پُھلی آ میرل
نوشت: مُرید بلوچ – مَٹ: باہوٹ بلوچ
دی بلوچستان پوسٹ
انت نوشتہ کیو۔۔۔ امر نوشتہ کیو۔۔۔ ہراکان ہمو لَوز آتے ہتیو ہرا اونا سوگوْ ، پاک و بڑز بالاد آ کڑدار تون انصاف کننگ کیر، امر نوشتہ کیو کہ اونا ہننگ آن گڈ ہم ای ساہ ہلنگ اُٹ، زندہ اُٹ حالانکہ زند ئنا کشتی ہمو دے ڈُب ہلکوسُس ہرادے لاشعور نا سمندر اٹ شعور خن ملاسُس، ہر پارہ غا بے وسی و نیستی و غلامی نا دُو ئٹی دُو شاغسہ البرز آن ہلیس ڈیرہ جات اسکان پند ئٹی ئسون۔
ہر گدرینگوکا دے حادثہ غاتا دروشم اٹ مِلی آ گروک بٹیسہ کرے، ہزار آ جغر نا ٹکر آک ہرافک تینا ارمان، اُست خواہی ءُ ورنائیءِ آزاتی نا دیوی نا مونا ندر کریر، خلنگسہ کریر، کہیسہ کریر۔ اوفتیٹ منٹس اندنوہم ئسر ہرافک تاریخ نا دتر چُر آ دروشم آ تینا مہر و مابت، خلوص و راستگی تون خَل آ چشخ مروک ڈَول نا نشان ہلار۔ میرل نا ہم تعلقداری ہم عاشقان وطن ناانداچِر اٹ سلوک آتیتون ئس۔
میرل اسہ اندنو ہمرہ، اندنو سنگتس ہرانا سنگتی لڑزوکا گام تے باوری و سوگوی اس بشخاکہ۔ ہراتم حوصلہ و بے اُمیتی نا تارمئی تیٹ ڈُب ہلیسہ کریر گڑا اوفتے او تینا لائخی، دانائی و مہر آن چلتن نا ڈَول آ بڑزی تے بشخا، ہراتم کوپہ غاتیا تیوہ غا زند ئنا بڈ زیات مسکہ گڑا او تینا کوپہ ءِ مونی کریسہ بڈ ءِ تینا کوپہ غاتیا ارفیکہ۔ ہراتم تنیائی است ئنا کپّی تیٹ تینا جنڈ آتے ملیسہ گار و پریات کننگا مسکہ گڑا مابت آن پُر آ بشخندہ اٹ اونا سیبو مسکہ۔
میرل کنے دا سوب آن ہم بھاز دوست ئسکا کہ اوڑان کنے ماما میندو ءُ علی سلیمان نا خوْش آ گند بسکہ، ہمو مہر، ہمون کاریم تون تفوک، بے غرضی، ہمو سادئی، ہمو حوصلہ۔
میرل تون کنا اولیکو اوڑدئی 2012اٹ قلات نا رہی ئنا مَش تیٹ مس۔ مشکے ٹی منہ وخت گدریفنگ آن گڈ او ننا رہی آ بسوسُس۔ تینا سادہ و پُرمہر آ طب ئنا سوب او بھاز زوت سنگت آتیتون ہم رنگ مس، گمان ہم متو کہ او پین تنظیم ئسے آن تعلقدار ءِ۔ میرل شاعر اس ہم ئس، اندا سوب آن اوڑتون اواری زیات چَس کریکہ۔ باسن آ چاہ ئتون شاعری و سیاست نا وخت و پاس آک گدرینگارہ۔ گشت مرے یا وتاخ، میرل تیوہ غاتیان موْن اٹ مسکہ۔ وخت گدرینگسہ کرے منہ وخت آن گڈ میرل تینا تنظیمی کاریم تا رِد اٹ خاران آ ہنا دوارہ بے بختی آن بھلو وختس ننا اوڑدئی مننگ کتو۔ تنظیمی اختلاف آتا سوب مُریک انداخہ زیات مسر کہ اسہ علاقہ اٹ ساڑی مننگ آن بیدس ہم اسٹ ایلوڑتون اوڑدئی مننگ کتو، طرہ و ضد ڈَول ئنا بَلاک ہرا بھازا سال آتیان ننا اشتماعی شعور ءِ خوْرہ آنبار کُننگ ئسر، اسیکہ وا کاٹم ارفنگ ءِ بناء کریسر۔ ای تینٹ اسہ نزورو ٹوْل ئسے گلستان اس سرپد مریسہ تینا اُست اٹ خوْش مریسہ تہارمئی تیٹ نازگر ئسوٹ۔ 2015اٹ میرل اسہ وار تینا اسہ سنگت اسیتون اسہ متکنو سنگت اسیتون اوڑدئی کن ننا کیمپ آ بس، حال احوال آن گڈ آن ہلیس ایلو دے اوفتا ہننگ اسکان اندا اختلاف آتا زی آ بحث مریسہ کرے، نن تینا خرین آ غیر سیاسی وڑ اٹ زار شلیسہ کرین، او صبر ئتون بشخندہ کریسہ دلیل تریسہ کرے۔ منہ وخت آن گڈ ہراتم میرل تون ناگمان آن کسر اٹ اسہ وار اوڑدئی مس گڑا خناٹ کہ میرل ہمو میرل ءِ، ہمو بشخندہ، خلوص، بزگ و مہروان آ طب گڑا دَرک لگا کہ نن دُون نا پغٹ آک بیرہ گُٹ ءِ پُر کریسہ بیرہ ٹر ٹر کننگ ئسونہ، و سمندر نا دا دریاب نا باتی ءِ اُر امر خلوص و راستگی تو ڈیہہ ئنا دڑد ءِ درمان کننگے۔
2016 ٹی ای ہراتم اسہ جلہو ئسے نا وختا ٹپّی مسوٹ گڑا دا میرل اس ہرا تیوہ غاتیان مالو سرمس کنا پاش آ ٹپ آتیا درمان تخنگ کن۔ او تینا ہمو تیوہ غا تہہ ئنا ٹپ آتے بے خیال کرے ہرا فک پہ رضا یا بے پامی تون زار شلوکاتا پارہ غان اونا است و دماغ آ مسوسر۔ دوارہ ہر ارٹمی، مسٹمیکو دے او ننا رہی آ بسکہ، علاقہ نا مَٹ مروکا حالیت، بروکا وخت ئنا حکمت عملی، اسہ جاہ جدوجہد بلکہ ہر سرحال آ ہیت مسکہ۔
اول سر اٹ اسہ جاہ کاریم کننگ نا رِد اٹ بھاز آ سختیک مونا بسر، داخہ در سال ئنا مُریک، خرینیک، غلط فہمیک، اسٹ ایلو آ باور کننگ نا کمبوتی تون اسہ سنگر اٹ تولسہ دژمن تو جنگ تننگ بیرہ میرل کوْن آ سنگت آتا سوب آن مننگ کرے، اینو اگہ کس پیشن آن برے گڑا اودے تینا خن تیا یخین بفرو کہ دا ہمو چاکر و گہرام نا اولیاد ءِ ہرا 40سال اسہ ڈاچی ئسے نا سوب آن اسٹ ایلو ءِ خلکر۔ قومی خواست آتا دوئی کننگ کن اسہ سوگوْ ءُ اسہ جاہ ءُ محاذ اس امر ٹہیفنگک، اگر کس ءِ معلومدار مروئی ءِ گڑا میرل نا فکر آ چمشانک اس شاغہ ہرا میرل نا ڈَول آ سنگت آتا بھازا خواری تیان اینو شُوراٹ لَڑ بند ءُ کڑدار تون اوار اوار دا چنکا پارود اٹ کاریم ئٹی ءِ۔ چنکو کچ ئسے آ سیوت آن گڈ میرل نا ہر وخت اندا کوشست ئس کہ اندا کاریم ءِ تالان کریسہ قومی سیوت نا پارہ ہننگ مرے ہراڑکن تینا بنماسی سنگت آتیان بیدس بی ایل اے، بی آر اے و یو بی اے نا بنماسی سنگت آتیتون ہر وخت حوال ئٹی مسکہ۔ اواری آمحاذ ءِ سنبھالسہ میرل ہر گشت اٹ سنگت آتا راہشونی کریسہ موْن ئٹی مننگ خوائسکہ، او ریاستی لشکر، مشنری یا قبائلی معتبر آتا دروشم اٹ ٹہیفوکا بدکڑدار آ آئی ایس آئی نا ڈیتھ اسکواڈ مروس، اسہ گشت آن بننگ آن گڈ ایلو گشت ئنا تیاری تیٹ لگاکہ، وارس خاران نا پَٹ آتیٹ بالاچ بیرگیر نا کمان آن دژمن آ تیر شلاکہ گڑا وارس نوشکل نا سُرمئی مش آتیا سنگر کریسہ نورا مینگل نا دلیری و ہکّل آن دژمن نا تُغ تے پریفنگ آن گڈ شور و پارود ئٹی آئی ایس آئی نا تالی چَٹ آتیا گروک آنبار تماکہ۔ وطن نا حقی آ عاشق ءِ نہ تینا ذات ئنادڑد ئس نہ ذات ئتون تفوک سیالی تا، دڑد اس گڑا بیرہ راجی بزگی و بے وسی نا، دے مرے یا نن، شُور ئنا سُو تڑوکا یخ مروس یا خاران نا پُتک تروکا باسنی، حالیت اخہ در گندہ مروسر اودے ہچو پرواہ اس اَلو بس تینا کاریم ئتون لگوک ئس۔ بیشک بھلا مِزل آتا مسافرآک اندن انگا بڑز کڑدار آ جہد کار آک مریرہ۔
گڈیکو دے تیٹ میرل تون فون آ ہیت مسکہ، ای ذات ئنا کیذی تینا چنکا سوچ و نَت تا اورتیا اُروکا بندغ، ہراتم اوڑتون ہیت کریٹہ اودے فریشان کریٹہ، او مخیسہ ورندی تسکہ: ’’پُھل اللہ حیر آ کہ، کل چیز برابر بنت۔ منی گو کماش و پیرین لشکر آ گپ بوھگ آئے انشااللہ ھر چیز ٹہیت تو وتارا انکہ پریشان مہ کہ۔‘‘ و گڈیکو کلہو ’’ جوانے پُھل اوار ان، اللہ ءِ باھوٹ ءِ، اللہ ءِ کلام ءِ باھوٹ ءِ۔‘‘
ہنیسہ میرل ننے ہمو تیوہ غا گڑاتے سرپد کرے ہرافتے تینا کریسہ نن ہمو سیاسی جادوگر ءُ مداری تا دکان تے ہمیش کن بندکننگ کینہ ہرافک بھلو وخت ئسے آن جہانی پڑی تیٹ ’’بلوچ بہاکن‘‘ نا تختہ ءِ ارفوک تولوکو۔ میرل ننے ہیل تس کہ لائخی، مخلصی، نیک نیتی، خواری، مہر و بے غرضی اٹ بد بننگ ءِ امر مابت ئتون مَٹ کننگ مریک۔ سخت آن سخت آ کاریمک امر ارزان مریرہ ،نئے مننگ کروک آ کاریم امر مننگ کیک۔ میرل نا کڑدار ساڑی و بروکا تیوہ غا جہدکار آتیکن کسر نا چراغ ءِ، یخین ءِ کہ ورناغا زَنک اندا چراغ آتیان روشنائی دوئی کریسہ تہارمئی تے ایسر کرو۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک.
