ماہ رنگ ھم شُد ھرتالی بُنجلءَ نیشتگ
نبشتہ کار: فقیربلوچ
دی بلوچستان پوسٹ
منی دیم ءَ یک تامُرے گْوستگ اَت آ تامر بی ایس او آزاد ءِ گْوستگیں بُنجائی مجلس ءِ باسک نسیر بلوچ ءِ زھگ ماہ رنگ جان ئیگ اَت۔ کہ چہ انسان دوستیں مردماں دزبندی کنگ ءَ اَت .مرچی منی ابا ءَ سالے سرجم بوھگ ءَ اِنت۔ انگت بیگواہ اِنت . من باند ءَ ماما ءِ بُنجل ءَ پہ وتی ابا ءِ آجوئی ءِ واستہ پہ شُد ھرتالی ءَ روگ ءَ آں . من چہ شُما دزبندی کن آں ۔شُما بیا اِت بُنجل ءَ منی ھمراھداری ءَ بکن اِت تاکہ منی ابا چہ زندان ءَ آجوہ بہ بات.
مرچی ماہ رنگ جان وتی کستریں بِرات سِنجرجان ءُ وتی مات زبیدہ ءِ ھمراھی ءَ ماں شال ءَ اے سارتیں وھد ءَ پریس کلب ءِ دیم ءَ گوں آ دگہ بیگواہ کُرتگیں مردمانی سیاد ءُ وارسانی ھمراھی ءَ شُد ھرتالی بُنجل ءَ نشتگ ۔ دگنیا ءُ انسان دوستیں ادارگاں گوں دزبندی کنگ ءَ اِنت کہ منی ابا نسیر جان ءَ چہ پاکستانی زندان ءَ آجوہ بکنائن اِت۔ مرچی ءَ چہ یک سالے پیسر بِزاں 15 گوپشان 2017 ءَ گوں بی ایس او آزاد ءِ گْوستگیں مزن کارگُشاد ثناءاللہ بلوچ ، بُنجائی مجلس ءِ باسک اھسام بلوچ ءُ بی این ایم ءِ باسک رپیک بلوچ ءِ ھمراھی ءَ مئے چمّانی دیم ءَ کراچی ءَ چہ مئے لوگ ءَ پاکستانی لشکر ءَ بُرتگ اَنت ءُ انگت گار ءُ بیگواہ اَنت. اگاں منی ابا ءَ ھتایے کُرتگ آھر ءَ ماں کانود جاھاں بیار اِت سزا بہ دئے اِت.
مرچی ماہ رنگ جان ءِ وانگ ءُ لیب ءِ وھد اِنت. بَلے پاکستان ءِ زوراکی ءِ سواب ءَ ماہ رنگ گوں وتی مات ءُ برات ءِ ھمراھی ءَ ماں شُد ھرتالی بُنجل ءَ نشتگ پہ وتی ابا ءِ آجوئی ءِ واستہ. مرچی ماہ رنگ گوں دگنیا ءَ ھمے جُست کنگ ءَ اِنت کجا اِنت شُمئے انساپ ءُ کانود، کجا اِنت شُمئے انسان دوستی؟
مرچی بلوچستان ءِ تہ ءَ چُشیں لوگے پشت نہ کپتگ کہ یک بلوچ پُسگے شھید ءُ بیگواہ نہ بوتگ، ابید چہ کاسگ چٹاں.
مرچی چِھل ھزار ءَ گیش بلوچ پُسگ چہ پاکستان ءِ دست بیگواہ اِنت . بَلے انگت ھمے زُلم ءُ زوراکی برجاہ اِنت. بلوچ راج ءِ پرزنداں ھوار مرچی سندھی ءُ پشتون ھم بیگواہ اَنت.
تاریک ءِ تہ ءَ اے وڑیں زلم نہ بوتگ کہ پاکستان مرچی گوں بلوچ راج ءُ اے دگہ راجانی سر ءَ کنگ ءَ اِنت. مرچی پاکستان ءِ تہ ءَ بے درسیں راجانی سر ءَ پاکستان زُلم کنگ ءَ اِنت ءُ مرچی بے درسیں راجانی ارس چو ھار ءِ آپ ءَ تچگ ءَ اَنت .ھمے ھار پہ پاکستان ءَ یک توپانے جوڑ بیت ءُ مرچی پاکستان سک گَل ءُ شادکام اِنت کہ من زُلم کنگ ءَ آں ءُ دگنیا چاروک اِنت . ھچ نہ گُش اِیت. من ھرچی کن آں منی دل گُش اِیت. اے گپ ءَ پاکستان شری ءِ سر ءَ بِزانت. اگاں دگنیا مرچی ھاموش اِنت. بَلے بلوچ راج کدی ھاموش نہ بیت دانکہ بلوچ راج زندگ اِنت . وتی توار ءَ بُرز کنت. اے کَر ءُ کور ءُ گُنگیں دگنیا ءَ وتی گپ ءَ سر کنت ءُ دگنیا ءَ سرپد کنت ءُ تئی زُلم آسر بیت نوں تئی زُلم ءِ آسر نزیک اِنت.
من بلوچ راج ءُ آدگہ بیگواھیں مردمانی سیاد ءُ وارساں گوں دزبندی کن آں کہ آ ھم وتی توار ءَ چِست بکن اَنت ءُ دگنیا ءَ سرپد بکن اَنت کہ یک زالمیں ڈیھہ ئے ھست آ بلوچ راج ءِ سر ءَ ھپتاد سال اِنت زُلم کنگ ءَ اِنت. اگاں ما مرچی ھاموش بوت اِیں ھچ توار چِست نہ کُرت گُڑا ما کُل ھمے وڑ ءَ بیگواہ بوان بہ اِیں.
بلوچ بیگواھیں مردم آجوہ بات اَنت
بلوچ راج زندگ بات
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
