کامریڈ ھسام بلوچ – نودان نود بلوچ

کامریڈ ھسام بلوچ

نبشتہ کار: نودان نود بلوچ

دی بلوچستان پوسٹ

مرچی من وتی نَدّ ءَ پہ وتی اُستاد ءِ واستہ دو لبز ءِ نبشتہ کنگ ءَ چِست کُرتگ نہ زاناں منی نَد چے کد اِنساپ کنت، نہ زاناں چہ کُجا بندات بکناں ءُ کُجا چہ آسر بکناں. بَلے مرچی منی تہءِ زِرد من ءَ انچوش نااِلاج کنگ ءَ اِنت کہ من وتی اُستاد ءِ واستہ چیزے نبشتہ بکناں. چوناھیا دنیا ءِ تہءَ ھزاراں مردم ودی بوتگ کہ وتی مرگ ءَ چہ پد نمیران بوتگ اَنت ءُ دگہ ھزاراں مردم بوتگ اَنت کہ آ وتی زند ءِ وھد ءَ ھم مردگ ھساب بوتگ اَنت. دنیا ءِ تہءَ اگاں مرچی ھما مردمانی نام زندگ اَنت گُڑا آھاں وتی زات ءِ واستہ زندگ نہ بوتگ اَنت. وتی زاتی پاھدانی واستہ جُھد نہ کُرتگ بَلکینا وتی راج ءُ زمین ءُ انسانیت ءِ واستا جُھد کُرتگ کہ مرچی آھانی نام تاریک ءِ تہءَ زندگ اَنت ءُ ھما مردم کہ پہ وتی زات یا وتی گوں راج ءُ زمین ءَ دھوکہ کُرتگ گُڑا مرچی تاریک ءِ تہءَ مردم آھاں لعنتی یا گَدار ءِ نام ءَ زان اَنت.

مرچی بلوچ تاریک ءُ راج ءِ تہءَ ھم نمیرانیں ءُ گیرت مندیں کامریڈانی کمی نہ اِنت. آ واجہ شھید گلام مھمد، شھید شیر مھمد،شھید لالا منیر بہ بیت یا شھید اکبر ھان، ھیر بکش مری، شھید داکتر منان،شھید رزا جھانگیر بہ بیت یا مرچی پاکستان ءِ زندانی تہءَ بندیگیں چیرمین زاکر مجید، چیرمین زاھد، شبیر بلوچ، ثناءاللہ، نسیر بلوچ بہ بنت. ھمے پرزنداں مرچی پہ بلوچ راج ءِ باندات ءِ واستہ کُربانی دات اِش ءُ انگت دیگ ءَ اَنت. ھمے نرمزارانی تہءَ یکّے منی اُستاد منی کامریڈ منی رھشون ھسام جان اِنت کہ پاکستانی لشکر 15 گوبشان (نومبر) 2017 ءَ ماں کراچی ءَ گوں بی ایس او آزاد ءِ کارگشاد ثناءاللہ، بنجائی باسک نسیر بلوچ ءُ بی این ایم ءِ سنگت رپیک بلوچ ءِ ھمراھی ءَ بیگواہ کنت ئے. تاں روچ ءِ مرچی پاکستان ءِ ازاب جاھاں بندیگ اَنت.

کامریڈ ھسام جان ءِ میتگ مند اِنت. ھما مند کہ آئی ءَ شھید گلام مھمد ءُ شھید داکتر ھالد ءِ وڑیں انسان دوست ودی کرتگ ءُ ھسام جان ھم ھمے مند ءِ پرزند اِنت ھمے ماتیں گلزمین ءِ پزند اِنت.

ھسام جان تاں دھمی مکتب ءَ وتی میتگ ءَ چہ دربارت ءُ پہ گیشیں وانگ ءِ ھاتر ءَ کیچ ءَ عطاشاد ڈگری کالج ءَ داکلی زُر اِیت ءُ ڈیلٹا سنٹر ءَ ھم انگلیش زبان دربارت پد ءَ ھمے سنٹر ءَ زھگاناں وانین اِیت.

چاردہ مکتب ءِ سوبین بوگ ءَ پد کیچ مزن شھدربرجاہ ءَ داکلی زُر اِیت.گُڑا ھمے سال ءَ اِستان ءِ زُلم ءُ زوراکی گنتِر تُرند بنت گُڑا ھسام جان کیچ ءَ یل کنت ءُ کراچی ءَ روت ھمود ءَ کراچی یونیورسٹی ءَ داکلی زُر اِیت وتی وانگ ءَ بندات کنت.

ھسام جان وھدے بی ایس او آزاد ءِ بیستمی کونسل سیشن ءَ بُنجائی مجلس ءِ باسک زورگ بیت گُڑا شپ ءُ روچ گَل ءِ کاراں گوں دزگٹ بیت، روچے اے ھنکین ءُ روچے آ ھنکین پہ سنگتانی تربیت کنگ ءُ سنگتاناں بلوچ جھد ، بلوچ راج ءِ بزگی ءُ لاچاری، دنیا ءِ سیاست ءُ پاکستان ءِ زُلم ءُ زوراکیانی سر ءَ سنگتاناں سرپدی ءِ داتگ کہ مارا سیاسی سنگتاناں مدام اے چیزانی بابت ءَ گوں شریں وڑے ءَ سرپد بوگی اِیں ءُ مدام سنگتاناں کتاب ءِ وانگ ءِ سوج داتگ کہ کتاب سَک بوان اِت، اگاں ما کتاب مہ وان اِیں گُڑا نہ ما وت ءَ بی ایس او سنگت گُشت کن اِیں ءُ نہ ما وتی منزل ءَ سر بوت کن اِیں.

من ءَ یات اِنت کہ یک روچے ھسام جان ءَ من ءَ هال کُرت سنگتانی ءُ علاقہ ءِ ھال ءِ جُست کنگ ءَ پد من ءَ ھمے گُشت ءِ کامریڈ وت ءَ سک بہ سمبال اِت چہ پاکستانی چانوگِراں پرچاکہ راج ءِ بلاھیں اُمیت گوشما بندوک اَنت اگاں ما سلامت بہ بہ اِیں گُڑا اَلّم گَل ءِ کار بنت اگاں ما تاوان وارت گُڑا گَل ءِ کار اوشت ءِ آماچ بنت ءُ یک گپے من کدی بے ھیال نہ باں کہ مدام من ءَ کتاب ءِ وانگ ءِ درس ءِ داتگ، ایوک ءَ من ءَ نہ بلکینا ھرچ سنگتے ءَ را کتاب ءِ وانگ ءِ درس داتگ اَت ءُ ھال ءُ اھوال ءَ پد اَلم اے ھم جُست ءِ کُرتگ کہ تو کجام کتاب ءِ وانگ ءَ ئے ءُ ھمے کتاب ءِ نبشتہ کار کَے اِنت ءُ تو ھمے کتاب ءَ چہ چِنکس سرپد بوتگ ئے اگاں من ءُ تو دیم پہ دیم بوت اِیں گُڑا اَلم من ءَ ھمے کتاب ءِ بابت ءَ سرپد بکن. ھسام جان ءَ مدام سنگتاناں کتاب ءِ وانگ ءَ پد ھمے کتاب ءِ بابت ءَ جُست ءِ کُرتگ کہ باریں سنگت ءَ اے کتاب چیکد سرپد بوتگ گُڑا اَلّم سنگتانی دل ءَ پہ وانگ ءَ ھُب بوتگ ءُ دومی گپ مارا مدام انگلش کتاب ءُ زبان ءِ وانگ ءِ ھم درس داتگ کہ مارا اَلّم انگلش کتاب ءُ زبان وانگ ءُسرپد بوگی اِیں پرچاکہ انگلش زبان میان اُستمانی زبانے مارا دربرگی اِنت دانکہ ما وتی توار ءَ ھمے زبان زریعہ ءَ دنیا ءَ پہ آسانی ءَ سر کُرت بکن اِیں.

مرچی بی ایس او آزاد ءُ بلوچ راج ءِ تہءَ چُشیں ھزاراں پرزند است اِنت کہ وتی واھشت کُشتگ اَنت پہ وتی راج ءِ باندات ءَ ءُ ھر وڑیں کُربانی ءِ واستہ ساڑی اَنت.

مرچی بلوچ راج یک ھنچیں زوراک ءِ ئِے گلام اِنت کہ آھرا گوں کتاب ءُ کلم ءَ سک نپرت اِنت ءُ راستی ءَ چہ زبھر اِنت. پمیشکا مرچی ھسام جان گوں سنگتاں پاکستان ءِ زندان ءَ بندیگ اِنت .ھسام جان ءِ میار همے بوتگ کہ آئی ءَ مدام انسان ءُ انسانیت ءِ گپ جَتگ ءُ بلوچ ءُ بلوچستان ءِ درد ماراِتگ ءُ گوں وتی سرڈگار ءَ مھر بوتگ . کتاب ئِے وتی رھشون، کلم ئِے وتی توار کُرتگ ءُ پاکستان چو کجا وش بیت کہ بلوچ راج ءِ پرزند بوان اَنت ءُ وتی راجی بزگی ءَ سرپد بہ بنت.

اے یک تچکیں گپے کہ دنیا ءِ تہءَ کُجام کہ راجے ءَ ھک ءِ یا آجوئی ءِ گپ جتگ گُڑا ھما زوراکیں کبزہ گیر ءَ ھمے راج ءِ توار ءِ ھاموش کنگ ءِ واستہ ھما راج ءِ نوجوانانی گار ءُ بیگواہ کنگ ءَ بِندات کُرتگ ءُ آھانی ژانگُلیں کُنٹ ماں چَگّل دیگ بوتگ اَنت.

مرچی اے وڑیں بازیں درورے مئے دیم ءَ اِنت امریکہ گوں ویتنام ءِ نوجواناں کنت یا پاکستان گوں بنگلہ دیش ءِ پرزنداں کنت، مرچی یکبرے پد ءَ پاکستان گوں بلوچ پزنداناں ھمے زُلم ءَ کنگ ءَ اِنت یکدیم ءَ بلوچ نودربرانی شھید ءُ بیگواہ کنگ ءَ اِنت دومی دیم ءَ وانگجاھاں بند کنگ ءَ اِنت کہ بلوچ نوجوان چہ وانگ ءَ زبھر بہ بنت ءُ پاکستان اے ھم زانت کہ اگاں بلوچ ورنا بوان اَنت گُڑا کدی منی بادشاہی ءَ نہ منّ اَنت پمیشکا مرچی مئے وانگجاہ پاکستانی بُبجل جوڑ بوتگ اَنت ءُ بلوچ نودربر تُرس ءِ آماچ بوگ ءَ اَنت.

مرچی پاکستان بلوچستان ءِ تہءَ یک آس ءُ آسگواری یے بندات کُرتگ مرچی چُشیں گِسے نیست کہ آ پاکستان ءِ زُلم ءِ آماچ نہ بوتگ یا بوگ ءَ نہ اِنت. مرچی پاکستان ءَ بلوچ راج ءِ زمین پہ بلوچ راج ءِ واستہ تنک کُرتگ ءُ بلوچ راج ءِ زبان، دود ءُ ربیدگ ھم ھتم بوگ ءَ اِنت.

مرچی بلوچ راج زھنی نادرُاہ جوڑ بوگ ءَ اِنت ءُ ھمے زُلم ءُ زوراکیاں ابید پاکستان انگت بلوچستان ءِ تہ ءَ مرچی بے سوب اِنت پرچاکہ مرچی ھمے ڈکالیں ءُ سُتکگیں زمین ءِ سر ءَ ھزاراں وانِندگیں بلوچ پرزنداں وتی لانک پہ آجوئی ءَ بستگ مرچی ھزاراں بلوچ پرزند گوں ھسام جان ءِ کاروان ءَ بندوک اِنت ءُ ھسام جان ءِ پشت کپتگیں کاراں منزل ءَ سر کنگ ءَ اَنت ءُ ھزاراں پرزند مرچی ھمے کاروان ءَ ھوار بوگ ءَ اَنت.

مرچی پاکستان تُرس ءِ آماچ اِنت کہ من بلوچ راجی جُھد چوں ھلاس بکناں پمیشکا مرچی پاکستان چین، سھودی عرب ءُ ایدگہ ملکانی کِرّ ءَ پِنڈک ءَ اِنت ءُ بلوچ راجی مڈّیانی سود ءَ جنّگ ءَ اِنت بَلے بلوچ راجی مڈّی پاکستان ءِ دپ ءَ جور بنت انشاءاللہ.