تونسہ شریف کوہ سلیمان ڈیرہ غازی خان ءَ ”زِمستان شاعری دِیوان“
ھال : اسحاق خاموشؔ
ماں تونسہ شریف کوہ سلیمان ڈیرہ غازی خان ءَ چہ سنگت ادبی دِیوان، غازی خان ریفرنس لائبریری ءُ بلوچ راج کوہ ِ سُلیمان (ڈیرہ غازی خان) ءِ نیمگ ءَ ”زِمستان شاعری دِیوان“۔
گْوستگیں روچ ءَ (29 دسمبر2018 ) ءَ چہ سنگت ادبی دِیوان، غازی خان ریفرنس لائبریری ءُ بلوچ راج کوہ ِ سُلیمان (ڈیرہ غازی خان) ءِ نیمگ ءَ ”زِمستان شاعری دِیوان“ ءِ نام ءَ یک پُرمڑاھیں لبزانکی مراگشے ماں تونسہ شریف ءَ بیگا ءِ پنچ ءُ نیم ءَ ایر کنئگ بُوت۔ اے دِیوان ءِ پاگواجہ ڈاکٹر نبی ساجد بُزدار وہدیکہ حاصیں مہمان بلوچی زُبان ءِ نامداریں شاعر ءُ نبشتہ کار واجہ اللہ بشک بُزدار، چہ شال ءَ اتکگیں بلوچستان یونیورسٹی ءِ ہیڈ آف ڈیپارٹمنٹ واجہ ڈاکٹر حامدعلی بلوچ )PHD)، چہ کراچی ءَ اتکگیں نامداریں شاعراسحاق خاموش ءُ چہ روجھان مزاری ءَ اتکگیں شاعر واجہ سعید تُبسّم مزاری اِتنت۔
دِیوان ءِ بندات کریم بخش زوراخ بلوچ ءَ گوں کوہ سلیمان ءِ کلاسیکل شعرے ءَ کُت ءُ آؤکیں مہمانانی مِنّت گِپت۔پدا ورنائیں شاعر حمید لغاری ءَجارچینی ڈُبّہ وتی کوپگاں زُرت۔
گُشتانکی بہر ءِ تہا دیوان ءِ دیما تْران کنان ءَ ڈاکٹر نبی ساجد بُزدار ءَ تْران کنان ءَ گُشت کہ مئے ہند ءِ بازیں شاعری یے کماشانی سینگ ءَ کلّ اِنت ءُ بازینے گارءُ بیگْواہ بُوتگ اَنت۔ نوں کہ ورنا دیما اتکگ اَنت الّم ءَ اے پِڑ ءَ کار ءَ دیما براَنت۔ آئی ءَ گُشت کہ اے دَمگ ءَ چِد ءُ پیسر کہ ساجد اسحاق بُزدار ءُ مومن بُزدار ءَ پہ بلوچی زُبان ءِ پہازگ ءَ ھما کار کُتگ اَنت آھانی جُہد ستا کرزاَنت کہ آھاں مئے ہند ءُ دَمگ ءِ شِنگ ءُ شانگیں شاعری چِت ءُ نزّآؤرت ءُ ماں بلوچی اکیڈمی ءَ پہ چاپ ءُ شِنگ ءَ دات۔ اُمیت اِنت کہ کوہ سلیمان ءِ بلوچ شوریٰ اے دیوان ءُ مراگشاں ھمے وڑا برجاہ داریت۔
ڈاکٹر حامد علی بلوچ ءَ وتی تْران ءِ تہا کوہ سلیمان ءِ لبزانک دوستانی اے کِرد ءَ را ساڑاہان ءَ گُشت کہ چُشیں دِیوان ءُ مراگاہ ادا نشتگیں ھما بلوچ کہ چہ وتی زُبان ءَ گِستاء اَنت آھاں پہ زُبان ئِ نیمگ ءَ دِلگوش گْور کنائینگ ءَ مزنیں سکینے دئینت۔ آئی ءَ گُشت کہ منی واھگ بُوتگ کہ من بلوچی زُبان ءَ بزاناں ھما زُبان ءَ کہ کوہ ِ البُرز ءِ سیمسراں بندات بیت تاں پنجاپ ءِ سیمسراں سر کشّیت۔ اوگانستان ءَ بگر تاں ہر ہند ءُ دمگ ءَ کہ بلوچے نشتگ ہمودا رؤت ءُ سر کشّیت۔ آئی ءَ گُشت کہ سندھ ءُ پنجاپ ءِ تہا بلوچانی مزنیں کساسے نشتگ بلئے آہانی تہا یک گِستائی ءُ پسستی یے است۔ آہانی سَوب بازیں بندش اَنت۔ زُبان ءِ سرا کار کنئگ باز مزنیں کارے اے کار جُہد ءُ جکانسری لُوٹیت۔ آئی ءَ گُشت کہ من کُردی، اوِستائی ءُ دگہ زُبان ءَ گوں بلوچی ءَ دیم پہ دیم کُتگ ءُ ونتگ اَنت۔ من دیستگ کہ مئے زُبان ءِ سرا چُشیں بلائیں اسر نہ کپتگ کہ آئی ءِ گار ءُ بیگواہی ءِ سَوب جوڑ بہ بیت بلئے اے رِد ءَ مارا دست کُٹّ ءَ کنگ ءُ نندگی نہ انت چیا کہ چہ نا دلگوشی ءَ دُنیا ءِ بازیں زُبان مرگ ءِ آماچ بُوتگ اَنت۔
ڈاکٹر حامد علی بلوچ ءَ تْران کنان ءَ درّائینت کہ فارسی زُبان ءِ سرا ساسانی ءَ دؤر ءَ اینچو اثر نہ کپت اینچو کہ عربانی آہگ ءَ گوں آئی ءَ باز تکانسر کُت۔ آئی ءَ نامداریں جرمن دری پٹّ ءُ پولکاراگنس کورن ءِ درور دیان ءَ گُشت کہ اگاں کسے ایرانی زُباناں وانگ لُوٹیت تانکہ بلوچی زُبان ءَ مہ وان ایت اے دگہ زُبانانی نازُرکیاں پہ جْوانی ءَ پوہ بُوت نہ کنت۔ آئی ءَ عربی ءِ نامداریں پٹّ ءُ پولکار سعدالحمیدی ءِ درور دیان ءَ گُشت کہ سعد ماں بلوچانی راجدپتر ءِ باروا مزنیں پٹّ ءُ پولی کارے کُتگ آئی ءِ رِد ءَ بلوچی زُبان ءِ نکش ءُ اثر چہ 780 BC ءَ اے دَمگاں گندگ بنت۔ آئی ءَ گُشت کہ اے وہد ءَ بلوچی زُبان بازیں ہترہانی آماچ اِنت۔ آئی ءَ گُشت کہ سندھ ءِ نشتگیں 70 درسد بلوچ ءَ وتی زُبان شمُشتگ۔
بلوچی زُبان ءِ نامداریں شاعر ءُ پولکار واجہ اللہ بشک بُزدار ءَ تْران کنان ءَ گُشت کہ کوہ ءِ سلیمان چہ وتی زُبان ءُ لبزانک ءَ کمّے گِستا شُتگ کہ ایشی ءِ سرا انگت بازیں کارے ءِ کنئگ ءِ زلورت اِنت ءُ اے کار گوں یکّے ءُ دومی ءِ رہوت ءُ رؤ ءُ آ ءُ کُمکاری ءَ گوں بُوت کنت۔
اسحاق خاموشؔ ءَ تْران کنان ءَ گُشت کہ بلوچ اگاں ہرہند ءُ دَمگ ءَ کہ نِشتگ آئی ءَ گوں وتی زُبان ءَ مہر اِنت ءُ کوہ ء سُلیمان ءِ نشتگیں بلوچانی اے گامگیج پہ زُبان ءُ لبزانک ءِ دیمرئی ءَ نیکیں پالے۔
شعری بہر ءِ تہا واجہ اللہ بخش بُزدار، اسحاق خاموشؔ، سعید تبسم مزاری، زوراخ بُزدار، سلیم بُزدار، حمید لغاری، شوکت توکلی، کماشیں شاعر نور بخش بُزدار، اسلم بزدار، قمر بُزدار، عطا محمد بُزدار، ابراہیم بُزدار، فاضل بشیر، ابراہیم لدوانی، مفتی عرفان الحق، سلام چاکری، وقار عبداللہ، ایاز جمّعہ، محمد بخش بُزدار ءُ عدنان بُزدار ءَ وتی شیرکنیں گال ءُ پِربند دِیوان ءِ دیما ونت اَنت ءُ چہ دِیوان ءَ داد گِپت۔ دِیوان ءِ تہا کماش ورنا ءُ زِند جتاجتائیں پِڑاں چہ سیادی داروکیں بازیں مہلوکے ءَ بہر زُرت۔
دِیوان ءِ گُڈسر ءَ چہ بلوچی ادبی سنگت ءِ نیمگ ءَ شاعر ءُ نبشتہ کاراں کتابانی ٹیکی دَیگ بُوت۔
اے پُرمڑاھیں مراگش شپ ءِ 11:30 ءَ آسر بُوت۔دِیوان ءِ آسرءَ پد بلوچی ادبی سنگت ءِ جُہد کار ءُ زانتکاریں کماش واجہ زوراخ بلوچ ءَ اتکگیں مہمانانی مہمانانی مہمانداری کُت۔
