بلوچستان لبریشن فرنٹ کے ترجمان گہرام بلوچ نے نامعلوم مقام سے بات کرتے ہوئے کہا کہ آج بروز اتوار سرمچاروں نے تربت شہر میں شاہ پور ہوٹل کے سامنے آرمی اہلکاروں پر اُس وقت دستی بموں سے حملہ کیا جب وہ ہوٹل میں موجود مہمانوں سے ملنے کے بعد واپس ہو رہے تھے۔ سرمچاروں نے دو ہینڈ گرینیڈ پھینکے جس سے ایک فوجی آفیسر اور ایک سپاہی ہلاک ہوا ہے۔ تربت کے فوجی کیمپ اور ہوٹلوں میں باہر سے آئے ہوئے کئی فوجی اور دوسرے آفیسران سخت فوجی نگرانی میں موجود ہیں۔ تربت شہر میں درجنوں چیک پوسٹوں کی موجودگی میں ایک نام نہاد میلہ کا انعقاد کیا گیا ہے۔ آج کٹھ پتلی وزیر اعلیٰ قدوس بزنجو بھی اسی سلسلے میں شہر میں موجود تھے۔ ہم واضح کرتے ہیں قابض فوج کی سربراہی اور نگرانی میں میلہ غلامی کو دوام دینے کی کوشش ہے۔ غلامی میں کسی بھی طرح کی ترقی ہمارے لئے نہیں بلکہ قابض کی جانب سے غلام ذہنوں کو مزید غلام رکھنے کی کوشش ہے۔ ہم اپنی ثقافت کو ترقی اور میلہ اپنے طریقوں اور آزاد ماحول میں کرسکتے ہیں نہ کہ پاکستانی فوج کے اشاروں پر، جس کے ہاتھ ہمارے خون سے رنگے ہیں۔بلوچ قوم کو اس بات کا اچھی طرح ادراک ہے کہ تقریبات، ترقی اور ثقافتی میلہ بندوقوں کے سایے میں نہیں ہوتے ہیں۔ ہم ایک دفعہ پھر اپیل کرتے ہیں کہ پاکستانی فوج اور پارلیمنٹیرینز کی سربراہی میں ہونے والی تقریبات سے دور رہیں۔
