بیگواھیں بلوچانی آجوئی ءِ ھاترہ زھرشانی ءِ دروشم مٹ کنگ لوٹیت۔
کریاب بلوچ
دی بلوچستان پوسٹ
بلوچستانءَ ہزاراں چُک برات پِت کماش زالبول بیگواہ انت تا بلوچ جُہد ہست بیگواہ بنت۔
ہمیشانی سیاد وارث لکھانی ھسابءَ بنت بلے نا اُمیتی ءُ تُرس سببءَ دیما نیا انت، بس چندیں سیاد وارث دیما کئیت۔
گیش تِر مھلونکءَ ہمے تُرس انت کہ ریاست ھلاپ گپ کنے شر یاکہ انساپ لوٹے شر جوابءَ دگہ براتے، پِتے، چُکے بیگواہ کنگ بیت۔
بلے ہمے تُرسءَ گار بیگواھیں بلوچانی گّل وائس فار بلوچ مِسنگ پرسنزءِ جار کہ ہزاراں بلوچ بیگواھ کنّگ بیتگ اے جارءَ ریاست ءُ انسانی ھقانی گّل چے منّگءَ انت؟
اشانی گمانءَ ہمے سوال چِست بیت کہ اگہ ہزاراں مھلونک بیگواھ انت گُڑا اشانی سیاد وارث کُج انت کّس دیما پرچہ نہ اِت؟
گار بیگواھیں بلوچانی جیڑہ دو پیمءَ پیش کنگ بیت یکیں کاگدی صورتءَ کہ آئیءَ ایف آئی آر گُشنت بزاں پہ بیگواھیں مردم یاکہ کجام یک چیز ئے بہ بیت آئیءِ اولی مھلومات درج کنگ ۔
دومی انسانی گواہ ئے صورتءَ کہ منی پِلا چیز یا بچ پیلانیءَ بُرتگ من چمے وت دیستگ، نو ریاست ھلاپءَ پولیس کاگد نکنت کہ اشیءِ مطلب ہمیش بیت کہ آ وتی جِندے ھلاپءَ کاگد دیّگءَ انت کہ ھو مئے ادارہ ءَ بُرتگ برو کورٹءَ پیش بو۔
او ادا اے مسلہ ءَ ریاستءِ انساپ کنوکیں ادارہ “کورٹ” چاریت، بلے ہمے کورٹ کہ آئیءِ وتی وکیل کُشگ ءُ بیگواہ بنت آ ہچ کُت نہ کنت گڑا پہ بزگءُ واریں بلوچاں چے کنت؟
ہمے فوج پولیس کہ پہ انسانی جان سلامتی ءَ داشتگ انت آ وت بیگواہ کنوکیں ادارہ انت آ چتور پٹ پول کن انت؟
ہزارانی ھسابءَ بیگواھیں بلوچانی ناکہ کاگدی سبوت ہست نیکیں گواہ، نو چُشیں جاورانی تہا گار بیگواھیں بلوچانی سیاد وارث مھلونک بہ کنت چے؟
ادا مئے ناکامی اِش انت کہ ماں انگتءَ ہزاراں بلوچانی گار بیگواھی ئے جار جتگ وتی وس واکءَ کاگدی مھلومات نبشتہ کُتگ فائل کُتگ بلے اشانی سیاد وارث دیما نہ یتکگ انت۔
سیاد وارثانی دیما آہگ ضروری انت اشاں سرپد کنگ ضروری انت کہ اے ریاستءِ ادارہ پہ مئے بلوچانی واستہ نہ انت ہما کہ ووٹ دنت شر ندنت شر آجوھی لوٹیت یاکہ نہ لوٹیت بلوچاں ادا ہچ نیست۔
سیاسی گّل اگہ بلوچ بیگواہانی کُہولاں گوں ہمراہی بہ کنت گُڑا ریاستی مشینری میڈیا ریاست دوستیں بلوچ ءُ پنجابی درست ہمے گپءَ کن انت ماں وا گُشتگ درست جنگول انت سرمچار انت بِچار پِلان گّل ریاست دشمن انت ہمیشانی مردم گون انت گوں اے کُل ریاست دشمن، درست یک انت۔
نو جاور چُش انت کہ اے سیاسی جیڑھ انت بلے ترا سیاست کنگے ھق نیست، ریاست ءِ نزیکءَ بلوچ راجءَ زندگی کنگے ھق نیست۔
بلے آکر بلوچ راج بکنت چے کہ ریاست مجبور بہ بیت یا میان استامانی ھقانی گّل یا یک انسان دوستیں تبّکہ ئے پہ بلوچءَ دیما بہ اِت یا توارے چِست بہ کنت۔
سیاسی گل وتی وس واکءَ انٹرنیشنل میڈیا ءُ انسانی ھقانی گّلاں رپورٹ دیم دی انت بلے سوال اِش انت آ پرچہ ھاموش انت یا کہ بس تّسلہ دی انت؟
اشیءِ وجہ ہمیش انت کہ ماراں زہرشانیءَ یک نوکیں شکلے دیّگ لوٹیت ۔
گار بیگواھیں بلوچانی زہرشانیءَ یک انچیں پروگرامے دیّگی انت کہ آہانی توار کوئٹہءَ ءُ اسلامآبادءَ چہ دیما بروت سر بہ بیت۔
مئے سرجمیں جُہدے تاریخ ءَ بچار مئے زہرشانی کدی پہ ہچ کاراں کامیاب نبوتگ انت آئیءِ سبب اِش انت کہ مئے جیڑہ دائمی ءُ زہرشانی وقتی بیتگ انت۔
گار بیگواھیں بلوچانی جیڑھ تا ریاست ہست بلوچ جُہد ہست اے جیڑھ ہست بیت۔
گل پہ مئے زالبولاں ءُ بیگواھیں بلوچانی سیاد وارثاں یک انچیں زہرشانی پروگرامے جوڑ بکن انت کہ یک بلاھیں طاقت ءِ بداریت اگہ بیگواھیں بلوچانی اے توامیں مھلونک یکجاہ بہ بنت کم از کم یک شھرے بند بکن انت ناپاکستان دنیا ئے دیما جوابی بیت۔
ماں شُماں دُرست زان انت کہ مئے کِرا کُمک نیست ہمے نیستیءَ مارا یکجاہ یک دومیءَ کمک کنگ کپیت۔
ماں سجھیں سال کیمپءَ بِنندیں کّسی گوشاں مورے نہ وارت پرچہ کہ آہاں درد پِر نہ انت آہانی آسودگی سلامت انت،کدی تا واہ ءُ زاری پریات گریوگ نِندے وتا تماشا کنے؟
زہرشانیءَ نوکیں راہے گچین کنگ لوٹیت کوئٹہءِ شھرءَ آوکیں ءُ ڈنءَ رئوکیں توامیں مزنیں راہ بند کنگ بہ بنت۔
اے کار واستہ مھلونک یکجاہ بہ بیت پہ شِپٹ زہرشانیءَ مردم بدل بہ بنت۔ سُہب تا روچ ءُ روچ تا بیگاہ ءُ بیگاہ تا شپ زہرشانی بہ بیت۔ کوئٹہ کہ بند بیت ریاستءِ گوش وت پچ بنت۔
پہ وتی برات، پِت، گہار، بچ، سیاد وارث اگہ کنّگ لوٹے گُڑا انچیں کاریں بکن کہ ریاست بہ لرزیت،پہ پِریات کار شر نہ بنت۔
وہد بدل بیتگ وہدے لوٹ بدل بیتگ انت ۔۔۔۔جُہدءَ ھوں بدل کن اِت، ہمت کن ات۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
