ماتیں زبانانی میان اُستمانی روچ
نبشتہ کار: سخی بلوچ
دی بلوچستان پوسٹ
ھر یک راجے وتی سر ءَ پہ شان بُرز کنت کہ من پِلاں راج ءِ پرزندے اوں ءُ منی پّجار منی راج ءُ زبان اَنت. ھمے وڑ ءَ مرچی من اوں وتی سر ءَ پہ شان برز کناں کہ من بلوچ راج ءِ پرزندے اوں من ءَ اوں شھدیں زبانے ھست منی اوں پّجار منی شھدیں زبان ءُ مکھیں سرڈگار اِنت.
مرچی ماتیں زبانانی میان اُستمانی روچ اِنت بِزاں کہ ۲۱ اُستپان ( فروری) اِنت. اے روچ پہ ماتیں زبانانی میان اُستمانی روچ چوں دارگ بیت کدی دارگ بیت، کمو وتی نہ زانتی ءَ چیزے دانک دیم ءَ کاراں.
ھما وھد ءَ کہ رو دراَتکی پاکستان بزاں بنگلادیش پاکستان ءِ یک ( صوبہ) ءِ بیت گُڑا بنگالی چہ پاکستان ءَ ھمے لوٹ ءَ کن اَنت کہ ما پاکستان ءِ یک بھرے اِیں ، مئے زبان اوں کونیں زبانے دومی گپ پاکستان ءِ تہ ءَ مئے راج ءِ کسّاس اوں کم نہ اِنت، ما پاکستان ءِ ایدگہ کُلیں راجانی کسّاس ءَ گیش اِیں کم نہ اِیں ءُ ما چہ ایوانِ بالا ءُ چہ ایوانِ زیرین ءَ ھمے لوٹ ءَ کن اِیں کہ شما بنگالی زبان ءَ اوں پاکستان ءِ تہ ءَ دومی راجی زبان مِہ منّ اِت، گُڑا پاکستان چار اِیت اے وَ بنگالی اَنت ایشانی نسل مارا چہ کم اِنت ما چوں بنگالی زبان ءَ پاکستان ءِ تہ ءَ دومی راجی زبان ءِ ھک ءَ بہ دَئے اِیں.
بنگالی راج ھر وڑ ءَ جُھد کن اَنت، بَلے انگت ایشانی لوٹ سرجم نہ بیت گُڑا بنگالی نودربر ھمے درد ءَ مار اَنت ( چوناھا گُش اَنت راجانی تہ ءَ ھر وھد ءَ آشوب ءِ آرگ ءَ ورناھانی یک بلائیں دستے گون اِنت ءُ گون بیت) گُڑا بنگالی راج ءِ نودربر 21 اُستپان 1952 ءَ ھمے جار ءَ پرّین اَنت کہ ما بنگالی یک راجے اِیں ءُ ما وتی راجی زبان ءَ ھر وڑ ءَ پاکستان ءِ دومی راجی زبان ءِ لوٹ ءَ کن اِیں ءُ ھمے روچ ءَ ناتھ مزّن شھدربر جاہ، ڈھاکہ مزّن شھدربرجاہ ءُ ڈھاکہ میڈیکل مزّن شھدربرجاہ ءِ ورنا ھمے لوٹ ءِ واستا زھرشانی ءُ دیوان برجاہ دار اَنت، گُڑا پاکستان ءَ را اے چیز وش نہ بیت پاکستانی لشکر ھمے دیوان ءُ زھرشانیانی سر ءَ اُرش کنت پنچ نودربر شھید بیت ءُ دگہ ھزاراں نودربر ٹپّی بیت، شھید بوتگیں ورنایانی نام چو اے وڑ ءَ اَنت سلال الدین، ابدلجبار، ابدلسلام، ابو برکت ءُ رپیک اللہ بنت. گُڑا بنگالی نودربر ءُ راجدوست ھاموش نہ بنت دومی روچ ءَ دگہ یک دیوانے ءُ زھرشانی برجاہ دار اَنت گُڑا یکبرے پد ءَ پاکستانی لشکر اُرش کنت دگہ چار نودربر شھید بیت. بَلے ھمے زرمبش بند نہ بیت گیش ترند بیت ھمے وڑ ءَ 1956 ءَ پاکستان لاچار بیت بنگالی زبان ءَ پاکستان ءِ دومی راجی زبان ءَ منّ اِیت، پاکستان ءِ راجی زبان اردو ءُ بنگالی بنت.
1970 ءَ پاکستان ءِ گچین کاری بیت گُڑا شیخ مجیب الرھمان ءِ پارٹی عوامی لیگ گچین کاری ءَ باج بارت ءُ ھکومتی ءِ تیاری کنت کہ گُڑا پاکستان ءَ را اُوپار نہ بیت کہ یکدیم بنگالی زبان ما راجی زبان ءِ جاہ داتگ دومی ایش اِنت عوامی لیگ ھکومت کنت اے چون؟ اے وڑ ءَ بنگالی پاکستان ءَ وتی دست ءَ کن اَنت، گُڑا پاکستان منّگ ءَ ساڑی نہ بیت ھمے جیڑہ مزّن بیت تاں بنگالی راج ءِ سی لکھ مردم شھید بیت ءُ بنگالی چہ پاکستان ءَ جُتا بنت ءُ وتی زبان ءَ بنگلہ دیش ءِ راجی زبان جوڑ کن اَنت بَلے پاکستان ءِ انگت ھما رَدی ءَ یکبرے پد ءَ کنگ ءَ اِنت.
ھمے وڑ ءَ 1999 ءَ اولی بَر ءَ ماتیں زبانانی میان اُستمانی روچ دارگ بیت ،ھما اِنت ھر سال ماتیں زبانانی میان اُستمانی روچ دارگ بوّگ ءَ اِنت.
مرچی میان اُستمانی روچ ءَ ھر یک راجے وتی ماتیں زبان ءِ روچ ءَ برجاہ دار اِیت پرچاکہ زبان راجانی پّجار اِنت.مرچی مئے بد بھتی اِنت کہ مئے ماتی زبان پاکستان ءِ تہ ءَ وانینگ بوّگ ءَ نہ اِنت دومی گپ مئے زبان چہ وانگجاھاں ھچ وڑ ءَ وانینگ بوّگ ءَ نہ اِنت بس شھدربر جاہ ءُ مزّن شھدربر جاہ ءَ وانینگ بوّگ ءَ اِنت، بس پد ءَ اوں شَرّیں وڑے ءَ وانینگ بوّگ ءَ نہ اِنت.
پاکستان ءِ تہ ءَ پشتون، سندھی، پنجابی ءُ ایدگہ زبان وانگجاھاں وانینگ بوّگ ءَ اَنت ،بَلے بلوچی زبان ھچ وڑ ءَ وانگجاھاں وانینگ بوّگ ءَ نہ اِنت، پد ءَ اوں ھزار دروت بلوچ راج ءِ پرزنداناں کہ وتی نزّوریں کوپگاں وتی زبان ءِ زندگ دارگ ءِ واستا شپّ ءُ روچ جُھد کنگ ءَ اَنت. باید اِنت ما وتی زبان ءِ دیمروئی ءِ واستا یک مشُت ءُ تپّاک بہ بَہ اِیں پہ وتی ماتی زبان ءَ جُھد بہ کن اِیں ءُ مرچی مئے ماتی زبان یکّیں بلوچی نہ اِنت بلکینا براھوئی زبان اوں مئے ماتی زبان اِنت.
اگاں ما مرچی وتی ماتی زبان ءِ سر ءَ جھد نہ کُرت ھاموش بوت اِیں گُڑا مئے زبان گار ءُ بیگواہ بیت اگاں زبان گار ءُ بیگواہ بوت گُڑا زبان ءَ ھَوار ما اوں گار ءُ بیگواہ بہ اِیں.
لھتیں راہ ءُ سوج پہ بلوچی زبان ءَ نوں مئے زمہ واری چے اِنت کہ ما وتی شھدیں زبان ءِ واستا چے کُرت کن اِیں؟
(۱) مارا وتی زبان وانگی اِنت.
(۲) وتی زبان ءِ بابت ءَ پٹ ءُ پول کنگی اِنت.
(۳) بلوچی زبان ءَ را یک تپّاکیں بُن رھبندے دیگی اِنت.
(۴) وتی راج ءِ پُسّگاناں بلوچ زبان ءِ وانگ ءِ سوج ءُ سرپدی دیگی اِنت.
(۵) وتی کھول ءِ مردماناں زبان ءِ بابت ءُ ھاس کر وتی کسانیں زھگاناں بلوچی زبان ءِ وانگ ءِ ھیل دیگی اِنت.
(۶) ھما دور یا ھما وھد کہ ھما راج ءِ سر ءَ گوزگ ءَ اِنت ھما دور ءِ بابت ءَ نبشتہ کنگی اِنت ءُ ھما نکّان راج دپتر ءَ ایر کنگی اَنت.
(۷) وتی زالبول ھم ھمے پِڑّ ءَ آرگی اَنت.
(۸) گوں وتی زبان زانتاں دستبندی اِنت کہ آ وتی زبان ءِ رکّینگ ءِ واستا گیش ءَ چہ گیش جُھد بکن اَنت.
(۹) ھما ادارہ ھست اَنت کہ زھگاناں دگہ زبانانی سوج دیگ ءَ اَنت باید اِنت آ وتی زبان ءَ اوں زھگاناں بوانین اَنت.
اگاں اے کُلّیں سوجانی سر ءَ امل کنگ بہ بیت گُڑا کدی آ راج گار ءُ بیگواہ نہ بیت، اگاں زبان زندگ بوت گُڑا آ راج زندگ بیت. راج زندگ بوت زبان زندگ بیت.
بلوچی ءُ براھوئی ءِ شھدیں زبان زندگ بات
بلوچ راج مانزمان بات
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
