ماہ رَنگ – زِرگْوات بلوچ

ماہ رَنگ

زِرگْوات بلوچ

دی بلوچستان پوسٹ

شال ءِ بَرپیں دْمکاں گوں دِرتَگیں سَواس آں کسان سالیں ماہ رنگ چَہ زِندمان ءُ کسانی ءِ لیب ءُ گْوازی آں بے ھاجت پہ وتئی بیگْواھیں پت ءِ شُھاز ءَ سَربَتگ. بام کہ ساپی دَنت ءُ سُھب ءِ شِکتگیں بْرمش تالان بَہ اَنت ماہ رنگ چَرئے ھَبرءَ پَھک بے سماء اِنت کہ ماتی منا چاہ یے گوں سِرتَگیں نان ءَ بِہ دئے کہ من اَرزبَند کن آں ءُ پہ وانگ ءَ رَواں، بَلکیں ماما ءِ بُنجل ءَ آئی ھَمُک سُھب گوں ھمے اُمیت ءَ پَدی بیت کہ بگندئے مرچی کلمانٹیں اَھد ءِ مورمانٹیں بُت پمّن ھمے پَیام ءَ سَر کن اَنت کہ مگریھ تئی اَبّا یلہ بیت.

بَلئے! کئے اِنت؟ کہ اے زَنگ بَستگیں کُبل ءَ بوج اِیت ءُ ماہ رنگ ءِ آچِش اِیں زِرد ءَ پُلّانی بوہ ءُ باسیں تاھیریے بَکشّ اِیت….. نہ گِنداں کس. چیاکہ ماہ رنگ ءِ داب ءَ اَنسہ، شَمسُل ءُ دِگہ ھَزاراں گْونڈل اَست کہ پہ وتئی چَمروکیں کماش ءُ نوگُلّیں بْراتانی وداریگ اَنت کہ کائینت ءُ مئے ویرانگیں زِرد ءِ جھان ءَ چو گُلباگ ءَ سمبھین اَنت.

ھمے ودارانی تَہ ءَ شپ روچ ءُ روچ شپ بَہ اَنت بَلئے ماہ رنگ اَنگت گوں وتئی دزگھاراں ماما ءِ بُنجل ءُ شال ءِ سارت ءُ بَرپ ریچیں موسم ءَ اُمیتانی آس روک کُتگ ءُ نِشتگ کہ نام گیپت اِیں آمیدگس ءِ گُنگّیں پاگواجہ وتئی گُنگّی ءَ زُبان یے بِہ دنت ءُ مئے لھڑیں دِل ءِ چیھانٹاں پوہ بِہ بیت. نزاناں…… چیاکہ اے بے بُنشتیں اِستان ھما روچ ءَ کہ جوڑ بوتگ جمہوریت ءِ پوشاکانی تَہ ءَ رَستریں پوج ءِ ھاکمی بَرجاہ اِنت. اِدا کسّے کہ گپ جنت آ، آھگی جندے ھبر نہ اِنت. بَلکیں زُبان آئی وتئی ءُ گپ دگرے…..

بلوچی ءَ گْوش اَنت چمداری کُچک ءَ سَگ اِتگ اے ھما سَگّ اَنت کہ پہ وتئی چَرپ ءُ چَکانٹیں دْپار ءِ ھاترا مَدام واجہ ءِ سَواس آں سرا ءُ سُجدگ یے کن اَنت. اے بلوچ ءِ دروشم ءَ دُژمن ءِ ھر دانکانی پَد ءَ پہ دُمب سُرینگ ءَ چار دست اَنت. پمشکہ چرایشاں گِلگ کنگ بے مانا بیت. چیاکہ دُژمن دائم ھمے لوٹ اِیت کہ من ترا کُجا نہ کُجا ایردستی ءِ آسیاب ءَ بِہ ڈَلّاں ھورت ءُ ھارت بکن آں داں ترا سماء مہ کپ اِیت، بَلئے مارا وتئی جُھد ایرموش کنگی نہ اِنت.

اَکوام متھدہ ءِ ھما اَدارگ United Nations Declaration Of International Human Rights پمے ھاترا اَڑ دَیَگ بیت کہ پہ کُل بنی آدم ءِ انسانی لوٹ ءُ ھَکّانی پاسپانی ءَ نیکّیں مِستاگ یے بیت بَلئے پہ بلوچ ءَ نہ! چیاکہ دَنیگت اے اَدارہ پہ بلوچ ءِ انسانی اُگبالانی پَد جنئگ ءُ پھازگ ءَ بے سوب گِندگ بیت.
اگاں آئی ءَ وتئی پَرز ءِ پیلّہ کنگ بِزانتیں مرچی اے بَرپ ریچیں موسم ءَ ماہ رنگ، اَنسہ، شَمسُل ءُ آ دگہ گْونڈل چہ وانگ ءِ بَدل ءَ پہ وتئی بْرات ءُ کماشانی آجوئی ءِ ھاترا وابیں مارِشتانی ڈانگرینگ ءَ مَردم پہ مَردم پَنتاک بھر نہ کُت کہ باندا مئے روانک ءَ ھَوار بِہ بَہ اِت. بلکیں آ گوں وتئی ھَمکدیں کیگداں ھَمُک سُھب مکتب ءَ پہ وانگ ءَ رَؤگ گِندگ بوت. بَلئے بَژن کہ ایردستی ھما اِلّت اِنت کہ پہ لبّ ءُ مَتاہ تئی وتیگ آں ھم دُژمن ءِ ھمکوپگ کنت.
اے کار ءَ ھما کس کنت کہ چہ زانت ءُ زانگ ءَ زِبھر ءُ کور پھم اِنت. پہ آئی ءِ اَگل ءُ زانت ءَ زِندمان ءِ مَستِریں مول ءُ مکسد ھیش ءُ نوش اِنت.
ھماھاں کہ راجی دانش ءُ بودناکی بیت آ کدی پہ رِپک ءُ ھُنر، پہ لبّ ءُ مَتاہ گوں دُژمن ءَ ھمنیاد ءُ دیوان نہ بَہ اَنت کہ توئے واجہ ھَرچی بکن من چو بے زُبانیں ساھگ ءَ سر چَنڈین آں، بلکیں آ دُژمن ءِ دیم ءَ اُوشتیت ءُ راجی توار ءَ بُرز کنت.

مرچی پہ بلوچ راج ءَ ھمے نوبت آتکگ کہ گوں ھماھاں ھَمدست ءُ ھم توار بِہ بَہ اَنت کہ پہ راجی ھَستمانی ءَ ھَر وڑیں بَند ءُ بوگانی بوجگ ءَ ساڑی بیت. اگاں مئے ھمے توار ءَ شال ءِ بالاد جَکسینتگ ھمے توار مارا ماں مْیاں اُستمانی تک ءُ پھناتاں ھم پِرّینگی اِنت داں دُگنیائے ھما وابیں مھلوک جَہہ بِہ سِرّیت ءُ وتئی پَرز ءِ پیلو کنگ ءَ جاڑی بِہ بیت.

اے ڈُبّہ ءُ ذمہ واری ھما راجدربَر ءُ سیاسی گَلانی کوپگاں کئیت کہ وتا بلوچ راج ءِ توار گْوش اَنت. ھمے گامگیج کہ شال ءَ بِنا بوتگ ھمے دابیں گامگیج ءُ توجیل یے ماں مْیاں اُستمانی دَر ءُ دْمکاں بِہ سازیں داں دُگنیا مجبور بِہ بیت ءُ مئے ھبر ءَ گْوش بِہ دار اِیت. اے دَرگت ءَ سندھی ءُ پَکتون راج ءَ گوں مئے ھَمدستی ھم مزنیں اَرزش یے کرزیت کہ دلگوش ءُ ھیال گْور کنگ لوٹ اِیت۔