براس اِنت راج ءِ اوستانی چراگ ۔
مُھتاج بلوچ
دی بلوچستان پوسٹ
ھما مردم وتی منزل ءَ الم سر بیت کہ آئی اوست ءُ اُمید ءُ چم وتئی پاداں سک بنت، وتئی درد ءُ گماں وت بڈا کن اَنت ءُ دیم پہ منزل ءَ جُنز اَنت ۔ اے گپ ءَ ما ھچ پدرد ءُ کُھتیگ مہ بئیں کہ مارا در کوم ءُ انسانی ھکانی پد جنوکیں گل کِمار نہ کن اَنت، پرچا کہ اے پند مارا وت بُرّگی اِنت ءُ وتی ٹپ ءُ تراول وت ملم کنگی اَنت۔ دانکہ ما وتئی سرزمین ءِ سر ءَ زورگیریں لشکر پہ پد کنزی ءُ تچگ ءَ لاچار نہ کُتگ در کوم ھچبر مئے گپ ءَ گوش نہ دار اَنت ءُ مارا پہ آجوئی ءَ کُمک نہ کن اَنت ۔
اگاں ما گلام بوتگیں راجانی راجدپتراں بچار اِیں گڑا اے گپ ءَ ما شری ءِ سر ءَ پوہ بئیں ءُ دیم ءِ روگ ءِ ھاٹیگ بیت ۔
استاد جنرل اسلم بلوچ ءِ ھم وتی کلوھے تہ ءَ ھمے سکین ءَ دیگ ءَ اِنت کہ آجوئی جنگ ءُ آجوئی ءِ گرگ ئے واستہ ھیا ءُ گیرت لوٹ اِیت ناکہ نام درآرگے جُھد ءَ بکن ، بلکیں نام چہ کرد ءَ رس اِیت دانکہ کسے ءَ کرد مہ بیت آئی ءَ نام ھم نہ بیت ۔
جنرل اسلم بلوچ دگہ جاھے ءَ گوشگ ءَ اِنت کہ وھدے ما کوہ ءَ شُتگ اِیں پہ ڈیھ ءِ آجوئی ءِ واستہ گڑا مئے ھمراہ یازدہ مردم بوتگ اَنت ءُ مارا سِتک نہ بوتگ کہ باندا دگہ یازدہ مردم پاد کیت ۔
بلے مرچی استاد ءِ بے دروریں جُھد ءُ ھید ریچی ءِ سوب ءَ بلکیں یازدہ لک پاد آتکگ پہ سرڈگار ءِ پھریزگ ءَ ۔ پرچا کہ آ نہ جُک اِتگ اَنت ءُ پد نہ کِنز اِتگ اَنت چہ دژمن ءِ بیھار ءُ تُرس ءَ، ءُ چہ وتئی مَرگ ءِ تُرس ءَ۔ اے ھما راہ اِنت کہ ھون ءُ ھون ریچی بیت ءُ ھزاراں رھبر نمیران بیت، دگہ ھزار رھبر پاد کئیت۔ دانکہ ھما روچ ءَ کہ ما وت واجہ ءُ وتی منزل ءَ سر نہ بوتگ اِیں ۔زی بالاچ مری ءُ اکبر بگٹی ءُ گلام مھمد ءَ کربانی دات ءُ مرچی جنرل اسلم بلوچ ءَ گوں سنگتاں، ءُ دگہ ھزاراں ھم تیار اِنت پہ کربانی دیگ ءَ ۔
استاد ءُ آدگہ سنگتانی گران بھائیں جھدانی برکت ءَ مارا مُز “براس” ءِ شکل ءَ رست۔ دیم ءَ تر ءَ سنگتانی جُھدانی مُز بلوچ راج ءَ آجوئی ءِ شکل ءَ رسیت بلے با شرطے کہ ما چکپروش مہ بئیں ءُ دیم ءَ بہ جُنز اِیں، اگاں ڈیھ ءَ را مئے ھیشیں سرانی پکار بوت ھم پہ سرانی ندر کنگ ءَ چک ءُ پد مہ بئیں۔
نوکیں اوست ءُ نوکیں چراگ ، براس ، داں ابد بہ مانات ۔
ڈیھ ءِ کُلیں شھیداں سلام ۔
آزات بلوچستان زندگ بات ءُ بلوچ راج یکجاہ ءُ یک دست پاد ءُ یزیدی لشکر ءَ شکست نسیب ءَ بہ بات ۔
دی بلوچستان پوسٹ: اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
