شہید رھشون ڈاکٹر منان جان
نبشہ کار: سرباز وفا
دی بلوچستان پوسٹ
31 جنوری پہ بلوچ راج ءَ یک سْیاھیں روچے زانگ ھمے ھاتر ءَ بیت کہ 31 جنوری 2016 ءَ بلوچ راجی رھشون واجہ ڈاکٹر منان جان گوں وتی ھمراھاں مستونگ ءَشہید کنگ بیت. شہید ڈاکٹر منان جان پہ بلوچ راج ءَ یک بلائیں ھستی ءُ مزن نامیں رھشونے اَت کہ وتی زندگی ءِ ھر وھد ءُ پاساں گوں راجی زْرمبش ءِ دیم ءَ بَرگ ءَ گُلائیش اَت داں منی راج پہ ایمن ءُ آجوئی وتی مَرزبوم ءِ سر ءَ شادِھ ءُ شاتکام بِہ بیت. ھمے ھاترہ واجہ ءَ مرگ کبول کُت بلے دُژمن ءِ زُلم ءُ زُوراکی، گُلامی کبول نہ کُت.
آجوئی ءِ اے کندیل مشکے پروار ءَ واجہ اللہ بکش بلوچ ءِ گس ءَ ودی بیت کہ کسانسالی ءَ واجہ ءِ کماش اے کوڑھیں امبروز ءَ یَلہ دنت بلے واجہ ءِ ناکو آئی رُدوم ءُ بودکاری ءِ ڈُبّہ ءَ زُور اِیت ءُ واجہ ءَ وانینیت کہ باندا پہ وت کلاتے بِہ بیت. چُش کہ واجہ پہ وت ءَ بِل پہ سرجمیِں بلوچ راج ءَ رُژنائیں چراگے بوت. چیاکہ واجہ اے راجی جُھد ءِ گْرانیں بار ھما روچ ءَ کوپگاں کنت کہ مکتب ءَ وانگ ءَ بیت ءُ بی ایس او ءِ کاروان ءَ ھوار بیت .ھمے سپر ءَ راھی بیت داں واجہ گُلام مھمد ءِ سروکی ءَ بلوچ نیشنل موومنٹ ءَ ھوار بیت ءُ آجوئی ءِ پیام ءَ ھمک دْمک ءُ میتگاں شِنگینیت. ھمے پیم چہ بُنجاھی کمیٹی ءِ باسکی ءَ پَد واجہ دو ھزار دَھ ءِ راجمانی پَتّر ءِ دیوان ءَ گچینکاری ءَ پد بلوچ نیشنل موومنٹ ءِ بُنجاھی مزن کارگشاد جوڑ بیت. ھمے وڑا دو ھزار چاردہ ءِ سیشن ءَ یکبرے پد ءَ پارٹی ءِ مزن کارگشاد بیت ءُ گوں راجی جنز ءِ مھکمی ءُ دیمرؤی ءِ ھاتر ءَ مُلمہ بیت داں شھیدی ءِ شیرکنیں جام ءَ نوش کنت.
وھدےکہ دو ھزار سئے ءُ دو ھزار چار ءِ مْیان ءَ بلوچ نیشنل موومنٹ واجہ گلام مھمد بلوچ ءِ سرکماشی ءَ ٹھینگ بیت گُڑا نام نہادیں اسلامی ریاست پاکستان ھمے تْرس ءُ بیمّ ءِ آماچ بیت کہ منی نام گیپتیں ھُنڈالاں ولگوج کنت پمیشکا پہ بلوچ راجی جنُز ءِ ایرماد کنگ ءَ وتی گاماں تْرند کنت داں اے جُھد ءَ ایرموش بکن آں، بلے کئے سرپد کنت اے ناسرپد ءَ کہ راجی جُھد گوں زُلم ءُ زُوراکی آں دارگ نہ بیت. گوں ھمے بے سوبیں واھگاں مرچی ھم گُلائیش اِنت.
3دسمبر 2007 ءَ چہ کراچی ءَ پاکستان ءِ تولگیں پوج ءُ چیریں کارندھاں بی این ایم ءِ بانی لیڈر واجہ گلام مھمد بلوچ ءَآوار جت . 9 ماہ ءَ رند واجہ گلام مھمد ءَ یلہ دات بلے واجہ گلام مھمد بلوچ ءِ جھُد ءِ تہ ءَ یک کسانیں نزوری یے نیاتک، بلکیں واجہ گلام مھمد ءِ جھد انگت یک شریں وڑے ءَ دیم ءَ روگ ءَ اِنت.
پاکستان ءِ فوج ءَ دوبر 3 اپریل 2009 ءَ چہ کیچ ءَ واجہ گلام مھد بلوچ ءِ ھمراھی ءَ بلوچ نیشنل موومنٹ ءِ مرکزی کمیٹی ءِ باسک واجہ لالا منیر بلوچ ءُ واجہ شیرمھمد بلوچ ءَ چست کرت آھانی لاش 9 اپریل 2009 ءَ مرگاپ ءَ دور دات ،پاکستان ھمے سرپد بوت من اے شہید کرتگ آں نوں بلوچ راجی جنُز اوشت ءِ شکار بیت۔
بلے اے راجی جنُزیے! نام نہادیں ریاست سرپد نہ اَت کہ راجی جنُز پہ گار ءُ بیگواہ کنگ ءُ شہید کنگ ءَ گیشتر مھکم باں اوشت ءِ شکار نباں .شہید چیرمین گلام مھمد بلوچ گوں کل شھیداں آشوب ءِ ھما قندیل اِنت کہ آھانی ھوناں بلوچ ءِ گس گس ءَ جھدکار ودی کرتگ ءُ سرجمیں بلوچستان ءِ تہ ءَ یک آسے روک بوت .یک اَنچیں آشوب ءِ اتک کہ شہر ءُ باراز، کوہ ءُ کوچگ ءِ تیوگیں بلوچ راج ءَ وتی گلامی مار اِت ءُ ہر گس ءَ یک جھدکار ءِ ودی بوت. پاکستان ھیران بوت ءُ روچ پہ روچ وتی زلم ءُ رواکی گیش کناں کرت انت کہ چہ شہید گلام مھمد بلوچ پد ءَ ودی بوتگ۔
بی این ایم ءِ مرکزی کُمک کارگشاد رسول بکش مینگل، انفارمیشن سکرٹری حاجی عبدالرزاق، فنانس سکریٹری عبدالصمد تگرانی، دومی فنانس سکریٹری ءُ ھالکار رزاق گل، مرکزی کمیٹی ءِ باسک ءُ بلوچی زبان ءِ مزن نامیں شائر نصیرکمالان ،مرکزی کمیٹی ءِ باسک نصیر رند ، مرکزی کمیٹی ءِ باسک استاد علی جان بلوچ، مرکزی کمیٹی ءِ باسک ڈاکٹردین مھمد بلوچ آوارن دمگ ءِ کماش ناکو ھیربکش بلوچ، کیچ دمگ ءِ کماش امداد بجیر بلوچ ءُ بازیں بی این ایم ءُ بی ایس او آزاد ، پی آر پی ءِ سنگت چست کُت ءُ گار ءُ بیگواہ ،بازیں سنگت شہید کرت اَنت۔
پاکستان ءَ وتی کُلیں زلم ءُ زوراکی بلوچ راج ءِ سر ءَ برجم داشتگاں انگت بے سوب اِنت. وھدے ما بلوچ راجی جنُز ءِ سر ءَ چمشانک دئیں ءُ چاریں گُڑا مئے توکل ءُ ھاٹیگ مھکم بیت کہ شہیدانی کاروان بے مُز نہ بیت، بلکیں پہ مُراد وتی منزل ءَ سر بیت. اے درگت ءَ کل شھیدیں پُسّگانی شھادت، بیگْواھیں یَلانی سِنچ ءُ زانت، شہید ڈاکٹر منان جان ءِ شہیدی ءِ سیمی سال من ءَ ھمے سرپدی دنت کہ اے کاروان اُوشت ءِ شکار نہ بیت بلکیں شہیدانی پگر الم سوبین بیت ءُ مئے راجی شہیدانی داتگیں دیمھونیانی داستان ماں راجدپتر ءَ مدامی اَبدمان ءُ وانگ بیت.
راجی آجوئی ءِ جُھد زندگ بات
گُلامی مُردگ بات.
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
