منگچر میں ایک شخص قتل، وندر حادثے میں 4 جانبحق

بلوچستان کے علاقوں منگچر اور وندر میں پانچ افراد جانبحق جبکہ ایک زخمی

دی بلوچستان پوسٹ نیوز ڈیسک کو موصول ہونے والی اطلاعات کے مطابق بلوچستان کے مختلف اضلاع میں پیش آنے والے واقعات میں مجموعی طور پر پانچ افراد جانبحق جبکہ ایک زخمی ہوگیا ہے-

تفصیلات کے مطابق ضلع لسبیلہ کے علاقے وندر کسٹم کے قریب ٹرک اور ٹو ڈی کار میں تصادم کے نتیجے میں کار میں سوار 4 افراد موقع پر جانبحق ہوگئے۔

موٹروے انتظامیہ کے مطابق حادثہ مخالف سمت سے آنے والے تیز رفتار ٹوڈی کار کا ٹرک سے ٹکرانے کی وجہ سے پیش آیا۔

جانبحق افراد کو مقامی ہسپتال منتقل کردیا گیاہے-

دریں اثناء بلوچستان کے ضلع قلات کے علاقے منگچر میں پیش آنے والے ایک واقعے میں نامعلوم مسلح افراد کی فائرنگ سے نوشکی کے رہائشی نعمت اللہ نامی شخص جانبحق جبکہ انکا ساتھی زخمی ہوگیا۔

جانبحق اور زخمیوں کو سول ہسپتال قلات پہنچادیا گیا ہے تاہم زخمی ہونے والے شخص کی شناخت تاحال نا ہوسکی ہے-