بلوچستان نیشنل پارٹی کوئٹہ کی رہنماء ریحانہ جالب بلوچ کا خواتین عہدیداروں سمیت کلی قمبرانی کا دورہ
دی بلوچستان پوسٹ کے کوئٹہ نمائندے کے مطابق بلوچستان نیشنل پارٹی کوئٹہ کی رہنماء نے دیگرخواتین عہدیداروں سمیت کوئٹہ کے کلی قمبرانی کا دورہ کیا۔ دورے میں مقامی لوگوں سے بات کرتے ہوئے ان کا کہنا تھا کہ علاج معالجے کے درپیش مسائل ماضی کی حکومتوں کے مجرمانہ غفلت کا نتیجہ ہیں ۔
انکا کہنا تھا کہ صحت کی بہترین سہولتیں دینا حکومت کی زمہ داری ہے لیکن بدقسمتی سے نام نہاد عوامی نمائندوں نے جس طرح بلوچستان کے عوام کا استحصال کیا اس کا سامنا بلوچستان میں بسنے والے عوام کو رہا ہے ۔
ریحانہ جالب نے کہا کہ عوام پچیس جولائی کو اپنے ووٹ سے بی این پی کو کامیاب کریں۔ ان کا کہنا تھا کہ ہم اسمبلی کے ایوان میں صوبے کے اس دیرینہ مسئلہ پر نہ صرف آواز اٹھائیں گے بلکہ عوام کے نمائندے کی حیثیت سے یقین دلاتے ہیں کہ صوبے کے ہر ضلع اور کلی میں جس حد تک ممکن ہوا طبی سہولتوں کی فراہمی کیلئے کوشش کریں گے ۔
عوام کے سوالات کےجواب دیتے ہوئے ان کا کہنا تھا کہ عام شہری کی حیثیت سے ہم سب جانتے ہیں کہ لوگ کس طرح اپنی محنت سے کمائے پیسوں کو کراچی ، سندھ یا پنجاب کے اسپتالوں تک پہنچنے، قیام اور علاج پر خرچ کرتے ہیں ۔
