آزمانک
ودار ءَ وارت
نبشتہ: راجدار کَلّگی
دی بلوچستان پوسٹ
ساچان مدام چہ لوگ ءَ در کیت آ گُش اِیت من روکپتی بلوچستان ءَ پہ کار ءُ روزگار ءَ روگ ءَ آں ۔۔
اَنوں شپ ءِ دومی پاس بیت ساچان چہ سپرے ءَ کیت ءُ آ گوں وتی کھول ءَ شریں نیادے کنت ءُ سک ژند ءُ پَند بیت پمیشکا آئی ءِ ماس آ را گُش اِیت شنکوں تو برو بہ وپس کہ تو دم بُرتگ گڑا سُھب ءَ نند ءُ نیادے کن آں اَنوں شپ شُتگ ءُ سیمی پاس ءَ رس اِتگ !
آ روت وتی کوٹی ءَ سر ءَ ایر کنت پہ واب ءَ دل ئِے اُبینگ بیت داں گوانکو ءَ ئِے کلوھے کیت ءُ آ گوانکو ءَ چہ بالِشت ءِ چیر ءَ در کنت ءُ وانگ ءَ لَگ اِیت ، آئی ءِ سنگت کوھی ءِ کلوہ بیت کہ آ گوں کوھی ءَ اولی رند ءَ ماں دْراجیں سپرے ءَ دچار کپ اَیت ءُ گُمائی پجاروکی بیت ،
” ھال کن تو مرچی لین ءَ بوتگ ئے ءُ ھال ءُ اھوال نہ کُتگ اَنوں کُجا ئے تو ؟
ساچان ءِ ژند ءُ پندی ءُ زوراکیں واب پہ بچکندے ءَ بدل بیت ءُ آئی گِندگ ءَ گوں کَس اے گمان ءَ کُت نہ کنت کہ آ اَنوں ژند ءُ پند ءُ وابینگ بوتگ ،
ساچان ، من آتکگاں لوگ ءَ آں تو کُجا ئے ؟
کوھی ، من ھم آتکگاں شمئے میتگ ءِ کِر ءُ کش ءَ داشتگ !! مئے تالہ ءَ بچار مارا مُدتے ءَ رند موہ دیگ ءَ اِنت پہ دیدارے ءَ ، گڑا سُھب ءَ دیدار ے بہ بیت ، تو چے گوش ئے ؟
ساچان ، من ھم پہ تئی دیدار ءَ چو آھوگ ءَ تُنیگاں یار ! اگاں تو لوٹ ئے من اَنوں کا آں ، باریں ترا کے گون اِنت گوں ؟
ساچان مھروانی پدر کنان ءَ جُست ئِے کنت ۔
کوھی ، اِناں ڑے اَنوں میا تو زان ئے جاور شر نہ اَنت ، سُھب ءَ پہ وار ءُ گیگ بیا دیدارے کن آں مارا اِشتاپ نہ اِنت ءُ من ھم مرادیگاں پہ تئی گِندگ ءَ منی ھمراہ مزار ءُ دگہ دو سنگت اَنت بلے تو دلجم بو جوانیں زمہ داریں سنگت اَنت ۔۔
ساچان ، اُپ یار باریں من شپی چہ گَل ءَ واب کپاں یا اِناں !! مزار ءِ ھما نیاد انگت منی دل ءَ نکش اِنت ءُ منی سلاماں مزار ءَ بہ دئے ءُ اِن شاءاللہ من سُھب ءَ الم کائیں شمئے چارگ ءَ ۔۔۔
ساچان آرا دلجمی ءُ سھب ءِ ودار ءَ دنت ۔۔
کوھی ، شر اِنت گڑا ساچو شپ شُتگ تو بہ وپس اَنوں سُھب ءَ ھال کناں ۔۔۔
ساچان پسو دیان ءَ ، شپ وش ، نبشتہ کنت ءُ کلوہ ءَ روان دنت ءُ نِپادانی سر ءَ تچک بیت ۔۔
روچ چِست بیت ءُ ساچان پیالھے چاہ وارت ءُ گوانکو ءِ کلوھاں وانگ ءَ لگ اِیت اَنچو بے تْرک ءُ بے توار بیت ءُ جیڑگ ءَ لَگ اِیت ءُ وتی دل ءَ گُش اِیت ، مرچی کہ من کوھی ءَ زبان داتگ پہ دیدارے ءَ شما سنگت راہ داتگ اَنت کہ برو اِت شمارا ساچان بارت ءُ منزل ءَ سر کنت !!
آ ھیران بیت من ماس ءَ چے بہ گُشاں ؟؟
باریں ماس چے پھم اِیت ؟؟
من بے زبان بوت آں کوھی ءِ دیم ءَ باریں آ چے پھم اِیت ؟
آ ھمے پھم اِیت کہ ما یکیں گَل ءِ سنگت نہ اِیں پمیشکا ساچان ءَ مئے گوما دیدار وش نہ بیت !!
گوش ئے آزمان ساچان ءِ سر ءَ کپ اِیت ءُ آئی ءِ نپس بند بیت آ میسنجر ءَ پچ کنت ءُ کلوھے نبشتہ کنت ، یار پھل کن لھتیں سنگت آتکگ چہ بُرز ءَ ایشانی زمہ داری منی سر ءَ لَڈگ بوتگ کہ ایشاں بزوران ءُ منزل ءَ سر بہ کناں !!
من بے زبان بوتاں شمئے دیم ءَ تو بہ گوش من نوں چے بہ کناں یار ؟؟
کوھی کلوہ ءَ نہ چار اِیت ءُ ساچان ءَ مورینک بِر رِچ اَنت ءُ چہ میسنجر ءَ گوانکے جنت کوھی ءَ ، کوھی گوانک ءَ بند کنت ءُ پسو ءِ دنت ،
اڑے یار چو بیت تو ھچ مہ جیڑ سنگتاں بہ بَر منزل ءَ سر کن اگاں زندگی بوت اِن شاءاللہ دگہ رندے دیدار بیت اے راہ ھمیش اِنت اگاں مارا بہ لوٹ اَنت ما ھم رواں پرچا کہ مارا دیم ءَ جُنزگی اِنت !
” ساچان چہ تہ ءَ سک پُرش اِیت بلے کوھی ءِ تَسلہ آئی ءِ دل ءَ کمو مُھکم کن اَنت ءُ ساچان کوھی ءِ مِنت ءَ گیپت ءُ نبشتہ کنت ،
گڑا من روگ ءَ آں اگاں زندگ بوتاں دیدار بیت بلے دل ءَ مہ کن اِت یار ،
آ وتی ماس ءَ پہ زِند ءُ شِری رازیگ کنت کہ مئے ٹیکدار ءَ دگہ ٹیکھے زُرتگ مارا لوٹگ ءَ اِنت پمیشکا من ءَ رزا بہ دئے من رواں کہ دگہ چُشیں شریں کار نہ رس اِیت ءُ آئی ءِ ماس لاچار بیت ءُ آئی ءَ رزا دنت ءُ آ روت ۔۔۔۔۔
مرچی شش ماہ گوز اِیت کہ ساچان لین ءِ سر ءَ کیت ءُ لوگ ءَ ھال ءُ اھوال کنت آئی ءِ کستریں گُھار ھُج کنت تو بیا مارا وش نہ بیت !!
بلے آ گُش اِیت دگہ ماھے ءَ رند مئے کار سرجم بیت من کایان ءُ گوانکو ءَ بند کنت ءُ میسنجر ءَ پچ کنت سنگتانی کلوھاں وانگ ءَ بیت ءُ جَھل ءَ روان کنت داں کوھی ءِ کلوھے دیم ءَ کیت ،
سلام ساچو ھال کن تو بے بلاہ چَٹ گار ئے یار ؟
اے دمان ءَ گوات لَھم لَھم ءَ کَشگ ءَ بیت ءُ آئی ءِ بونژاں بانژ ءُ لیگاریں موداں شِنگینگ ءَ بیت ءُ بے چاڑیں دل ءَ چاڑ بکشگ ءَ بیت ، آ جیڑ اِیت اُپ یار منی سرڈگار ءِ گوات اوں چینچو مھروان دلکش اِنت کہ اَبیتکی ءُ ملوریانی ساھتاں مردم ءَ کُجا کُجا بارت ءُ سر کنت ءُ چہ گم ءُ رنجاں بے تْرانگ کنت !!
اَنچو آسردے کَش اِیت ءُ کلوہ ءِ رمس ءَ چارگ ءَ لَگ اِیت کہ آئی ءَ ماھے ءَ پیسر کلوہ دیم داتگ آ چار اِیت داں اَنوں لین ءِ سر ءَ اِنت ، کوھی پمیشکا گیشتر لین ءِ سر ءَ بیت کہ آ چہ شھر ءَ باز نزیک بُنجل کن اَنت ۔۔۔
وعلیکم السلام ، من یار ۔۔۔۔۔۔ بوتگ آں اود ءَ تو زان ئے دمگ نیست باریں تو ھال کن چون ئے تو ؟ ءُ سنگت چون اَنت ؟
کوھی ، ما دْراہ وش ءُ جوڑ آں ، ھو یار آنگو لین نیست گرک اِنت ، باریں تو ھال کن کجام دمگ ءَ ئے اَنوں ؟؟
دوئینانی داں دیر ءَ ھال ءُ اھوال بیت ءُ کوھی ءِ گُڈی کلوہ کیت ۔
ساچو مزار ترا سک یات کنگ ءَ اِنت !!
ساچان اے کلوہ ءَ وان اِیت ءُ ھُشک ءُ ھیرانی ءَ چہ پد آسردے ساہ ءِ کَش اِیت ءُ دل ءِ تہ ءَ گُش اِیت باریں مئے دیدار کَدیں بیت !
اَنچو تْرانگ ءَ کپ اِیت کہ من پسو نہ داتگ ءُ زوت زوت ءَ پسو ءَ نبشتہ کُنت ءُ روان دنت ،
تو مزار ءَ بہ گوش گم مہ کن انشاءاللہ دیدار بیت اے زھیر ءُ تْرانگانی جمبر بُرّ اَنت روچے ۔۔۔
اڑے ساچان تو چے کنگ ءَ ئے ؟
انگت ھال ءُ اھوال ھلاس نہ کتگ ؟
بیا رواں کہ نا وھد اِنت !!
ساچان ءِ ھمراہ پہ اِشتاپی پُرس اِیت ءُ پہ روگ ءَ گُش اِیت ئِے ۔۔
اڑے پھل کن کمو دیر بوت شش ماہ ءَ رند مرچی ھال ءُ اھوال کنگ ءَ آں پمیشکا منی ھیال ءَ مارا دمانے نہ بیت !!
آ ٹھک دیان ءَ پسو دنت وتی سنگت ءَ ۔۔۔
کوھی ءِ کلوہ نئیت ءُ ساچان دومی کلوہ ءَ دیم دنت ءُ موکل لوٹ اِیت ءُ پہ نا دلکشی چہ کوہ ءَ ایر کپ اَنت ءُ بُنجل ءَ رو اَنت ۔۔۔
مرچی سالے ءَ چہ رند کوھی سھی بیت کہ ساچان مئے دمگ ءَ آتکگ پمیشکا کوھی ساچان ءِ بُنجل نِیٹورک ءِ سر ءَ گوانک جنت ءُ ساچان ءِ ھال ءَ گیپت ءُ گُش اِیت ، اگاں ساچان آتک منی سلاماں بہ دے ءُ بہ گُش ئِے ترا کوھی ءُ مزار ءَ سلام کُتگ ءُ گوشتگ اِش الم مارا ھال ءُ اھوال بہ کن ۔۔
ساچان ءَ دمانے بیت چہ گَشت ءَ کیت ءُ نِیٹورک ءِ سر ءِ نشتگیں بارگ بندیں جوان کوھی ءِ کلوھاں ساچان ءَ سر کنت ءُ گُش اِیت ئِے ، کوھی ءُ مزار ءَ ترا سلام کُت ءُ گُشت اِش الم مارا ھال ءُ اھوال بہ کن !!
” آ پہ ھیرانگی وتی بوج ءَ سُبک کنت ءُ ساچان ھمے بارگ بندیں جوان ءِ گوانکو ءَ پچ گیپت ءُ وتئی پیسبک میسنجر ءَ پچ کنت گوں کوھی ءَ ھال ءُ اھوال کنگ ءَ لَگ اِیت ءُ مزار کوھی ءِ کِر ءَ نندوک بیت ءُ سئینانی ھال ءُ اھوال داں اَدارے ءَ بیت ، ءُ مزار ءُ کوھی ساچان ءَ بانداتیں ودار دے اَنت کہ ما الم کائیں پہ تئی دیدار ءَ تو دگہ جاگہ مرو ما گوں کامریڈ ءَ گپ کُتگ ۔۔
” ساچان پسو دنت ءُ بے کِساس گَل ءُ شات بیت !!
” گڈی ءَ کوھی کلوہ کنت کہ اَنوں ما دومی بُنجل ءَ روگ ءَ اِیں گڑا بامسار ءَ اِن شاءاللہ ما گوں تو دیوان بئیں مئے ودار ءَ بہ کن ۔۔۔
ساچان آئی ءِ گوانکو ءَ دنت ءُ ساچان ءِ لُنٹانی سر ءَ بے دروریں بچکندے کُڑو بانو کُنت ءُ سک گَل بیت چہ گیشیں وشی ءُ گَل بوگ ءِ سوب ءَ پہ بے اِنانی واب کپ اِیت ۔۔۔۔
سُھب ءِ سر ءَ جمبرانی پُٹ ماں آزمان ءِ دیم ءَ چو مُھرگ ئیگ ءَ کماھوک بنت ءُ ساچان ءِ چم گوں نِیٹورک ءِ سِٹ ءَ سَک بنت بلے آیانی ناکہ گوانکے کیت ءُ ناکہ جند اِش بس آ ھمے ودار ءَ نندوک بیت باریں آ کدیں گوانک جن اَنت کہ ما آتکگ ءُ رس اِتگیں نزیک ءَ مئے ودار ءَ بہ کن اِت ، ساچان ءَ اَبیتکی مان روپاں کنت ءُ آ گَزاں چارگ ءَ بیت کہ گوات گَزانی شاھُڑاں برے یک نیمگے ءَ سُرینگ ءَ بیت !!
ھمے دمان ءَ نِیٹورک ءِ سِٹ ءَ گوانکے کیت ءُ آ گپ ءُ تران ءَ لَگ اَنت ، ساچان آئی ءِ گپاں گوش دارگ ءُ دیم ءَ چارگ ءَ لگ اِیت کہ آئی ءِ دیم سیہ ءُ سبز بوان بیت ءُ لُنٹ ئِے ھُشک بوان بنت داں گپ ءُ تران ھلاس کن اَنت ءُ آ بس ھمے گُشگ ءَ بیت ، ھاں ، چون ، کُجا ، چے وڑ ، اُپ یار ، سِٹ ءَ بند کنت ءُ گوں کُڑ ءِ گِندار ءَ تِکّا بیت ۔
ساچان سک تکانسر بیت ، باریں چونیں ھالے سنگت چو پریشان بوت ، ساچان چہ آئی ءَ پُرس اِیت ھاں سنگت تو چو پریشان بوت ئے چونیں ھالے ؟؟
آ گوں پُرشتگیں گالوار ءَ مُنو مُنو کنان ءَ پسو دنت ،
یار دوشی مَز ، مَز ، مزار گوں لشکر ءَ دیم پہ دیمی جنگ ءَ گوں سے سنگت ءَ اَبدمان بوتگ ءُ مارا یل کُتگ اِش !!
ساچان گوں اے گپانی اُشکنگ ءَ ھوار اُپّارگے کَش اِیت ءُ پاد کیت روت دیم پہ دیم ءِ گَزّ ءِ بُنڈ ءَ تِکا بیت ءُ سگریٹے لاگین اِیت یک ءُ دو دمے گیپت ءُ دوتانی ندارگ ءَ چارگ ءَ لَگ اِیت کہ دوت چِست بوان بنت ءُ لھمیں گوات دوتاں چَکرّینان ءُ چہ چماں اَندر کنان کنت ۔۔۔۔۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
