ہوارکاری ءُ راجی اوست
نبشتہ کار-حنیف بلوچ
دی بلوچستان پوسٹ : بلوچی کالم
بلوچ راجی جنز کہ وتی دومی دہکءِکنڑگءَ آ دست بوہگی اِنت ،بلوچ راجی آجوئی ئے گلانی رہبندی توجیلءُ وت ماں وت ہوارکاری، بُنجاھیءُ جہلی ادراہانی توانءُمہکمیءِ بابتءَ چار دانک شمے دیمءَایر کنگ لوٹاں، چیا کہ راستیانی پدراہی وت پہ توجیل سازیءَ مستریں سر شونے ۔۔
گوْستگیں ہبدہ ءُہژدہ سالءِ یکشلءَ برجاہیں بلوچ راجی آجوئی گلانی پسگانی داتگیں دیمہونیاں وتی راج ئےتہایک مہکمیں بیسہ یے ودی کتگ کہ مرچی بلوچ مہلوک پہ آہانی ہاترءَ اچ وتی سرءُ مالاں سرگوْستگ، وتی راجی جہدکار ءُ سرمچاراِش ماں چمانی تہاجاگہ داتگ انت
کسےءَ اوں دلمانگیں گینسارتے نہ کش اِتگ کہ آجوئیءِجہد کجا رستگ؟ چون رستگ؟ راجکاریءَ پہ توجیل سازی چے بوھگءَ اِنت؟ ءُآئیءِ برورد پہ لس مہلوکءَ چے اَنت ؟
بس آجوئی ئے نام پہ مہلوکءَ وت دیمہونیانی یک پیمانے بوتگ،
بلے مرچی ہمے پیمان ئے هاٹیگ مارا دروہان انت، نو مارءَ جیڑگ لوٹیت کہ پرچہ ۔۔؟
منی جند میان استمانی راجکاری جنزانی باوستءَ چہ انچو آشنا نہ اِنت چیا کہ من میان استمانی آشوبی لٹریچر پہ دلءِ پیمءَ نہ ونتگ انت ،چم کپتی کتابے،آرٹیکل ءُ نبشتانکے دیمءَ گوستگ گڑا چمشانکے داتگ
آ ہم پہ سرسری پہ بُن شونءَ کدی ہم نہ جیڑاتگ کہ وتی ستا ءُ توسیپءَ بکناں، پرے ہاترءَ کس منی گوشءَ تاب نہ دنت، بلے بے بُنیں دروگ منی راجی جہدکاریءَ پہ داگے بیت ءُ منی جندءِ ستک کہ منءَ چہ ردیانی کیدءَ رکینتگ یے ژند ءُ ژول بیت۔
چونائیءَ مئے وڑیں بےپوہءُ نابِزانتیں مردمانی نبشتہ ءُ لیکہاں پہ کس وتی وھدءَ زیاں نہ کنت بلے لہتیں راستی اَنت کہ آھاں آشنا کنگ لوٹاں۔۔ یک کسانیں جہدکارےءِ بستارءَ من ہمےسرپدباں کہ بزگیں مہلوکءِ تب ءُ واھگانی داتگیں دیمہونیانی مُزاں کلاگ زیرگ ہم پَتّ بوھگءِ نام اِنت، چونائیءَ ہمکار بوھگءُ ہوارکاری راجی زندمانءِ رکینگءِمستریں توجیل اِنتءُ تپاکی منزلءَ پہ سر بوھگءُ سوب مندی ئے نام اِنت، پمیشکہ لس مہلوک ءُ ہما دیمہونی دئیوکیں مردمانی چم راہی اَنت کہ کدی وشیں بانداتےءِ بام ٹِک دنت، بلے منی نزءَ اے رنگیں ہوار کاری (اشتراکِ عمل) ہچ دردءِ دوا بیت نہ کنت، وھدے کہ یک گلّے ئےجندءِ تہی جیڑه ہما گَل ئے جند ءَ پہ مہکمیءَ میل انت ، یک بُن رہبندے کہ پہ کُلیں باسکانی ہمکاریءَ بُن شون مہ بیت گڑا گوں ایندگہ گلاں ہمکارءُ ہم پَت بوھگءِ مانزمان چے اِنت۔۔؟ اشتراکیتءِ میارچے بیت کنت۔؟ بلوچءِ جہد کہ مرچی داں اےہدّا سر بوتگ، آئیءِ مستریں سوب مندی بلوچ راجءُ شہیدانی داتگیں دیمہونی اَنت ءُ اے گپ ءَچہ کسے ہم شمشکار بوت نہ کنت کہ گار ءُ بےگوْاہیں بلوچ رہبر ءُ جہدکار کہ بازیں کساسےءَ زندانءَ بندیگ اَنت رسترءِ زوراکیانی دیمءَ چو کوہءَ مِک اَنت ہماآنی میار ءُ منت اِنت، بلے ماپہ اے دیمہونی دیمءَبرگ ہاترءَ چےکتگءُ چےکنگءَ ایں؟
راج پہازیں گَلانی سروکاں بگر داں یک نوک اتکگیں سنگتے گوں دژمنءَ پہ بیر گیریءَ جنگ کنگءَ انت آھانی لیکہی توان پہ راجی ھُنڈالانی مہرءُ مہکم کنگءَچے اِنت ؟ یک چشیں نیٹورکے پہ درور ما بگندیں کہ توجیل سازیءُ گلءِ رہبندانی پلہ مرزیءَ پہ وتی لانک ئے بستگ ءُ جاڑی اِنت ، زیلی ادارہ کُجام کش ءُ چیلانی آماچ اَنت؟ بزاں لوگےءِ ہم پت بوہگ چہ میتگ ئیگ ءَ ہژدری اِنت پیسر تر کنگی اِنت بلے مرچی بلوچءِ مستریں پارٹی کہ ماس پارٹی ئے نامءَ زانگ بیت ،مزنءَبگر داں کسانءَ درءَ گلءِ لوٹءُ گزرانی چے کچءَ داں پاسدار اِنت راجءِ ابدمانیءَ پہ توجیلےءِ سازگءَ آئیءِ کنٹریبیویشن چے اِنت ؟
بنزہءَ بگر داں ہنکین ،دمگ ءُ بنجاہءَ بیا راجکاریءِکیلوءَ مروچگیں پُرّ ارزشتیں وھدءَ ماں کُجام پارسنگءَ تورگ بوھگءَ انت،
چوشکہ اُمیتءِ جمک انگت نہ پرُشتگ انت بلے کار کنگ لوٹیت گر ءُدار کنگءُ پہ شریں رھبندےءِ ٹہینگءَ کمو وہد درکار اِنت بلے اگاں چو اللہ ہیر کنت ئے سرا بہ بیت گڑا ہچ نہ مان ایت ھرکس پہ وت گروپے اَڈ دنت ءُ نندایت، پارٹی تنظیم ءُ آرگنائزیشن پشت نہ کپ اَنت، ہئو بزاں لہتیں مردمانی حاکمی مانیت زمینءُ راجءَ پہ نازینک جنوک ھُشک ءُ ھدابنت بلوچ ءِ ہما راجکار کہ وت ءَ بلوچ زندمان ، راجی پجار ءُ بلوچ ءِ ہستی ءِ پہریزوک گُشنت ۔
اچ سرکماشی ءُوت گَلائی چے در بیاانت پہ راجی جہدءَ شریں راہءُ رہبندے اڈ بہ دیئنت ، کُلیں ہواریءَ یک مہکمیں ادارہے بہ ٹہیننت درستیں سروک، سرکماش، ورکرءُ سپاہی کُل ادارہءِ جوڑبیتگیں پالیسیانی سرا کار بہ کن اَنت، کش ءُ چیل باز بوتگ چو مہ بیت واجہانی تلمب وتی سارتیں ساھِگءَ پیتاپ بہ کنت چمگانی آپ ءُ مہلوکءِ اوپار آشوبءِ تہا دگہ آشوبے بہ رودین ایت، رندی ئیں پشومانیءَ چہ پیسر وتی ادارہی کاراں گوں ترندیءَ بندات بکن انت ،گِلہءُ گواھیءَ پُشتءَ بہ دار انت ، یکجہتی سوب مندی ءِ چیدگ اِنت۔
امیت کناں کہ شہیدانی جہدءَ گوں نوکیں رہبنداں بُنگیج کن اِت ءُ بلوچ ءِ وشیں بانداتءَ پہ اُمیتءِ چراگےبلین اِت راجی تپاکی ءُ آجوئیءِ جہد گوں نوکیں رہبنداں امیتءِ نگاہاں بامءِ مستاگے بہ بات
بلوچستان آجوبات۔
راجی تپاکی، ہمدستیءُ ہمکوپگی شالا بہ مانات ۔
