کیچ کے حلقہ پی بی 47 تھری میں جمعرات کو ہونے والے ضمنی الیکشن کا حتمی نتیجہ الیکشن کمیشن نے جاری کر دیا، جس کے مطابق بی اے پی کے امیدوار لالا رشید کو کامیاب قرار دیا گیا ہے۔
الیکشن کمیشن کے جاری کردہ نتیجے کے مطابق باپ کے لالا رشید 9240 ووٹ حاصل کر کے کامیاب قرار پائے۔ جب کہ بی این پی کے میجر جمیل دشتی 5857 ووٹ کے ساتھ دوسرے اور نیشنل پارٹی کے فدا دشتی 3039 ووٹوں کے ساتھ تیسرے نمبر پر رہے
واضح رہے کہ گذشتہ رات 60 میں سے 56 پولنگ اسٹیشنز کے نتائج آنے تک بی این پی کے میجر دشتی کو پانچ سو سے زائد ووٹوں کی برتری حاصل تھی۔ البتہ ابھی حتمی نتائج آنا باقی تھے۔ جب کہ بی این پی کے سربراہ اختر مینگل نے اپنے ٹوئٹر اکاؤنٹ سے رات گئے فتح کا اعلان کر دیا اور کیچ کے عوام کا شکریہ بھی ادا کیا۔
جمعہ کی صبح البتہ الیکشن کمیشن نے حتمی نتیجہ جاری کر دیا جس کے مطابق بی اے پی کے امیدوار کامیاب قرار پائے ہیں۔
