شد اڑتالی کیمپ ءُ گارءُ بیگواهیں بلوچانی کہول : دومی بہر
طیبہ بلوچ
دی بلوچستان پوسٹ
وہدے کہ درداں زُبان نہ بیت گڈا انسان بے توار بیت، ہمے رنگ ءَ گار ء ُ بیگوا یں مردمانی کہول ودار ءِ آس ءِ تہا سُچگءَ انت، ء ُ شالءِ مزنیں سارتی ءَ پہ امیتےءَ شال اِش مانپوش اِتگ اَنت ء ُ شد اڑتالی بُنجَلءَ نشتگ اَنت۔ اے ودار بَرجاہ اِنت ء ُ وہد آئیءَ کماہان انت۔
زاکر مجید ئے مکہیں مات ءَ 9 سال اِنت کہ وتی بچ ئے ودارءَ اِنت۔پہ ازابی وتی روچ ء ُ شپاں گوازینگءَ انت۔سال 2009 ءَ زاکر جان آوار جنگ بیت،چہ ہما روچاں بگر داں مرچی اے بے وسیں مات ءَ وتی نُھ ایں سال پہ وابی ء ُ آرامی گولیاں گوں گوازینتگ انت بلے انگتءَ بے تاہیر انت ،آئی ءِ هیال هم زاکرءَ گوں بندیگ انت ء ُ مدام جست کنت کہ، کئے اِنت منی اے نُھ ایں سالانی ودارءَ آسر بہ کنت ء ُ من ءَ تاہیرے بہ بکشاہیت۔ بلے تنیگہ اے ودارانی آسر کنوکے در نہ کپتگ۔
1 مارچ 2015 ءَ ظہیر احمد چہ مستونگ ءَ آوار جنگ بیت کہ انگت بیگواہ انت، ظہیر ءِ پیریں مات ھم مرچی اے بیگواہانی بُنجلءَ زہر شانی ءَ پہ نشتگ،پہ وتی چک ئے مہراں گوں مرچی ہمے پیریں مات دگانی دیمءَ سارتی ئے سرا همک زہر شانی آں گوں ہوار اِنت۔
سُہیل عبدالطیف 10 مارچ 2015 ءَ کراچی ئے دمگ لیمارکیٹ ءَ چہ آوار جنگ بیت ، سُہیل یک دینی وانگجاہے ئے نودربرے۔ بی بی نسیمہ گوں وتی کسانیں جنکیں زہگ ءَ کیچ ءِ دمگ بلیدہءَ چہ کیت ء ُ پہ وتی تاسپیں بچ ئے یل کنگ ءِ اوستءَ شُد اڑتالی بُنجلءَ پہ اومیتےءَ نند اِیت۔ کہ بگندے کسے منی ارس ء ُ درداں سرپد بہ بیت۔آهانی گشگ اِنت سہیل ئے بیگواہیءَ پہ سرجمیں کہول مرچی ازابی ئے تہا گوزگءَ انت۔
پہ گار ء ُ بیگواہیں مردمانی ہاتراچست بوتگیں ہمک توار ھم گار ء ُ بیگواہ کنگ بنت ، اشی ئے زندگیں دَرور جیئند، حسنین ء ُ امین عبداللہ انت، کہ شد اڑتالی بُنجل ءَ آہگ ،نشتگیں کہولانی دردانی مارگ ءُ وتی کنگ پہ اے سئے ایں نودربراں ہمے آسر بوت۔
30نومبر ءِ شپ ءَ جیئند ء ُ حسنین گوں وتی پت عبدالقیوم ءِ ہوار چہ وتی لوگ ءَ چہ آوار جنگ بوت اَنت۔ ہمے شپ ءَ نودربر امین ھم چہ شال ءَ آوار جنگ بیت، جیئند ءِ کہول ءَ وتی زہرشانی انگت برجاہ داشتگ بلے جیئند ء ُ حسنین انگت گار انت۔ جیئند ءِ گُہارمدام گریت ء ُ گش اِیت کہ بس انت نو ما چدء ُ گیش درد برداشت کُت نکن ایں۔
5 دسمبر ءَ جیئند ء ُ آئی ئے برات ءِ بیگواہی ئے ھلاپءَ یک روانکے کشگ بوت آہانی لوگاں بگر دانکہ پریس کلبءَ ۔ ایدگہ روچءَ ظریف، چنگیزء ُ اورنگزیب ھم چہ کوئٹہ ئے مین بازار ءَ چہ آوار جنگ بوت اَنت۔ اے سئیں نودربر ھم گارء ُ بیگواہیں نودربرانی توار اِتنت بلے مروچی وت گار کنگ بوت انت۔ اے توارنی گار کنگ ءِ یک مرادے اش اِنت کہ زوراکی ءَ بہ گندء ُ زبان ءَ بداراگاں نہ تئی توار بند کنگ بیت۔ بلے وتی توار ئے چست کنگ ء ُ آذاتی انسانی ھکّانی بہرے ء ُ بژ ن کہ مرچی انسانی ھکّانی گَل بازیں چیزانی گندگءَ پد ھم بے توار انت۔
ہمے ڈولءَ غلام فاروق ءِ ہپتاد سالی ئیں مات اے دگہ ماتانی ہواری ءَ سارتی ءِ سرا شُد اڑتالی بنجلءَ ھم نشتگ۔ 2 جون 2015 ءَ غلام فاروق چہ حیدرآباد ءَ چست کنگ بوتگ کہ انگت گار انت ء ُ آئیءِ مکہیں مات آئی ءِ مہرانی ساھگ ءِ وداریگ انت۔
ھمے پیم ورنائیں عبدالرشد چیریں ادارہانی دست ءَ چہ جناح روڈ کوئٹہ ءَ 27 نومبر 2012 ءَ آوار جنگ بیت کہ انگت گار اِنت۔آئی ءِ مات نو پیری ءَ نزور ترّینتگ بلے درد باز پرماانت، مرچی آ شُداڑتالی بُنجلءَ اتکگ کہ بگند ئے منی آجزی ءَ کسے بہ گِند اِیت ء ُ منی توارء َ گوش بدار اِیت۔ ایدگہ کہولانی ماتانی وڈا اے بے وسیں مات ءِ ھم یکیں لوٹ اِنت کہ منی چمانی چراگ یل کنگ بہ بیت۔ یا آ آمیدگس ءَ آرگ ء ُ پیش کنگ بہ بیت۔آئی ئے بیگواہی ئے جیڑہ دیمءَ آرگ بہ بنت۔
دگنیا ئے آمیدگس پہ گناہ ء ُ بے گناہانی یک پیسلہ یے گیشّینگءَ ٹہینگ بوتگ انت۔ بلے پاکستان ءَ مردماں بہ کُش، بہ بر، دہ دہ سال بیگواہ کن کس نزانت کہ زندگ انت یا کہ نہ، لاشاں جنگلاں دور بدئے۔ بلے آمیدگس ءَ ھچ کاراں گوں کار نیست۔
واجہ کمال : اینکس تو سرپدئے کہ اے کہولاں چونہا پہ ترا یک امیتے داشتگ۔ ترا وتی پت ء ُ برات لیک اَنت ء ُ تو ھم بائید اَت کہ آ وتی چک ء ُ مات بہ کُتین اَنت۔ بلے بژن اِش انت کہ تو ھچ اشاں گندگءَ نئے، واجہ ما گیس ء ُ آپ نہ لوٹاں، تو ھم بِل گیس ء ُ آپانی جیڑہاں ادا کمے بچار کہ انسانی ھکّانی ڈُکالی انت۔ اے آجزیں ماتانی آہاں گوش بدار ، اے چکاں وتی چک بہ لیک، اے ارسان ءَ کمے بچار، اے درداں کمے گوش بدار .
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
