پاکستان تحریک انصاف کے صوبائی رہنما میر عطاءاللہ کلپر نے اپنے بیان میں کہا ہے کہ صوبائی وزیرداخلہ سرفراز بگٹی نے سوئی کے عوام کو سیاسی انتقام کا نشانہ بنانے کا آغاز کردیا ہے اور اس سلسلے میں اسسٹنٹ کمشنر سوئی اور ایس ایچ او پولیس نے لیویز اور پولیس کے بھاری نفری کے ہمراہ مختلف کاروباری مراکز اور دکانوں سمیت کئی گھروں کو بلڈوز کرکے سرفراز بگٹی کے انتخابی مہم کا آغاز کردیا ہے۔
انہوں نے مزید کہا کہ سوئی میں زمینیں قبائل کی ملکیت ہیں، مگر سرفراز بگٹی پر تو جیسے سیاسی انتقام کا بھوت سوار ہوگیا ہے۔ ڈیرہ بگٹی اور سوئی کے عوام نے ان کو اور ان کی سیاسی پارٹی (باپ)کو چونکہ پوری طرح مسترد کیا ہے، اس پر وزیر داخلہ کو بھرے محفل میں انکار کردیا گیا تھا۔ اس پر وزیر داخلہ چراغ پا ہوگئے ہیں اور سوئی کے کئی علاقوں کو کھنڈرات میں تبدیل کردیا ہے۔ پیپلز پارٹی کے رہنماء اور میونسپل کمیٹی سوئی کے وائس چئیرمین میر موسم بگٹی کو بھی سیاسی انتقام کا نشانہ بناتے ہوئے ان کی رہائش گاہ کو مسمار کردیا گیا ہے۔
انہوں نے مزید بتایا کہ ہم سرفراز بگٹی کو چیلینج کرتے ہیں کہ ان میں اگر ذرا بھی جرات ہے تو وہ سیاسی میدان میں آکر ہمارامقابلہ کریں۔اس طرح ناجائز تجاوزات کے آڑ میں بزدلوں کی طرح چھپ کر وار مت کریں اور ہم انتظامیہ اور پولیس سے بھی کہتے ہیں کہ لوگ پولیس اور انتظامیہ کی قدر کرتے ہیں اور وہ سرفراز بگٹی کے سپاست کے ڈوبتے سورج کے ساتھ اپنے ساکھ کو متاثر نہ کریں۔کیونکہ آئیندہ آنے والا دور انشاءاللہ ہمارا ہوگا کیونکہ سرفراز جیسے سیاسی لاوارث کو اب ڈیرہ بگٹی کے عوام مزید برداشت کرنے کے لئے ہرگز تیار نہیں ہہیں۔انہوں نے صوبائی حکومت سے مطالبہ کیا اس معاملے کی تحقیقات کرائی جائیں اور غریب عوام کے نقصانات کا فوری طور پرمعاوضہ ادا کیا جائے تاکہ وہ ماہ مقدس میں اپنا اور اپنے بچوں کا پیٹ پال سکیں۔۔
