زھریں کرگ آپ داتگ اَنت
حنیف بلوچ
دی بلوچستان پوسٹ
پیوچک گُشتگ اَت،،چہ شما کجام مردم کہ راجدپتر(تاریخ)ءِ اے نوبت ءَ زندگ منت۔گُڈا من آئی ءَ گُشگ لوٹاں کہ آ مردماں کدی بےھال مہ کن اِت کہ آھاں وتئی مہلوک ءِ واست ءَ وتئی جان نْدر کُتگ اَنت۔آھانی بابت ءَ چونیں یاداشت ءُ گیرانکے کہ شُمارا دست کپ اِیت ایر بکن اِتے کہ مرچی پہ باندات ءَ بدل بیت ءُ اے مردم باندات ءِ بامَرد(ہیرو)بنت۔چی ءَ کہ ایشاں راجدپتر(تاریخ)ٹاھینتگ۔ایشانی نام بوتگ اَنت ،ٹکّ ءُ نشان،کد ءُ بالاد بوتگ اَنت ،واھشت بوتگ اَنت۔من لوٹاں شما ایشاں گوں انچو نزیک ءُ اےدُرستاں گوں پجاروک بِہ بَہ اِت۔ھمے وڈ کہ بِزاں شُما چہ یکّیں ٹکّ ءَ اِت۔ھمے وڈ سرپد بِہ بَہ اِت کہ بِزاں شما وت اِت،،
پیوچک! سد در سد راست گُشتگ بلئے پہ بلوچاں راستی کُچّل اِنت۔چی ءَ کہ ما وت گلائی ءِ ستاہ ءُ توسیپ آنی اشکیل ءَ انچو پتار گِپتگیں کہ ما نوں چہ وتئی جند،ھیش ءُ ھمساھگاں چہ آدیم درکپت نہ کن اِیں۔
ھمے ھال چہ اَبد بلوچ ءِ بَڈا سوار اِنت انگریزی دؤر ءِ گپّے منا یاد اتک۔
،،اے ھما دؤر ءِ گپ اِنت کہ بلوچستان ءِ بازیں ھَند ءُ دْمگاں انگریزی لشکر ءِ اُرش جاری بیتگ اَنت۔چہ انگریزی جوڈ کُتگیں توجیل ءُ آئی ءِ پیداگیریں سردارانی سوْب ءَ بلوچستان ءِ بازیں دْمگاں بلوچ ناتپاکی ءِ آس جمبور بیت ءُ انگریز بازیں ھنداں سوب مند بیت۔ ماں پراہ ءُ شاھگانیں بلوچستان ءَ سیزدہ گْوپشان ھزار ھشت سد ءُ سی ءُ نُہ {13/نومبر/1839} ءَ میر مہراب ھان گوں کمے لشکر ءَ انگریزی لشکر ءِ دیم ءَ درکئیت ءُ شہید بیت،،
چہ اے ویل ءَ ھمے راستی پدّر بیت کہ انگریز ءِدیم ءَ بلوچ ءِ پروش ورگ ءِ مستریں سوْب کست ءُ کینگانی آس ءُ ھمے ناتپاکی بیتگ اَنت کہ انگریز ءَ گوں مکر ءُ پندلاں بلوچ راج ءِ ناتپاکی ءِ سرا نپ چست کُتگ ءُ ھما میدان ءَ بلوچ پْروش داتگ۔اگاں آوھداں بلوچ گوں تپاکی ءَ انگریزی لشکر ءِ دیم ءَ در اَتکیں ٹوھیں جنگے بُہ کُت ایں تہ بلوچ ءِ سوب مَندی ھژدری اَت۔انگریز ءِ روک کُتگیں آس تاں روچ مرچی بلوچ ءَ سوچان ءُ روان اِنت، باریں تاں کدین ءَ روت۔کدی بیت کہ بلوچ رھشون چہ وتئی ٹکّی ءُ ٹاگاراں درکپ اَنت ءُ بلوچ سرڈگار ءُ راجی جیڑہانی سرا جیڑ اَنت۔
دُرستیں درورانی دیئگ ءَ رند انگت من گُشاں بلوچ زندگیں راجے ءُ بلوچ راج ءِ زندگ بوئگ ءِ مستریں سوْب بلوچ بامردانی ماس اَنت کہ راجدپتر ءِ بْراہ اَنت۔
بلوچ زھگ ءَ ماتءِ کُٹ ءَ کمبرے مات ءِ مارشتانی سکین دیئگ بنت۔
بلوچ مات چو گُش انت،،شیر اِت پہِل اَنت اگاں بُرتگیں آواراں دوبر بیارئِے۔اگاں نہ گڈا پہ تئ رودینگ ءَ بِزاں من زھریں کرگ آپ داتگ اَنت،،
زھگ پدا پسو دنت،،
بالاچ گورگیج
،،نندان ءُ سوہان کناں تیراں
گوں جگردی آپ داتگیں سنگاں
کس گبرّے پہ گاری ءَ نئیلیت
من وتئی آریپیں پِت ءِ بیراں
چون کِلاں گوں دُژمنیں مرداں،،
بلوچ ھمک اَھد ءَ زوراکیانی آماچ بوتگ بلئے بلوچ ءَ مدام پہ سرڈگار ءِ رکینگ ءَ دیمونی داتگ ءُ کس پہ ایمن نندگ ءَ نئیشتگ۔
،،ھیگل گُشیت کہ جھان جدلی رھبندانی سرا زندگ اِنت۔نظامانی بیگواھی ءِ آسر ءَ نوکیں نظام ردوم زور اَنت۔کائنات ءِ ھمک چیزیا بنی آدم چاگرد ءِ چرئے بدلی ءُ پُرشت ءُ پروشی عملاں رکّ اِت نہ کنت نظام سرنگون بنت. اےجدلی نظام انسانی زند ءِ سرا اثر انداز بیت،زند مرگ ءِ یکشلیں ابد مانی ءِ نیمگ ءَ کِنزان کنت۔آخر اِنسان پَناہ بیت،،
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
