سرمچار
ایس ڈی بلوچ
دی بلوچستان پوسٹ
بلوچی ءَ گُش اَنت کہ جَنگ رو ئے سَر مہ چار، سانگ ءَ رو ئے زَر مہ چار۔
اے گپ پدّر اِنت کہ اگاں کسے جَنگ ءَ روت گُڑا سر ءِ پرواہ ءَ نہ دار اِیت پرچا کہ جنگ ءَ روگ ءَ سرانی گاری اِنت، جنگ دَر پہ دَری ءُ کشت ءُ ھونی ءِ نام اِنت، جنگ ءَ کہ رو ئے دوئیں نیمگاں ٹوپ ءُ بمب رِچ اِیت. کس نہ زانت کہ کجام تیر ءُ کجام بمب کئے ءَ بہ لَگ اِیت، تیر ءِ سر ءَ کسّی نام نبشتہ نہ اِنت
دژمن ھرکس ءُ ھرچی بہ بیت کہ تئی کُشگ ءِ سر ءَ اِنت ءُ ھمے وڈ تو ھَم۔
بلئے چارگ اے لوٹ اِیت کہ منی دیم پہ دیمیں دُژمن منی کُشگ ءَ پرچا ساڑی اِنت ءُ دُژمن ءِ پجّار چے اِنت ءُ چہ کجا اَتکگ ءُ پرچا منی دُژمن جوڈ بیتگ، منی جِند ءَ پرچا تپنگ بَڈّ ءَ کُتگ پہ دُژمن ءِ جَنَگ ءَ ءُ منی دیم ءَ دژمن چنچو توان دار اِیت
گوں بلاھیں تواناں جنگ ءَ دارگ ءِ یک مستریں سلاھے جنگ ءِ اوپار کنگ اِنت ءُ جنگ ءَ یک شل ءَ دارگ اِنت۔
الّم ءَ ھمے وڈ ءَ وھدے دو راج دیم پہ دیم بیت جنگ کَنت یکے توانگر ءُ زوراک بیت ءُ یکے نِزور ءُ ایردست۔
توانگر ءُ زوراک مدام وتی جنگی ازبابانی سر ءَ گُر ءُ نھر کنت ءُ وتی داشتگیں سُپاھیگانی بازی ءَ گِند اِیت ءُ پھر کَنت ۔
بلئے نِزوریں مرد مدام وتی ھَکّ ءَ چار اِیت ، جنگ ءِ راستی ءُ جنگ کنگ ءِ سَوَباں پَٹ اِیت ءُ راستی ءُ ھکّ ءِ راہ ءِ سر ءَ بوھگ ءِ سر ءَ پھر بَند اِیت، مدام وتی جنگ ءَ جائز پیشدارگ ءِ ھاتر ءَ مھلوک ءَ سرپد کَنت کہ آ ایردست اَنت، گُلام اَنت ءُ اے جنگ اژدری اِنت پہ ایردست ءِ زندگ بوھگ ءُ مانَگ ءَ ـــــ
ایردستیں توان ءِ مستریں تاکت ھمائی ءِ اُلس اِنت۔
ایردست کہ جَنگ کَنت مدام وتئی راج ءَ پہ جوش ءُ جزبگ دُژمن ءِ دیم ءِ دارگ ءِ ھاتر ءَ ساجو کَنت ۔
اگاں ایردستیں راجانی سرمچارے وتی پگر ءُ لیکہ ءَ وتی تاکت سرپد بہ بیت ءُ لس مھلوک ءُ راج ءَ وتی ھرچی بہ لیک اِیت گُڑا ھرچ وڈیں دُژمنے کہ دیم ءَ بہ بیت راجی تاکت ءِ دیم ءَ الّم ءَ نزور بیت ءُ وتی جَنگی ازباب ءُ بھا زُرتگیں سُپاھیگاں ایردستیں مھلوک ءِ سر ءَ کارمرز کنگ ءَ بِندات کَنت، لس مھلوک زُلم ءِ دیم ءَ گیش برانز گیپت گُڑا مھلوک ءِ بلاھیں ھار ءِ دارگ پہ زوراک ءَ سک گران بیت ءُ زوراکیں دُژمن راجی جُھدکارانی دیم ءَ زیر بیت ءُ پروش وارت۔
وھدے زوراک ھرچ نیمگ ءَ وتی بے سوبی ءَ گِند اِیت گُڑا لس مھلوک ءِ زہن سازی کنگ ءَ وڈ وڈیں پروپکنڈہ کنت، مھلوک ءَ ھمے باور کنائینگ ءِ جُھد ءَ کَنت کہ جنگ ءَ سرمچاراں پروش وارتگ، کس پشت نہ کپتگ، ھرچی پشت کپتگ درست ھراب اَنت، جنگ ءَ ھچ کار شر نہ بیت، مھلوک ءَ جنت ءُ میاربار سرمچاراں کَنت ، وھدے جنگے ءَ پروش وارت گُڑا مھلوک ءَ نُکس دَنت ءُ مھلوک ءَ وڈ وڈ ءَ تُرسینگ ءَ ھوار ھمے وڈیں دگہ ھیلہ ءُ ھُنر کنت۔
ھمے بیھار ءَ دَنت کہ نُکس من ھرجاگہ بہ ور آں نشانگ منی مھلوک بیت۔
پرچا کہ داں آ وھد ءَ دُژمن ھم سرپد بیت کہ کہ ایردستیں توان ءِ تاکت ایردستیں لس مھلوک اِنت ءُ بس لس مھلوک پروش دیگی اِنت ۔
دُژمن تچ ءُ تاگ کنت کہ لس مھلوک منی ھمراہ داری ءَ بہ کنت۔
زر، سلاہ ءُ دروگ ءَ گِر داں دروگ ءُ پندل ءَ ھرچ وڈیں ھُنر کنت پہ لس مھلوک ءَ وتی نیمگ ءَ کنگ ءِ ھاتر ءَ۔
گُڑا سرمچارانی جیڑہ گیش بَنت، نی وَ گیشتر کہ ھرچ میدان ءَ سرمچار ءَ وتارا تیار کنگ کَپ اِیت، زاھری گَپّے کہ سرمچار ءِ بازار ءِ مردم، مُلک ءِ مردم، لوگ ءِ مردم آئی منّوگر ءُ زوراک ءِ ایردست بوھگ ءِ نَہ منّوک سرمچار ءِ ھَکّ ءَ گپ کَنت ھمے ھاتر ءَ دُژمن سرمچار ءِ نزّیک ءُ دیریں مردم ءُ منّوگراں وڈ وڈیں ازیت دَنت ۔
اے وھد ءَ سرمچار ءَ ھرچ وڈیں کُربانی دیگ ءَ تیار بوھگی اِنت پرچا کہ نوں سرمچارے ءِ ھاتر ءَ ھرکس سرمچارے بوتگ ءُ پگر ءُ لیکہ ءَ ھرکسی راہ گیشّینتگ اَنت ۔
یک سرمچارے ءَ وتی کَھول، وتی زِند، وتی واب، وتی مارِشت، وتی جزبَگ، وتی واھشت ءُ ارمان ھرچی ءِ کُربانی دیگ ءَ تیار بوھگ لوٹ اِیت ۔
سرمچار ھچ چُشیں سر ءِ پرواہ ءَ نہ دار اِیت کہ آئی ءِ راہ ءَ دیم ءَ اڈ بہ بیت ۔
اے ھم بیت کہ زوراک کہ وھدے وتی زوراکیاں گیش کنت گُڑا اَلّم ءَ ایردست وتی کوکّار،سلوات، گریوگ ءُ پریاتاں ھم گیش کَنت پرچا کہ وتی جائزیں لوٹ ءِ پد ءَ تو ھرکس ءَ لٹ بہ دئے ئے آ الّم کوکار ءُ جگّا کنت ءُ مردماں مُچ کنت کہ بیا بہ چار ئے منی لوٹ جائزیں لوٹے انگت من لٹ دیگ بوھگ ءَ آں
تئی پریات کَنگ تئی ھک اِنت بہ گِندے تو پریاتانی سَوَب ءَ سوبین بہ بئے ۔
ھمے رَنگ ءَ زوراک بِہہ نہ لوٹ اِیت کہ کسے آئی ءِ کوکاراں اِش بہ کَنت ءُ آئی ءَ کلاگ بہ بَند اِیت ءُ ایردست ءَ داد بہ دَنت…..!!!
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
