سینزدہ نومبر، شہید آتا دے
عابد جان بلوچ
دی بلوچستان پوسٹ
بی ایس او آزاد نا قومی سطح غا منوکا فیصلہ ءِ کہ لمہ وطن بلوچستان کن جان ءِ ندر کروکا تیکن ہر سال سینزدہ نومبر ءِ اڈ ایتننگک۔ اندا دے آ بلوچستان نا آجوئی نا جہد اٹ ساہ ءِ صدخہ کروکا تا قربانی تے یاد کرسہ اوتا ہمو جہد ءِ برجا تننگ نا عہد و پیمان کننگک۔
سینزدہ نومبر نا دے ہمو تاریخ نا بابت ٹی ءِ ہرا وخت آ انگریز فرنگی تینا جنگی سازو سامان تیتون بلوچستان آ کوزہ کننگ کن جلہو کرے تو بلوچ قوم نا راہشون میر محراب خان تینا لشکر تون انگریز تون جنگ ترسہ تینا وطن کن ندر مسُر۔ 13نومبر 1839ء ٹی میر محراب خان و اونا سپائیک زند نا آخریکو دم اسکان جنگ ترسہ شہید مسُور۔ اوکان گڈ بلوچ قوم نا فرزند آک کوزہ گیر انگریز تون جنگ ءِ برجا کریر۔ دنیا نا ہرا کوزہ گیر بلوچستان آ کوزہ کننگ کن جلہو کرینے بلوچستان نا وارث آک میر محراب خان نا کسر ءِ ہلیسہ دشمن تون جنگ تسونو۔ دا جنگ اینو اسکان برجا ءِ ہراٹی ہزار آ نیاڑی، نرینہ، چنا بھلا، پیر ورناک تینا ساہ و جان نا قربانی تسونو۔ کُل شہید آتے یاد کننگ نا بابت سینزدہ نومبر اڈ تننگا۔
بی ایس او آزاد لمہ وطن بلوچستان نا تحریک اٹ تینا کئی باسک آتے ندر کرینے۔ بی ایس او نا باشعور آ ورناک دھرتی نا آجوئی کن دشمن نا ٹارچر سیل آتیٹی ڈکھ و تکلیف سگیسہ شہادت ءِ قبول کریر ولے تینا دھرتی نا آجوئی نا تحریک آن پَد متوس۔
بی ایس او آزاد نا باشعور آ ورناک بلوچستان نا ہر گلی، کوچہ، شار و علاقہ غاتیٹی بلوچستان نا رکھ اکن ورناتے بیدار کریر و قوم پرستی سوچ ءِ مچا بلوچستان اٹ تالان کریر۔ اندا جہد اٹ بی ایس او نا ہزار آ ورناک دشمن نا زندان تیٹی قید مسُور۔ دشمن تینا ٹارچر سیل آتیٹی دا ورنا تا جون تے کرنٹ ترسہ ٹپی کریر و اندا ورناک موت ءِ خم خلکور ولے تینا مسخت آجوئی نا کسر آن ٹغلنگتوس۔ بی ایس او آزاد نا تاریخ اٹ شہید آتا اسے بھلو لڑئسے ہرافک ریاست نا ٹارچر سیل آتیٹی زندہ پہیسہ و پیش تمنگ نا وخت آ شہادت نا ایوارڈ ءِ دوئی کریسُور۔ یقیناًدنیا نا کل آن قیمتی و بھلا ایوارڈ تینا وطن کن ندر مننگ نا ءِ۔
اندا ورنا تا تاریخ ءِ مچے ملن خوانن تو ننے دا معلومداری مریک کہ موت دا ورنا تا کسر ءِ توننگ کتانے۔ بلوچستان نا ہرا کونہ ٹی مسونو تینا دھرتی نا آجوئی نا توار ءِ بڑزا کرینو۔
شہید رضا جہانگیر دھرتی نا رکھ اکن ورنا تیٹی شعور تالان کرسہ تربت نا ڈغار آ دشمن نا گولی تے تینا سینہ غا سہیسہ شہادت نا جام ءِ گلوم کرے۔ مچا دنیا خنا دشمن تینا بے سہب آ کڑد اٹ آجوئی نا توار ءِ بند کننگ نا کوشست کرے ولے توار تو مچا بلوچستان نا ورنا تا خف تیا سر مسوسُس ہراکے اینو ہم بی ایس او نا ورنا تا نیام اٹ زندہ ءِ۔
شہید شفیع بلوچ نا زانت و ہمت، جوزہ تروکا توار اینو ہم سبی نا ڈغار و ورنا تا خف تیٹی سوگوْ ءِ۔ شہید کامریڈ قیوم بلوچ نا جوزہ اینو ہم گوادر نا تالان آ سمندر نا لہر آتیٹی خننگک۔ قومی سوچ نا شعور ءِ ورنا تا شعور اٹ سوگوکرے۔ شہید قمبر چاکر تینا ترند آ توار اٹ دشمن ءِ ہکّل تریسہ تینا سخت انگا جوزہ اٹ بی ایس او نا ورنا تے توار و لوز آتیٹ دشمن نا مقابلہ ءِ کننگ کن تیار کرے۔ شہید شکور بلوچ آماچ نا پدینا سیخا آن لمہ وطن نا رکھ اکن پیشن مرسہ دشمن نا گولی تے تینا سینہ غا برداشت کرے۔ ریاست ءِ دا باور کریفے کہ دا دھرتی نا ورناک تینا جان و ساہ ءِ ندر کیرہ ولے غلامی ءِ سگپسہ۔ شہید فرید بلوچ پنجگور آن بی ایس او آزاد نا سرکل آتیان دھرتی کن جہد کننگ ناجوزہ ءِ دوئی کرسہ اندا سوچ اٹ مخے تینا تفے و مزل کن گام خلیسہ تینا مزل آ سرمس و تاریخ اٹ اسے زندہ ءُ پن ئس کٹا۔ شہید طارق کریم بلوچ تینا نازک آ جون آ دشمن نا ہر وڑ نا ظلم ءِ برداشت کرے ولے تینا مسخت آن پدی متو۔ تینا ٹپی آ جون اتون سرسوب مرسہ وطن نا شہید آتا کچاری ٹی اوار مس۔
شہید حنیف بلوچ پسنی نا ڈغار آن بش مرسہ بی ایس او نا سرکل آتیا سر مس و تینا زند نا حقیقی آ مسخت ءِ دوئی کننگ کن پند خلک۔ اندا مسخت کن پند خلیسہ شہادت نا رتبہءِ دوئی کرے۔ شہید شیر زمان کرد ہم بی ایس او نا باشعور آ ورنا ئس ہراکے بولان نا زیبا غا ندارہ غاتا نیام اٹ مچھ نا شار آن تینا لمہ وطن نا جہد کن بش مرسہ قومی جوزہ اٹ اسے تاریخ ئس نوشہ کرے۔
بسیمہ نا ڈغار آن شہید عاصم کریم بلوچ ورنا تیٹی قومی سوچ و فکر ءِ تالان کننگ کن گام خلک۔ گام خلیسہ شہید آتا ٹولی ٹی اوار مس ہرانا پن اینو ہم زندہ ءِ۔ شہید جاوید اختر بلیدہ ٹی بی ایس او نا باسک آتے قومپرستی نا سوچ ءِ ودی کرسہ ورنا تے بلوچستان نا رکھ اکن جہد کننگ نا جوزہ ءِ بشخا۔ شہید بلیدہ ٹی اندا شعور ءِ مچی سیٹی تالان کرسہ ئس کہ دشمن نا سم تا گواچی مرسہ تینا خیسنا دتر تیٹ وطن نا آجوئی نا جہد ءِ زندہ تخا۔ شہید حاصل بلوچ مشکے نا گلی کوچہ غاتیٹی آجوئی نا توار ءِ بڑزا کرسہ ورناتے بی ایس او نا تلہ غا مچ کرے۔ شہید کمال بلوچ تینا سخت انگا جوزہ و نظریہ تون گریشہ نا ڈغار آ بی ایس او نا کلہو ءِ ورنا تیا سر کرے۔ یقیناًبی ایس او نا کلہو دھرتی نا رکھ نا کلہو ءِ۔ توتک نا ورنا غا شہید نعیم جان کوزہ گیر و اونا چمچہ غاتے دا کلہو تس کہ بی ایس او نا ورناک تینا قومی جوزہ اٹ موت ءِ قبول کیرہ ولے غلامی نا زند ءِ آخا۔ ریاست تینا خونی آپریشن اٹ دا ورنا ءِ بی ایس او نا باسک آتیان جسمانی وڑ اٹ جتا کرے ولے اونا سوچ و فکر داسکان بی ایس او نا ورناک سوگو کرینو۔
شہید رسول جان بلوچ ہم تربت نا گلی تیٹی آجوئی نا کوکار کرسہ ورنا تے غفلت نا تغ آن بش کرے۔ اندن تینا جہد ءِ برجا تخیسہ دشمن نا ٹارچر سیل آتیٹ دزگیر کننگا و بزدل دشمن نا اذیت آتے سہیسہ شہادت نا موت ءِ دوئی کرے۔ شہید خمار بلوچ آواران نا سرزمین آ تینا سیاسی کڑد اٹ دھرتی نا رکھ ءِ کرسہ شہید مس۔ جاؤ اٹ ورنا تے بی ایس او نا سرکل آتیٹ زند نا حقیقی مسخت آن سرپد کرے۔ شہید فرہاد رحمت بلوچ تینا ورنائی نا وہی اٹ ورناتے غلامی نا زند آن پیش تمنگ کن جہد کن نا شعور ترسہ تینٹ دا وطن آ ندر مس۔
یقیناًدا چنکا نوشت اٹ شہید آتا دا بھلا ٹولی نا اسٹ اسٹ آ ذکر کننگ نہ بیرہ مشکل اف بلکہ ناممکن ءِ۔ اینو بلوچستان نا دونو کنڈ ئس اف کہ بی ایس او نا ورناک قومی جوزہ ءِ سر کتانو۔ بلوچستان نا ہر علاقہ شار اندا ورنا تا قربانی تا گواہی ایتک۔ ہزاراک تینا اندا مسخت کن گام خلیسہ شہادت نا موت ءِ دوئی کریر۔ کیچ آن ننا ورنا شہید اکرام بلوچ، تمپ آن شہید صالح بلوچ، حب چوکی آن شہید فراز الفت نسیم بلوچ، توتک آن شہید یحیٰ بلوچ ، بسیمہ غان شہید طارق کریم بلوچ، شال آن شہید گزین بلوچ، مشکے آن شہید ماجد بلوچ، بولان نا زیبا غا ندارہ غاتا نیام نا شار مچھ آن شہید ممتاز کرد، خضدار نا شار کٹھان آن شہید سمی بلوچ، شہید شاہ نواز بلوچ پنجگور آن بش مرسہ دا ڈغار نا حق ءِ پُورا کرے۔ دا ورناک بلوچستان نا جتا جتا شار آتیان بش مرسہ تینا لمہ وطن نا ہمو حق ءِ پُورا کریر ہراکے ہر فرزند نا زی آ فرض ءِ کہ تینا دھرتی نارکھ کن بش مرسہ جہد کے۔
شہید سکندر بلوچ خضدار آن، شہید جنید بلوچ ہم اندا ڈغار آن بش مس، شہید الیاس نذر بلوچ کیچ آن، زیبا غا ننا ورنا شہید وحید بالاچ بلوچ خضدار آن، شہید کلیم بلوچ مستونگ آن، شہید مقصود قلندرانی، توتک آن ، شہید زکریا بلوچ سوراب نا سرزمین آن، پروم پنجگور آن شہید عابد رسول، تمپ آن شہید یوسف رضا بلوچ بی ایس او نا پلیٹ فارم آن دھرتی نا رکھ نا سوچ و فکر ءِ دوئی کرسہ ہمو کسر نا مسافر جوڑ مسُور کہ ہمیشہ کن تاریخ اٹ زندہ سلیسُور۔
بی ایس او آزاد نا پلیٹ فارم آن مچا بلوچستان نا کونہ کونہ ٹی آجوئی نا کوکار ءِ سرکروکا شہید آک اینو ہم زندہ او۔ دا شہید آتا منہ ورنا نا پن ءِ تینا دا چنکا نوشت اٹ یاد کریٹ کہ دھرتی نا دا ورناتا قربانی و نظریہ مزل کن ہمیشہ بلوچ قوم نا ورنا و بروکا چین نا راہشونی ءِ کیرہ۔ پین ہزار ا شہداء کو ہراکے اینو ہم تاریخ اٹ زندہ سلوکو۔ بلوچ قوم ہمشہ تینا شہید آتا قربانی تے یاد کرسہ اوتا ہمو جہد ءِ برجا تخیک۔ اینو بلوچستان نا کونہ کونہ آجوئی نا کوکار اندا شہید آتا وسیلہ اٹ سرمسونے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک.
