بے بُن ھِشت اِیں پاکستان
سرباز وفا
دی بلوچستان پوسٹ
دُگنیائے تَہ ءَ اگاں کُجام ملک ءُ راج بہ بیت آئی وتئی آزادی کہ گِپتگ آھرا راجی تحریکے اَست کہ پہ آجوئی ءِ گرگ ءِ هاترا مزنیں مہلوکے شہید بیتگ. الجزائر ، ھندوستان، ویتنام یا بنگلہ دیش بہ بیت ،چین ءُ کیوبا بِہ بَہ اَنت مردمانی گار بیگواه کنگ ءَ ھوار راجاں ھروڑیں سکّی ءُ سوری دیستگ. پہ وتئی آجوئی ءِ گرگ ءِ هاترا وتئی بے کساس پرزند شہید کُرتگ اَنت نوں آھاناں پہ وت پجار ءُ زبان ، دود ءُ ربیدگے است.
وھدے ما پاکستان ءَ چاراں مارا هچ وڑیں تحریکے گندگ ءَ نئیت ،پاکستان ءِ لیڈر محمد علی جناح انت وھدے آئی نظریہ ءَ چارے تہ ھرچیز چو واب ءِ وڑا انت. پاکستان ءِ قومی زبان اردو انت، اردو ءِ مانا لشکر بزاں چہ دُرائیں زباناں ھور ءُ هواریں کہ برٹش ءِ وھد ءُ باریگ ءَ برصغیر ءِ رابطہ، ھال ءُ اھوال ءِ زبان بیتگ کہ مرچی بے بُن ھِشت اِیں پاکستان ءَ وتئی کومی زبان جوڑ کُتگ. پاکستان ءِ جوڑ بُوّگ ءِ تاریخ ءَ چارے مسلم لیگ ءِ نام ءَ دیم ءَ کئیت، دومی پاکستانی پارلیمنٹ ءِ مہلوک ھمے گْوش اَنت دْرائیں مسلمان وت ما وت براس اَنت. اگاں دُرائیں مسلماں وت ماوت براس اَنت بنگالی ھم شمئے بْراس اِتاں گوں آیاں چیا ناهکّی کنگ بوت، ماس ءُ گھاراناں گار ءُ بیگواه کنگ ءَ ھوار گوں آهاں بدکاری کنگ بوت پرچہ ؟اے ھمے اسلامی جمہوریہ پاکستان ءِ داتگیں سوگات اَت کہ بنگالی راج ءَ وتئی راجی باندات ءِ سسّا گْور کُت ءُ وتا چہ کورمیں پاکستان ءَآجو کُت ءُ پہ ایمنی وتئی گلباگیں ڈیھ ءِ سرا زند گْوازینگ ءَ اَنت.
مرچی ھمے وڑا سندھی ءُ گوں پشتوناں ناهکّی کنگ بُوّگ ءَاِنت .دومی بلوچ پہ زور ءُ تاکت کْوزہ کُتگ ءُ ایردستی ءِ سانکلاں بندیگ اَنت. اگاں اے داب ءَ تو پاکستانی قوم ءَ پچارے تہ پنجاپی ءَ ابید دگہ کسّے تاریخی دْروشم ءَ وتگڑیں پاکستان ءِ بھر نہ اِنت. بلکیں سامراجیں برطانیہ ءِ کارِستانی آں کہ ھندوستان بھر ءُ بانگ کنگ بیت ءُ بے بُن ھِشت اِیں پاکستان ٹہینگ بیت کہ مرچی ھرکس چرے دوزھے آس ءَ وتا پھریزگ لوٹ اِیت. ھمے وڑا مردم گوستگیں وھد ءَ پچاریت بنگلہ دیش ھمے پاکستان ءِ بھر بیت، بَلئے هما بنگالی آں گوں چون ءُ چے پئیم کنگ بیت کہ مرچی ھم بنگالی ئے زھگ، زھگ کہ وتئی گْوست ءَ گیر کار اِیت پاکستان ءِ سرا نپرت کنت ءُ لھڑ دَر شان اِیت. ھمے وڑا سندیانی جیڑھ ءَ بچارے جیئے سندھ ءِ نام ءَ وتئی تحریک ءَ دیم ءَ برگ ءَ اَنت ءُ آجوئی لوٹ اَنت. بلوچ وتئی آجوئی ءِ ھاترا راجکاری ءُ مزاحمتی جھد کنگ ءَ اِنت. هنچو ما چاراں دگنیائے تَہ ءَ بازیں ملک هستاں چہ کومی پجّار ءَ زانگ بَہ اَنت، چیاکہ آ راج مذھب ءَدیم ءَ نیار اَنت کہ کئے نماز کنت ءُ کئے زگر ءُ بُت ءَ سجدگ کنت. پہ آھاں بس انسانیت کدر ءُ کیمت دار اِیت.
مرچی اگاں چمشانک دَئے چارے پاکستان ءِ تَہ ءَ پرچہ اِنسانی هکّانی پادمالی بُوّگ ءَ اِنت. جنرل ضیاالحق وتئی حکومتی ءِ وھد ءَ ھمے سرپد بیت پاکستان ءَ را کوم نیست گُڈ ءَ یک مذھبی مہلوکے ٹہین اِیت. ھمے مذھبی مہلوک ءَ پہ دگنیائے پیش دارگ ءِ واست ءَ ما پہ اسلام ءَ جنگ کنگ ءَ آں، بلئے ما گوں ھورت گندی ءَ بچاریں، گیدی ءِ انسان دوست وتئی دلگوش ءَ گْور بکن اَنت کہ انسانیت ءَ را اے چونیں نُکس ءُ تاوان دیگ ءَ اَنت پَدا ھم گُنگ. اے ھبر بگندے نگاھاں مئیت بلئے سد در سد راست اِنت کہ پاکستان ءِ تہ ءَ ھر روچ انسان گوں بے دردی ءَ مِرگ ءُ روگ ءَ اَنت کسّے ءِ گوشاں مورے ھم نہ وارت کہ یک انسان ئے مرگ انسانیت ءِ پاھو دیگ اِنت، بلئے ایشانی زمہ وار کئے اِنت . هالانکہ اے وڑیں زلُم گوں ھیوان ءَ رَوا نہ اِنت، پاکستانی مہلونک وتا اسلامی ٹیکھدار گْوش اِیت پرچہ اے وڑیں زلم ءُ زوراکی کنت، چیاکہ انسانیت ءِ ارواہ ءَ دیری بال کُتگ. پمشکہ ھرروچ وتکُشیں دهماکہ بُوّگ ءَ اِنت. سندھ ءِ تَہ ءَ لال شہباز قلندر ءِ سرا دهماکہ بیت اودا چنچو مسلمان مریت ،آرمی اسکول (وانگ جاه) ءَ دهماکہ بیت چنچو چنچو گونڈو مریت ،کوہٹہ ءَ وکیلانی سرا حملہ بیت چنچو وکیل مریت، پولیس ٹرینگ جاه ءِ سرا حملہ بیت چنچو پولیس مریت، اے کُجا کافر بوتگ اَنت. خضدار توتک ءِ تہ ءَ کبر دَرا بنت کہ لاشانی ھڈ ءُ کانپولاں اَبید دگہ ھچ پجارگ نہ بیت. ایشانی زمہ دار کئے اِنت. امریکہ ءِ تہ ءَ واجہ مُحمد ءِ نام ءِ سرا بُتے جوڑ کنگ بیت ءُ سوچگ بیت، تیوگیں پاکستان زھرشانی کنت امریکہ ءِ ھلاپ ءَ ،پاکستان ءِ تہ ءَ لال مسجد گوں قرآن پاک ءَ ھوار چنچو ماس ءُ گہار شہید کنگ بیت پرچہ ؟ ھمے مہلوک گوں پاکستان ءَ هوار انت گومازی ءِ تہ ءَ قران پاک شہید کنگ بیت، بلوچستان ءِ تہ ءَ ھر روچ گس سوچگ باں، قرآن شریف شہید کنگ بیت، مرچی تو بلوچ ءِ گس گس ءَ برو پچار بزگر ءُ شوانگ ءِ بہ بیت یا ماسٹر ءُ ڈاکٹر ءِ بہ بیت وانگ زانت یا نزانت گس ءِ تہ ءَ قرآن پاک ایرانت اے گس سوچگ بوتگاں ایشانی قرآن شریف کُجا انت؟ ھمے اسلامی ٹیکھدار کُجا انت ؟ بلوچ ءِ قرآن پاک قرآن ءِ نہ انت، یا واجہ هدا پاکستان ءِ فوج ءَ را موکل داتگ تو قرآن شریف شہید کن ترا جُست نیست؟ اے مسلمان ءِ ایمان ءِ کمزوری نہ انت دگہ کجام اِنت؟ ارشی یا الھامی چار کتاب اتکگ اے کجام کتاب ءِ تہ ءَ اے ھبر نبشتہ انت. بے گناه ماس ءُ گُھارانی سرا دست چست کنگ بہ بیت مسلمان اِنچو بِہ نندیت ءُ پچاریت. قرآن پاک ءِ تہ ءَ کجام تاکدیم ءَ اے دانک نبشتہ اِنت کہ پاکستان ءِ فوج مذہبی مہلوک اے کاراں کنت. مسلماں پرچہ هاموش اَنت؟ واجہ هُدا گْوش اِیت اگاں کسّے ءَ زُلم ءُ زوراکی گوں وتئی چمّاں دیست ءُ انگت هاموش بوت گُڈ ءَ آ مسلمان گْوشگ نَہ بیت ءُ گناھگار اِنت. آھرا ھچ وڑیں هکّ نیست، ھرکس اے زلُم ءُ زوراکی آں گند اِیت پرچہ هاموش اِنت. پاکستان ءَ را بُنیاد نیست اے مہلوک پرچہ وتا پاکستانی گْوش اِیت، اگاں کسّے پاکستان ءِ زوراکی ءَ گندیت انگت پاکستان ءِ منوک انت وتا پرچہ مسلمان ءِ گْوش اِیت. پاکستان دُگنیا ءَ رد دیگ ءِ هاترا ہروہد ءَ نوک نوکیں آپریشن ءِ تیاری ءَ کنت ءُ یک نام ءِ دنت ضربءِ عزب ،رداُلفساد، من مذہبی دهشتگردی ءَ ہلاس کن آں، اے مذہبی دهشتگرد ھمے پاکستان ءِ تہ ءَ موجود انت، وتئی کلیں طاقت ءَ بلوچ ءِ سرا کارمرز کنگ ءَ انت دگنیا پرچہ هاموش انت.
پاکستان میر ءِ شنک انت ہرچی کنت آھرا جُست نیست، انسانی ھکّانی هلاپ ورزی ءَ بکن موکل انت، اے گپ ءَ چہ پدرانت پاکستان ءَ مذہبی ٹولہ جوڑ کتگ آں تیوگیں دگنیا چہ پاکستان تْرس اِیت یا بلیک میل انت. تنیگہ کس گوائی نہ دنت پاکستان ءِ تہ ءَ پہ چری تُپنگ ءَ جنگ بوتگ ھر وھد ءَ پاکستان گْوش اِیت بلوچ ءِ آزادی پسُند سرینڈر کنگ ءَ انت، ھمے سرینڈر کنوکیں مہلوک ءَ میڈیا ءِ دیم ءَ پیش کنت آهاں ءَ چری تُپنگ ءِ دست ءَ انت ءُ گْوش اِیت دهشتگردے دستگیر کُتگ بلئے آهان ءَ چری تُپنگ گون انت. اگاں دهشتگرد ءِ جنگ بیت آھرا چری تُپنگ ءِ گون انت پاکستان ءَ کجام هند ءَ کہ کارے کنگ بیت یا بمب دھماکہ ءِ نام گرگ بیت اے چری تُپنگ ءَ پرچہ پیشداریت ؟پاکستان چہ چری تُپنگ ءِ پیشدارگ ءَ ھمے پدرانت پاکستان ءَ را بیدے دروگ ءَ دگہ ہچ وڑیں راہ ءُ در نیست. دگنیائے رد دیگ ءِ هاترا ھمے دروگ ءَ بندیت بلوچستان ءِ تہ ءَ آزادی پسُندیں تحریک نیست صرف ادا دهشتگردی بوگ ءَ انت یا لھتیں سرداراں جنگ جنگ کنگ ءَ انت. سرداری جنگ ساری ءَ بوتگ کہ سرداراناں وتئی ٹولہ گون بوتگاں مرچیگ ایں جنگ تنظیمی رنگے ءَ دیم ءَ روگ ءَ انت، پہ شہید بوگ ءُ لگورانی سرینڈر کنگ ءَ اے جنگ ھچ وڑا کمزور نہ بوتگ نئیکہ بیت. بلکیں بلوچ قوم ءَ راجی تاکت ءِ رنگ ءَ دگنیا ءَ را اے پیش داشتگ من کسّے زلمانی دیم ءَ سر جَھل نباں اگاں آ پاکستان ءِ ھمرائی ءَ بلوچ راج ءِ ھلاپ ءَ ھمدست بہ بیت. پمیشکہ اے ھبر ءَ کل سرپد بہ بنت کہ بلوچ مریت بلئے ایردستی ءَ کبول نہ کنت بے شرپیں زندے گْوازینگ ءَ ساجو نہ بیت۔
دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
