زُبان ءِ ارزشت مزن اِنت
نبشتہ کار: سرباز وفا
دی بلوچستان پوسٹ
بولی اگاں وشّیں جند ءِ بدیں
وتی راہ ءَ یل دنت مردم ردیں
اگاں مردم بچار اِیت دگنیا ءِ تہ ءَ واجہ ھُدا ءِ بازیں مہلوک گِندگ بیت بلے ابید ءِ چہ بنی آدمءَ آ دگہ سرجمیں مہلوک کُل گُنگ اَنت ۔ بنی آدم ھبر کُت کنت ھمے ھاترا بنی آدم جتا جتائیں زُبانانی واھُندیں اگاں بنی آدم گپ مجن اَنت گڑا بے زُبان ءُ گُنگ گشگ بنت۔
زُبان بنی آدمءِ انسانیت ءَ پدّر کنت حضرت علیءِ کول اِنت کہ زبان انسانیتءِ کُنجی اِنت اگاں مردمے ءِ زبان پچ بہ بیت گڑاں آ مردم زانگ بیت کہ اے چونیں مردمے ، منی گشگ ءِ مول ءُ مراد ھمیش اِنت کہ پہ راجے ءِ زندگ دارگ ءِ ھاترا زبانءِ زندگ دارگ الّمی اِنت ۔ زبان راجانی پجّار اِنت اگاں یک راجے وتءَ ماں دُگنیاءِ تہ ءَ زندگ دارگ لوٹیت گڑاں آئیءِ مستریں زمہ واری ھمیش اِنت وتی زبان ءَ زندگ بداریت راجی پرزند گوں وتی زبانءَ مہر بکناں وتی زبان ءَ دوست بداراں ۔
وھدے کہ ما وتی بلوچی زبانءِ سرا پہ جیڑ ایں داں یک بلند ءُ بالائیں نامے واجہ سید ظہور شاہ ھاشمی مئے دیم ءَ کیت۔ سید ظہور شاہ ھاشمی بلوچی زبانءِ مزن نبشتہ کار ءُ یک شاعرے بوتگ ، آئیءَ وتی زبانءَ گوں بے کساس مہر بوتگ پہ بلوچی زبان ءِ ھاترا چنچو واری کش اِتگ ، آئی نبشتگیں لبز بلد “سید گنج” پہ بلوچی زبانءِ ھاترا یک بلائیں مڈی یے۔ مئے نبشتہ ءُ نبشتہی رھبندءَ پہ رھشونی کنت۔
اے ھم یک راستی یے کہ شاعر راجی رھشون اَنت ، ھنچو کہ اگاں کسےءَ گوں زبانءَ مہر بہ بیت آ الم گوں وتی راج ءَ دود ءُ ربیدگاں مہر کنت ، شاعر وتی راجءَ پہ وتی گوشدارگءَ تیار کن اَنت وتی راج ءَ پہ وتی زبان ءُ وتن ءَ مہر ودیگ کن اَنت ،
شاعر وتی شاعریءِ تہا دود ءُ ربیدگ ءُ راجی بامردانی کسّہاں کار اَنت وتی راجدپترءَ زندگ دار اَنت زبانءِ مہر مردم ءَ را گوں وتی راج ءُ وتن ءَ مہر پرمائیت ۔
پہ راج دوستی ءِ ھاترا زبانءِ دوست دارگ الّمی اِنت ۔
ڈیھ من ءَ وتءَ ھست زبان من ءَ وت ھست من پرچہ دگرءِ زبانءَ گپ بکن آں ، وھد ءِ کہ تُرکی آجو بیت گڑا کمال اتاتُرک گُشیت کہ مسیتانی تہ ءَ بانگ وتی زبانءَ بدے اِت ، واجہ ھُدا ھر زبان ءَ سرپد بیت اے گپءِ گشگءِ مول ءُ مراد ھمیش اِنت کہ بائد مارا گوں وتی زبان مہر بہ بیت۔ مئے بازیں وانندگ ھست اَنت کہ آ انگت وتی زبان ءَ وانگ ءُ نبشتہ کنگ نزان اَنت اے بد بہتی یے نئے دگہ چی یے ؟
ما وتی جندئے شہدیں زبان یل داتگ ءُ دُژمن ءِ زبان زرتگ ۔الم مردم دگر ءِ زبان ءَ پہ زرورتءَ کارمرز کنت بلے گیش ءَ چہ گیش وتی زبان وانگ ءُ پوہ بوگی اِنت ۔
21 اُستپان ماتی زبانانی میان استمانی روچ زانگ بیت ھمے روچءَ بنگالیاں پہ وتی زبان ءِ دیم ءَ آرگ ءُ آئی ءِ ھکّانی لوٹگءَ درکپت اَنت ۔گڑا پاکستان ءِ لشکرءَ اے چیز دوست نہ بوت ءُ آئی بنگالی نودربرانی روانکےءِ سرا ارش کرت کہ بازیں کسے شہید بوت۔
21 استپانءِ روچءَ بگر داں وتی ڈیھءِ آجوئیءَ پہ زبانءَ بنگالیانی جہد برجاہ بوت۔ ءُ بنگالیانی اے کربانیاں دنیاءَرا پیش داشت کہ زبان ءِ ارزشت چینچو مزن اِنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
