بلوچ راجی تنظیم آتا اواری
نوشت: کامران بلوچ
دی بلوچستان پوسٹ – کالم
(براہوئی)
قومی تحریک آک سال آتا سال برجاء مسونو، ہزار آ بندغ آتا قربانی تیتون اوار ہمو تحریک آک سرسہبی خنانون ہرافک وخت ئتون اوار تینا نزوری تے پہہ مریسہ اوفتت ایسر کرینو و تینا ادارہ غاتے مُست آن زیات منظم کرینو، منظم ءُ پالیسی تیتون تینا کاریم تے برجاء تخانو۔
بلوچ وطن آ تدوکا ہفتاد سال آن پاکستان تینا زوراکی تون کوزہ گیر ءِ۔ دا کوزہ گیری نا خلاف جتا وختا آتیا بلوچ قومی جہد تینا شیفی بڑزی تیتون دروشم اسیٹی ساڑی مسونے۔ آغا عبدالکریم خان و نواب نوروز خان تینا سنگت آتیتون دا جہد ئنا بنا ءِ کریر، و اوفتا ہمو آذاد آ وطن نا دوئی کننگ نا فکر مُستی برجاء مس۔ وختس دا سوچ ءِ جنرل شیرو مری و اونا سنگتاک تینائی کریسہ تینا کوپہ غاتیا دا زمہ و اری ءِ ارفیر تو وختس قبائلی سردار آتا اثر نا سوب آن نوزدہ سد و ہفتاد نا دروشم اٹ قومی جہد پد تما و اسیکہ وا بلوچ قوم بے اُمیت مریسہ کسر اُروک مس۔
دا تیوی آ شیفی بڑزی تیان گڈ اسیکہ وا بلوچ وطن نا آزاتی کن جہد کاٹم ارفے، خیال اندا کننگا دا وار جہد اٹ مُست ئنا کمبوتی تیکن ہچو ہند اس مفرو مطلب تدوکا وخت آتیٹ ہرا نزوری تا سوب آن بلوچ جہد نسخان کُنگ و جنگ سلیس و اوکان گڈ اسیکہ وا جہد اول آن بناء کننگا۔ دا وار خیال اندا اس کہ جہد قبائلی سوچ آتیان پیشن مریسہ لس آ بلوچ ورنا تا دوٹی بسونے ہرانا سوب آن نہ بیرہ ریاست جہد ءِ ایسر کننگ کپرو بلکن ورناک منظم ءُ دروشم اسیٹ دا جہد ءِ مُستی روان و برجاء تخور۔
دا وار جہد اٹ الّمی تسلسل خننگ اٹ بسونے، مننگ کیک دا اسہ نزورو ڈَول اسیٹی برجاء مسونے ولے گچینا ہیت دادے کہ جہد برجاء مسونے و جہد نا برجاء سلینگ ہم سرسہبی نا مستائی تیٹ حساب کننگک۔ ولے دا برجاء آ جہد اٹ بھاز آ شیفی بڑزیک ہم بریسہ کرینو ہرافک بھازا سوج آتے بلوچ قوم اکن ہلانو و دا سوج آتیٹ بھازاک اندنو کہ اوفتا ورندیک دائسکامونا بتنو۔
دنکہ بی ایل اے آن یو بی اے نا جوڑ مننگ و دا ویل ئنا زی آ تنظیم آتا نیامٹ جنگ کننگ، سوشل میڈیا ٹی ایلو تنظیم آتیا و خاص کر بی ایل ایف آ تضاد نا پِن اٹ چک و تاڑ ئنا بناء کننگ، قومی جہد ءِ یلہ کریسہ سلاء بٹنگ (سلاء بٹنگ نا رِد اٹ ریاست نا پارہ غان ڈرامہ بازی تینا جاگہ ولے منہ حقیقی آ جہد کار آتا دا ڈرامہ نا گواچی مننگ سوچنگ نا ہیت ئسے)، اندن بی ایل اے ءِ اسیکہ وا‘ اِرا بشخ کننگ نا کوشست، تنظیم آتا زی آ فرد آتا ہیت آتا گڈّو مننگ کُون آ سوج آک اوار ءُ ہرافتا ورندی کس دا وخت اسکان پاش وڑ اٹ تتنے۔
دا تیوی آ نزوری و کمبوتی تیان بیدس ہم بلوچ جہد تون مخلص ءُ منہ بندغ تینامخلصی ءِ نشان تریسہ تنظیم آتا نیامٹ سیوت (اتحاد) نا عمل ئسے نا بنا ءِ کریر ہرانا گچینو اثر اس ایلو تنظیم آتیا ہم تما۔ دا رِد اٹ اولیکو گام ءِ بی ایل اے و بی ایل ایف نا راہشونک ارفیر، و سیوت کریسہ اسٹ ایلو تون کمک کننگ نا پڑو ءِ کریر۔ دا عمل نا گچین پاننگ آن کس اس نمّن مننگ کپک و دا رِد اٹ گدرینگوکا دے تیٹ بھاز آ ہند آتیا بی ایل اے و بی ایل ایف تون تعلقدار آ ورنا تا اسہ جاہ کاریم اسہ پاش ءُ شاہدی ئسے و داڑان الّمی بلوچ خلقت اٹ اُمیت اس ودی مس۔ اوکان گڈ اندا عمل اٹ بشخ ہلیسہ بی آر اے، یوبی اے و لشکر بلوچستان اسٹ ایلوڑتون سیوت کریر، و ہر پڑا اسٹ ایلو ءِ کمک کریسہ جہد ءِ مستی سوگوی بشخنگ نا ہیت ءِ کریر۔ تنظیم آتا نیامٹ سیوت مننگ ہراکہ بلوچ قوم نا اُرے نا اُست خوائی اس ئس، تیوہ غا قوم اٹ اسہ پوسکنو اُمیت و حوصلہ اس ودی مس۔
منہ دے مُست دا عمل اٹ اوار مریسہ بی ایل اے و بی ایل ایف نا نیامٹ مروکا سیوت اٹ اسہ پین راجی لشکر اس، بی آر جی ہم اوار مس۔ دا اواری ہم ہمو ارفوکا گام تاسوب آن مننگ کرے ہرانا بناء ءِ اندا تنظیم آک کریسُر۔
راجی تنظیمی آتا نیامٹ سیوت اسہ گچینو ہیت ئسے ولے دا سیوت ءِ ہر پڑ آ کاریم تا دروشم اٹ نشان تننگ نا خواست ہم تینا ہند آ ساڑی ءِ۔ بھاز آ تنظیم تا پارہ غان اواری اٹ کاریم مننگ ءِ ولے دا کاریم تے مستی پین زیات شابیت ءُ پڑ ئسے آ تالان کننگ ہم اندا تنظیمی آتا زمہ واری تیٹ اوار ءِ۔ اینو اسہ پارہ غا دژمن نا پارہ غان تینا پورہ طاغت تون زوراکی تا مونا تنظیم آتا اسٹ ایلو تون کمک کننگ اسہ سخت ءُ دیوال اس ثابت مننگ کیک ولے دا تیوی آ گڑاک عملاً کاریم کننگ تون تفوک ءُ۔ اندن دا سیوت ءِ پین شابیت ءُ پڑ ئسے آ تالان کریسہ تیوی آ تنظیم آتا اواری نا بھلا گام ءِ ارفنگ ہم دائسکان سلوک ءِ ہراڑکن قومی راہشون تے مونی بروئی تمو۔تاکہ بلوچ قوم ءِ دا سخت آ حالیت اٹ حوصلہ رسینگہ و بلوچ قومی جہد سرسہبی خنہ۔
