گوں واجہ گوس ءَ ھَمگرنچیں یات
نِبشتہ: بابُل لطیف
دی بلوچستان پوسٹ
بیگائے مَلاریں موسم ءُ نودانی تُرمپ ،ترمپ ءَ شَنزگ ،دِرین چو پُلّ ءَ ماں آزمان ءِ جیگ بَند ءَ سَرپتگ اَت کہ ناگہاں نہ وش اِیں اہوالے منی گُوشاں کپت. منی چَمّاں موسم ءِ پَرّام ءَ بُرّت ءُ اے تام ءُ لِذّت جور بُوت آں کہ سَماء ماں ویرانیں گیابانے ءَ نَدارگانی شوہازیگ بوت ، چیاکہ گوں ھمے شَھزانت اِیں ھَستّی ءَ منی لَہتیں یات ھَمگرنچ اَت بَلئے سرجَمیں راج ءِ اُوستانی شَہم اَت.
بزان بَلوچی زُبان ءِ کوھیں کَلات ،زُبانزات، نامداریں لَچّہ کار ،آزمانکار ءُ پولکار واجہ گوس بہار پہ مُدامی اے کُوڑھیں اِمروز یَلہ دات ءُ وتئی مُجتّی ھَنکین ءَ رپت،مارا ماں گم ءُ رنجانی پَلّوا گِرھن دات.
واجہ گوس بہار بلوچی زُبان ءِ آزمان ءَ ھَما دَرپشوکیں اِستال اَت کہ منی وڑیں یک نوک بائندیں نِبشتہ کارے ءِ دانکانی مُھتاج نہ اِنت،بَلئے لَہتیں یاتاں کہ دَرشان اِش کنگ لوٹ آں.
منا یات اِنت وھدئے من بلوچی ماھتاک کوئٹہ ءُ بلوچی لبزانک ھَب ونتگ اَت گُڑا واجہ ءِ بے دَروَریں نام گوں زانت چَکاریں نِکاناں منی دیما گوست .ھَمے وڑا وھد گوزان اَت کہ واجہ ءِ وانگ ءَ پَد دل ءَ پہ گِندگ ءَ اُومان کُت ،بَلئے منا گُمان نہ بوت کہ واجہ ءِ پُرمھریں دیوان اے داب ءَ نَسیب بیت.
دُو ھَزار ھَپت ءِ سال اَت کہ منی سر تیابی دَمگ ءِ شہر اُورماڑہ ءَ کپت، گُڑا بلوچی وانگ ءِ ہُوشام پُروشی ءَ منا ماں شہید سنگت نسیم جان ءِ کِبین ءَ سر کُت کہ آئی ءِ گورا بلوچی ماھتاک کوئٹہ،سچکان گوادر،گوانک ءُ دگہ بازیں کتاب پہ وانگ ءَ ایر اَت. پہ بلوچی کتاب ءِ ھُب ءُ واھگ ءَ منی ءُ شہید نسیم جان ءِ سنگتی بُنگیج بوت ،ھَمُک بیگاہ دیوان ءُ آجوئی ءِ کںسّہ آرگ بوت.
یک روچ ئے آدینگ ءِ بیگاہ اَت کہ من چَہ نسیم جان ءَ پُرس اِت تو واجہ گوس بہار ءِ ھالاں بِہ دَئے باریں واجہ چتور اِنت؟ .گڑا شہید نسیم جان ءَ منا ھمے پَسّو دات ءُ گُشت کہ واجہ وش ءُ سلامت اِنت،وھد پَہ وھد مئے گوں واجہ ءَ گپ ءُ تران ،ھال ءُ اہوال ،دیوان بیت. ھمے پئیم روچ ءُ شپ پِرگوزان اِتاں کہ چَہ نسیم جان ءِ سنگتی ءَ اُورماڑہ ءِ بازیں شاھر ءُ نبشتہ کار ءَ گوں منی سنگتی بِندات بوت ،بَلئے چہ دُرستان گیش من گوں سلیم بزگ ،شریف سونو ءُ نسیم جان ءَ نزیک اِتاں. وھدئے ما یکّے دومی ءَ ہَوار کپت اِیں گُڑا بَشام ہُوٹل مئے شاھری ءُ شئیرانی وانگ جاہ اَت.
ھَمے وڑا مئے شئیر ءُ شاھری ءِ پُرکئیپ اِیں دیوان برجم اِتاں کہ یک روچ ئے شریف سونو ءَ منا ھمے گُشت کہ باندا واجہ گوس بہار ءِ پاگواجہی ءَ مئے شاھری دیوان ئے بُوَگ ءَ اِنت تو وتا جاڑیگ کن سُھب ءَ من ءُ تو یکجائی ءَ دیوان ءَ رویں. چُش کہ اے ساھت پَمنّی وڑیں یک نوک بائندیں شاھرے ءَ چَہ گُلباگ ءَ دیما تِر اَت. ھمے ودار ،ودار ءِ تَہ ءَ شپ ءَ وتئی شار بُوتک ءُ سُھب ءِ نُگرّھیں بَرمش تالان بوت ،من گُشاد ،گُشاد ءَ وتا گیگ ءُ گوم کُت ءُ بَشام ہُوٹل ءَ سونو ءِ وداریگ بوت آں. کسانیں ساھت ئے ءَ پَد سونوآتک، من ءُ آ دیم پہ دیوان ءِ نیمگ ءُ راہ گِپت اِیں. وھدئے ما دیوان ءَ سر بوت اِیں تہ واجہ گوس بہار گوں لَہتیں سنگتاں دیوان ءَ ساڑی اَت. مئے چہ سلام ءُ دروت ءَ رند واجہ ءَ پہ بچکندے دِرائینت سونو اے ورناہ ءِ پَجّار ءَ بکن! گُڑا سونو ءَ منی پَجّاروکی گوں واجہ ءِ ھَمبرائی ءَ ہَوار سرجمیں دیوان ءَ کُت کہ اے کئے اِنت.
سنگت یک،یک ءَ دیوان ءَ ساڑی بوھان اِتاں کہ دیوان وتئی بُنگیجی اَدار ءَ سر بوت ،جارچینی ءِ ڈُبّہ سلیم بزگ ءِ کوپگان اَت کہ یک پہ یک شاھراں توار جَنان ءُ شئیر وانوکائی اَت. وھدئے پہ شئیر وانگ ءَ منی نام ءُ باریگ آتک گُڑا منا یات اِنت کہ من اے شئیر ونت
کیچ دیدگانی تُن شال مئے اَرمان اِنت
پَہ بلوچستان ءَ ساہ مئے کُربان اِنت
چہ اے شئیرے وانگ ءَ پَد واجہ ءَ گُشت دگہ یکّے انگت بوان،چہ واجہ ءِ مھروانی ءَ یک لَچّہ ئے من ونت. وھدئے دیوان ءِ گُڈی ءَ واجہ پَہ شئیر وانگ ءَ جاڑی بوت، گُڑا واجہ ءَ.دیوان ءُ سنگتانی گُشگ ءِ پَد ءَ دو ،سے شئیر ونت. بلئے یکّے منا یات اِنت کہ آھگی اولّی بَند ( مطلع) چو اے وڑ اِنت.اگاں رَد بوت پہلی لُوٹ آں .
پِسّں ءَ بَندی بکن ئے مَکّھیں ماس ءَ بِجن ئے
سَرجمیں راجے اگاں تو پہ دِلاسہ بِجن ئے
گُڑا ھمے داب ءَ منی ءُ واجہ ءِ نزیکی ئے بِنا بوت کہ برے برے سُھب ءُ بیگاہاں شہید نسیم جان ءِ کِبین ءِ ساھگ مئے نِند جاہ اَت. پدا وھدئے من دیم پہ وتئی دَوار ءِ نیمگ ءَ سر گِپت آں واجہ ءَ منا پہ سوگات وتئی وانگی ” دَریاب” شات کُت. من کہ وتئی ھَند ءُ دمگاں آتکاں گُڑا پَدا مزنیں مُدّتے ءَ منی ءُ واجہ ءِ یکجائی ، ھال اہوال نہ بوت.
ھمے پئیم وھد دیما کِنزان اَت کہ دُو ھزار چاردہ ءَ بلوچ راجی گل ” بلوچ نیشنل موؤمنٹ ” ءِ راجمان پَتّر(مرکزی کونسل سیشن) ءِ دیوان بوت کہ واجہ ھم گون اَت،بزاں اے منی وش بہتی ات کہ یک رندے پدا دوچار کپت اِیں. چہ راجمان پَتّر ءِ
ھَلاسی ءَ پَد ما یکجائی ءَ نِشت ءُ یکّے دومی ءَگوستگ اِیں یاتانی یاتگیری کت کہ دیریں مُدّتے ءَ دوچار نہ کپتگ اَت اِیں.
بَلئے! اے گِند ءُ گِدار ھم اَدارُوکی اَت چہ راجمان پَتّر ءِ ھَلاسی ءَ پد ھر یکّے دیم پہ.وتئی ھَند ءُ دمگان سرگِپت ،ھمے وڑا واجہ ءَ ھم مارا پہ مھروان اِیں بِچکندے مُوکل کُت.
اے دَرگت ءَ بلوچاں راست گُشتگ” مَرد رَونت مَردانی نِشانی ایر بنت ” مرچی واجہ گوس ءِ جند مئے میان ءَ ساڑی نہ اِنت بَلئے واجہ ءِ گوھریں کار ءُ کارپد پہ دائمی مان اَنت کہ واجہ ءَ پہ بلوچی زُبان ءُ راج ءِ ھاترا چونیں جُہد ءُ جَپاہ کش اِتگ ، چونیں سکّی ءُ سوریانی دیمپان بوتگ. پہ راجی کارانی دیمروئی ءِ ھاترا واجہ زندان ءَ ھم برگ بیت بلئے واجہ ءِ پگری ڈیل ءُ بالاد ءِ پُروش دَیَگ ءَ دُژمن سوبین نہ بوت. چیاکہ یک کاملیں انسانے ءِ پُروشگ ءُ نِزور کنگ وسی گپّے نہ اِنت ،پمشکہ من گُش آں واجہ گوس یک کاملیں انسانے اَت.
اے گپ مرچی ھرکسی دیما چو روچ ءَ پَدّر اِنت کہ واجہ چو لگورانی داب ءَ پہ وتئی ساہ ءُ زندمان ءِ ساٹگءَ گُلائیش نہ اَت کہ منی زند بِہ رکّیت بلوچ راج ءُ بلوچی زُبان وتئی کار ءَ وت زانت. بلکیں واجہ دائم چو تُنّیگیں سید ءَ ہُوشامی اَت ءُ زُبان ءَ ھمے گُپتار اَت کہ زُبان ، راج ،وتن. پہ ھمے تُن ءِ پُروشگ ءَ دائم سرگردان اَت کہ دل ءِ واھش ءُ ارماناں پیلو بکن آں ءُ سارتیں گینسارتے بِہ کشّاں بَلئے چُش نَہ بوت. چیاکہ واجہ ءِ بازیں کار اَنگت نیم بُندگ ءُ پُتینکانی باہُوٹ اَنت کہ راجی اَمانت اَنت.پمشکہ واجہ ءِ پش کپتگ اِیں کارانی چِن ءُ لانچ ،دیما برگ ءُ سرجم کنگ مئے کُلانی راجی ذمہ واری اِنت.
بلوچی زُبان اے کوھیں کلات ، بود بکش اِیں نُگرہ دَرنز ،کھربا دانکیں گسد گُپتار مَدام پہ سنگتاں مھروان اَت. منی نَد ءَ چُش اِیں لبز نیست کہ واجہ ءِ کرد ءُ بودناکی ءَ بیان کت بکن آں ،بَلئے لہتیں اَنچیں یاتاں کہ نِبشتہ کنگ پَرمائینت. چیاکہ واجہ ءَ اے دراجیں پَند ءَ بازیں سکّی ءُ سوری ، اڑ ءُ جنجال اُوپار کُتگ ءُ سبر ءِ گرنچ ءَ گرھن داتگ اَنت بلئے کدم پہ دیمے جُنزگ ءَ مھتل نہ بوتگ اَنت.
بگندئے منی اے چاریں دانک پہ واجہ ءِ تمردیں بالاد ءَ راستی ءِ گواہی مہ بنت ،چیاکہ واجہ ءِ
سسّا ءُ زانشت ءِ زر چہ منی زانت ءِ گواز کنگ ءَ ھما دست اِنت. پمشکہ من چہ واجہ ءِ ارواہ ءَ پَہلی لوٹ آں. گُڈی ءَ گوں واجہ ءِ پِربَند ءَ!
جِند ءَ برئے کہ زند ءَ برئے یا بہار ءَ بر
زہیراں وتئی مہ بر کہ منا گران ءَ کپتگ اَنت
