شہید معصوم بلوچ
ندکار: لیاقت بلوچ
دی بلوچستان پوسٹ
بنی آدم ءِ پطرت تہا بازیں سنچ ءُ زانت ہست ہماہانی تہا سوبمندی ءُ ناکامی ءِ ھبر چیر اِنت. یک چاگردے میان ءَ اگاں ما بچاریں گُڈا مارا ہر رنگیں مردم دیم ءَ کئیت، بازے پہ چاگردے دیمروی واستہ جہد کنت بلے لہتیں مردم بنت گُڈا ءَ ہمے ترقی پسندانی راہ ءِ دیم ءَ رکاوٹ بی اَنت.
چاگرد حراب کنوک ہما انسان اِنت کہ ءَ چاگردے دیمروی ءَ نلوٹیت بلکہ یک قدامت پرستے بیت ہما کوہنیں نظام ءَ پدا آرگ لوٹیت، بلے دومی نیمگ ءَ ترقی پسنداں ہر وھدا چاگرد ءِ دیمروی واستہ کار کُتگ تاں زندگ ہست بوتگ اَنت، شہید شاہد ہما مردماں چہ یکے ات کہ آئی ءَ چاگرد ءِ دیمروی واستہ وتی وشیان ءَ ندر کُت ءُ کازماس تہا وتی ءُ راج واستہ یک نامے اِشت. وتی ماتیں سرزمین ءَ گوں مہر ءُ محبت کنگ آئی وشیانی توکا گم ءَ راہ ندیگ وتی نُگرہیں جان ءَ قُربان کنگ یک حقیقیئں جہدکارے کار اِنت.
وتی سرزمین ءِ ہر چیز ءَ گوں مہر ءُ محبت کنگ ءُ ہر چیز ءَ رکینگ ھاترا وتی وشیاں ندر کنگ یک جہد کارے کار زانگ بیت. بلوچستان ءِ توکا ہر مات گوں وتی بچانی گماں گوں اوژناگ ورگ ءَ اِنت، گُشے یک ہنچیں زِر ءِ ءَ سر کپتگ اچ اوداں واتر کنگ بوت نکنت. وتی وشیاں ماندارگ ءُ ماتیں وطن ءِ گاماں گوں ہمگرنچ بوہگ ہر سرمچار ءُ ہر بلوچ ءِ واستہ اژدری اِنت. سرمچار ہما تمردیں ءُ بامردیں مردم اِنت نہ وتی واستہ لوگ چارتگ نہ مات نہ گُہار آئی ءَ وتی سجیں ماتیں وطن ءِ مردمان آں وتی برات مات گُہار کُتگ ءُ آھانی وشحالی واستہ جہد کنگ ءَ اِنت. مرچی ہر ہما سرمچار کہ کوھاں نِشتگ ءُ جنگ ءَ اِنت آئی ءَ گوں ماتیں وطن ءِ ھاک ءَ گوں ہمے سوگند کنت کہ تاں مرگ ءَ تئ حفاظت ءَ کناں. مرچی مئے ثقافت، دود ربیدگ ءُ راج دپترءِ زندگ دارگ واستہ وتی نُگرہیں جاناں سرمچار ندر کنگ ءَ اَنت آھانا گوں ماتیں وطن ءِ ہر ہما ءَ چیز ءَ گوں مہر محبت اِنت.
محبت یک ہنچیں چیزے ءَ گوں ہر چیز ءَ بیت بلے مرچی مئے محبت یک بزگیں ءُ گُلامیں راجے ہر ہما بزگ شپانک ءَ گون اِنت کہ آئی حق مرچی زوراک برگ ءَ انت، ہمیشانی رکینگ واستہ مئے تمردیں سرمچار شاہد جان ہم آوار ات. اگاں ما شہید ءِ لوگ مردماں بچاریں آھانی حالاتاں کہ مرچی ءَ چونیں زِندے گوازینگ ءَ اِنت، مئے دل ءَ الّم یک دردے ودی بیت پرچاکہ ہر روچ گوں ہرساں گوزیت ءَ لوگ ءِ مردم پہ وتی مردمانی واستہ چِنکس تلوسنت. شہید معصوم مئے راجی سروک راہشون واجہ اختر ندیم ءِ براس کوپگ اِنت کہ آئی چہ شہید معصوم پیسر دو براس آئی کاروان ءِ ہمراہ بوتگ انت ءُ شہادت نوش کُتگ اَنت. وتی معصومی وجہ ءَ چہ آئی نام معصوم ایرکنگ بوتگ. آئی ءَ ہر وھدا گُشت کہ اگاں دژمن ءَ مرچی مئے براتان ءَ شہید کُتگ اے مئے واستہ اپسوزی ھبرے نہ اِنت پرچاکہ مئے برات یک عظیمیں مقصدے واستہ قربان بوتگ اَنت آھاں مئے واستہ یک راہے کیشینتگ دیم ءَ آئی ءَ گُشت دژمن اگاں مارا شہید کنت گُڑاں مئے سوچ نظریہ ہست بنت آھاں کدی کُشت نکنت پرچاکہ سوچ نظریہ جدوجہدانی تہا ایوکا منی نبنت اِدا ہزارانی واب ہستنت ءُ مئے ملک ءِ آجوئی ءَ الّم آسربیت. دیما گُشت اگاں منی شہید بوہگ منی ملکیت ءِ ہر ہما چیز پہ بلوچ راج ءَ درکار اِنت گُڈاں الّم آئی قربانی دیاں. تمردیں ورنا شہید معصوم بلوچ گوں وتی جوش جزبہ آں گوں جنگ کُتگ ءُ جنگ کناں وتی ماتیں وطن رکینگ ھاترا وتی نُگرہیں جان قربان کُت. مئے راجی شہیدانی ھون کدی شموشگ نبنت شہید ہما تمردیں مرد اِنت کہ آئی ءَ ہمے گواہی داتگ کہ مئے راج یک زندگیں راج اِنت ءُ وتی حق واستہ آواز بُرز کنگ مئے پرض اِنت. شہید معصوم بلوچ 1 اگست 2016 ءَ شہید بوت.
