی ھوالہءَ جمہوری سیکولرءُ کومی پکر داروکیں کوتانی نیامءَ کش مکش ءِ چاگردے ودی بوتگ نوں ھرکس کہ اتھاد یا مھکمیءِ نیمگءَ سپ بندی کنت آ المءَ سوب مند بیت مے جہد ھمیش اِنت کہ اے ملکءِ تہا جہموری ءُ سیکولر کوتءُ ماں بلوچستانءَ کوم پرست ءُ جمہوریت دوستیں کوت اتھاد ءُ ھوریءِ نیمگءَ برونت تانکہ یک مھکم ءُ زورمندیں کوتءِ جوڑ بہ بیت کہ آ بدل بوتگیں جاورانی تہا کومی مپادانی پہریزءِ واستا یک پائدہ مندیں راہءُ رھبندے درگیتک بکنت ۔
لبزانک…… .. واجہ ما شمے سک باز منت واریں کہ شما گوں ما اے دیوان کت۔
گلام مھمد بلوچ…… .. من ھم شمے باز منت واراں اے درگتءَ من باھد اِنت بگشاں کہ لبزانک ءِ ھوالہءَ ھرچ پیش رپت ءِ کہ بوتگ اے باز جوان اِنت منی جندءَ پریشی ءَ مزنیں واھگے است ایدگہ دراہیں زبان دوست کلمکار ءُ وانندہ ھم پریشی ءَ واھگ دار اَنت ءُ ایشی ءَ جوانیں چیزے زاننت البت اے درگتءَ من یک دزبندی یے کناں آ ایش اِنت کہ شائر کلمکار ءُ زبان دوستانی مزنیں دلپروشیءُ دل رنجی یے ایش اِنت کہ مے لبزانکی تاک باکائدہ نہ اَنت ءُ شش ماہ سالےءَ یا دوسالءَ پد بند بنت منی ھیال ءَ اگن بلوچی لبزانک باکائدہ بہ بیت تہ بلوچستانءِ تہا جوانیں جاہ مکامے ءِ واھند بیت.
شمے وسیلہءَ من اے کلہوءَ دیگ لوٹاں کہ کومی جہد ایوکءَ مے زمہ واری نہ اِنت بلکیں اولسءِ دراہیں ٹک چوکہ ڈاکٹر، انجیئر، دکاندار، ملازم، کلمکار، کاشتکار، زمیندار ءُ ایدگہ دراہیں مردمانی ھوریں زمہ واری اِنت مے دانشورءُ زانتکاراں بائد اِنت کہ آ ھم وتی کومی زمہ واریاں پورا بکننت، چیاکہ منی ھیالءَ آ وتی زمہ واریاں چوکہ کنگ لوٹیت پورا کنگءَ نہ اَنت بائد اِنت آ کومی لبزانکءُ ایدگہ معاشی سیاسی ءُ راجی جیڑہانی بابتءَ گیش ءَچہ گیش پٹءُ پول بکننت ءُ نبشتانکءُ کتاب بنویس اَنت۔ اپسوزی ھبر ایش اِنت کہ تنی وھدی ماں بلوچیءَیک چشیں لکوڑءُ زبان رھبندے جوڑ نہ بوتگ کہ آ ھرجاہءُ ھرکجا گشگ ءُ نویسگ بہ بیت اے چیز پہ مے دانشورءُ کلمکاراں یک مزنیں چیلنج اِت من دزبندی کناں کہ آ اے بنیادی کارءَ بکننت چیاکہ تانکہ اے چیز نہ بیت پہ وانندہءُ تالباں بلوچی زبان ءِ وانگءُ نویسگ سک مشکل بیت ءُ ایشی ءِ دیمروی سست رویءِ آماچ بیت۔
بلوچی سبز بات بلوچستان آجو بات .
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
