بْراس گھارانی آھنیں پَلّ اَنت
ماھکان بلوچ
دی بلوچستان پوسٹ
بْراس (BRAS)ءِ نام ءَ ھم سَنتّی ءُ تِپاکی ءِ نوکیں بْرمش ءُ چیدگے دیم ءَ آتک تَہ پَژمُرتگیں دِلانی بے چاڑیں ھُلّاں گرکے جَت ءُ ھَر پاند ءَ اُوستانی نازینک اَلھان اَت کہ بْراس گھارانی آھنیں پَلّ اَنت.
اے دْمان ءَ من ءَ وتی دزگھار کیگد ءِ ھَبر سک گیر آھگ ءَ اَت کہ آئی مُدام گوں من ھمے گُشت مئے درد ءُ دور ، مَرک ءُ زِند ، نُکس ءُ نَپّ یَک بَلے ما پَرچہ یکمُشت ءُ یَک سَنگر نَہ بَہ اِیں. دُژمن ءَ زانہ کُجام روچی اے گُشتگ کہ شُما وت ماں وت ھمدست ءُ تِپاک نَہ اِت شُمئے لوگ ءُ گِداناں مان نداراں، شُمئے زھگ ءُ پَرزنداں شھید ءُ زِندانی نَہ کن آں. اے آس مارا کُلّاں یَکیں پئیم ءَ سوچان اِنت گُڑا پَرچہ ما پَہ اے آس ءِ توسگ ءَ یَکمُشت نَہ بَہ اِیں.
چَہ اے بْرمش ءِ تالانی ءَ پَد من ءَ ھِچّ وڑا تاھیر آھگ ءَ نَہ اَت، کاردام ھم نیست اَت کہ کیگد ءَ مِستاگی بِہ گِراں بیا تی کَولانی سَر مرچی پْرشتگ. ھمے پئیم روچ مَدان، مَدان ءَ بیگاہ ءِ کُٹ ءَ سر ءَ چَگل دَیان اَت کہ ناگھاں گوانکو ءِ توار ءَ پَچدْرھینت……
من گوانکو چِست کُت چارت داں گُلندامیں کیگد اِنت…. ھاھاھا…… من مِستاگ گیپت نَہ گیپت من ءَ گیپت ئے. من وھدے گوانکو چِست کُت کیگد ءِ بِچکندگاں من ءَ ساری ءَ مِستاگ گیپت ءُ موہ نَہ دات کہ من بِہ گُش آں کیگد ترا ھیر اِنت مرچی تی پُل ریچیں بِچکند نَہ بُر اَنت، چُش کہ کیگد ءَ پیسر ءَ دْراھینت،
ماھو ھال کن تو ھبرے ءَ سرپد ءِ کہ منی ھَمُک روچیں ھَبرانی سر پْرشتگ ءُ ھمدستی ءِ گِروک ءَ شَھم اِتگ. من گُشت اَو کیگد سرپداں ،بَلے بھتاور تو مِستاگ ءِ گِرگ نئیل ئے. گوں اے ھبر ءَ ھَوار کیگد ءِ بچکنداں پَد ءَ چو بَشّی جَمبر ءَ گْرندگ بِنا کُت…… گُشی ماھو! نوں شَپ کَپتگ پَہل کن من باندا کاھاں تی مھر چَکاریں دیوان ءَ گُڑا اے بابت ءَ شَرّیں نِند ءُ نْیادے کن اِیں.
من گُشت شر کیگد جان بیا کہ ترا ھُدا وند پَہ شات ءُ گَل بِیاریت…… شر اللہ تی نِگھپان بات…..
کیگد… تی ھم ماھو……
چَہ کیگد ءِ ھال ءَ پَد من ءَ ھم وشّی آں وتی شار ءَ مانپُوشتگ اَت ءُ دِل ءَ ھَزاراں جُست چُوڑ کشّان اَت. اے نواب ءُ میر، سردار زادگ کہ وت ءَ راجی جُھد ءِ درد وار ءُ کماش گُش اَنت گُڑا پرچہ چہ وتی مَندوستی ءِ دُو سَریں کورچات ءَ دَر نَہ کپ اَنت ءُ راستی ءِ مَنّاک ءَ نَہ دَینت داں بلوچ راج چہ اے مانگیشتگیں جاوراں بِہ تْرھیت ءُ رُژناھیں باندات ءِ مُراداں بِہ بیت.
چیاکہ اے ھبر چہ جنرل اسلم بلوچ ءِ شھادت ءَ پَد مُدام منی بالاد ءَ مان اَڑھتگ ءُ کُنٹگ جَنت کہ اُستاد کئے بوتگ؟
پَہ واجہ بْراھندگ ءُ ھیربیار ءِ نِگاھاں اُستاد پاکستان ءِ بیرکدار بیتگ….. یا نَہ؟
اگاں نَہ ،گُڑا چَہ اے راستی ءَ چَمّانی بَند کنگ پرچہ؟
پمشکا من گوں وتی نابِزانتی ءَ اے ھبر ءَ گُش آں کہ چرئے ھبر ءَ من ءَ بِل، بلکیں سرجمیں راج ءِ دِل ءَ ھَزاراں جُست پَہ پَسّو ءِ ھاترا مَھتل اِنت.
اے ھبر ءَ من بِہ گُش آں یا مَہ گُش آں، واجہ بْراھندگ ءُ ھیربیار مَنّ اَنت شر نَہ مَنّاں اُستاد ءِ کِرد راج ءُ کَوم ءِ دیم ءَ تھارونکیں شپاں چو چاردھی ماہ ءُ لسّھیں روچ ءِ بْرانزاں پَدّر اِنت کہ اُستاد کئے بوتگ ءُ پہ کئے ءَ نْدر بیتگ…….
گُڑا ما پَرچہ؟ وتی زھروریں لیڑھّ ءِ مَھار ءَ نَہ ژَپّیں کہ چہ راستی ءَ سر گْوز مکن. اگاں ما وت ءَ راج ءِ درد وار ءُ کَوم ءِ رھشون گُش اِیں گُڑا اے مئے راجی ڈُبّہ ءُ زمہ واری اَت کہ چہ چِست ءُ اِیرانی ھنکین ءَ دَر پہ اُستاد ءُ آئی مَلّیں سنگتانی نام ءَ کہ دُژمن ءِ دست ءَ شھید بوتگاں وتی راجی جَزبگ ءُ لیکّھی سْیادی دَرنگاز کُت اِیں، بَلے بَژن ھزار بَژن کہ اَنگت مَندوستی ءِ ساھگ مئے سر ءَ ساچان اگاں نَہ پہ اے دابیں کُربانیانی گِندگ ءَ مئے ھِینک نَہ پْرشتگ ءُ دیدوک چو نِزور نَہ اَنت. اَو چُش بوت کنت زاھر ءَ ساپ ءُ باتن ءَ زنگ بَستگ…….. بَلے پد ءَ ھم تَند بَستگیں زنگانی پَلگارگ مَئے کار اِنت کہ چِتور پَلگارگ بنت، اے گْواچِنیں ھبرے کہ پہ ایشی ءَ راجی جزبگ ءُ راجی مھر ھَژدری اِنت، اگاں نہ پہ نام کِسّہ وت ءَ مانا نَہ کنت.
بِہ گِندئے منی اے دوھیں دانک پَہ سرپدی ءِ دَیَگ ءَ ناسرجم اَنت بَلے پہ کسّے ءِ دِل آزاری ءَ ھم نَہ اَنت، چیاکہ راستی وت چو آدینک ءَ پَلگار اِنت. من نہ، بلکیں توامیں راج اے ھبر ءِ پُشدر ءَ جیڑگ ءَ اِنت کہ راستی ءِ بیرکدار کئے اِنت. پمشکا من یکبرے پد ءَ گُش آں بْراس گھارانی آھنیں پَلّ اَنت. اگاں ما وتی مَندوستی ءِ زھرگ آپ نہ کُت باندا گِلگ پہ کسّ ءَ پَشت نَہ کپ اِیت، چیاکہ بلوچی ءَ گُش اَنت “کور ءِ دْپ بَندگ بیت بَلے کَوم ءِ دْپ بَندگ نَہ بیت” پمشکا مارا سرجم ءَ بلوچ بُوّگی اِنت ءُ اے جُھد دیم ءَ بَرّگی اِنت. ایرھت گوں واجہ جی آر مُلا ءِ اے پِربند ءَ
مئے ساہ اِنت بلوچستان مئے جان اِنت بلوچستان
مئے زِرد ءِ ھَمُک درد ءِ، دَرمان اِنت بلوچستان
میراس نہ اِنت میر ءُ، سردار ءُ نوابانی !!
جَھگیر پہ وتی سولیں بَچّان اِنت بلوچستان
