افسانہ-بولان نا مابت (ارٹمیکو بشخ)
نوشت: گلزار بلوچ
مَٹ: عتیق آسکوہ بلوچ
خلق اٹ باوہ نا ترندہ آ توار حانی ءِ میرو نا خیال آتیان کشّا: “زو کر حانی، بزگل بَننگ ءِ.” حانی اسیکہ وا تینٹ دا جہان نا مُچی نا بشخ اس مس ہراکہ بندغ ءِ ہمیش تینے آن نادرست کریسہ بسونے. حانی بزگل آن دُو خلاس مس کہ لمہ پارے: “حانی ہرانگ اُس، زو کر مدر جوڑ کننگ کن خاخر لگف.”
ولے حانی باوہ نا خُلیس و لمہ نا غُر تننگ آن آزات مسکہ گڑا میرو نا خیال آک اودے بسورہ گیڑ کریرہ. مدر کن خاخر لگفنگ آن گڈ ہراتم حانی خاخر نا رہی آ تُولوک ئس گڑا اسیکہ وا او میرو نا بابت سوچ آتیٹ ئنا. میرو تیوہ غاتیکن اسہ ابدال اس ئس یا بلکن مَنٹ کن بزرگ ئس، درویش ئس یا گڑا مَنٹ کن اللہ نا بندہ یا معصوم یا ہمدڑدی نا لائخ اسہ بندغ اس ولے حانی دا مننگ کن تیار اَلو. لمہ نا واردم آ توار کننگ اودے دا بے گواہ مروکا جہان آن آزات کریرہ و او تینا کاریم تیٹ گٹ مسکہ.
اگست نا توہ ئس، خلق دوزان نا چشمہ آن بڑز شوگ نا مَش ئنا ماس اٹ دائسکان وتاخی ئسوکہ. ننکان نا گہوش آسمان آ گروشک تروکا استاک و چُپی…، اسہ ورناؤ بدن اسیٹی دُن انگا مُد اٹ دِرک تروکا جانکش آک قدرتی مریرہ ولے منہ دے آن حانی نا ننک دنکہ خاچوک آ اسہ بدن ئسے نا ڈَول مننگ ئسر، سوچ آک ہر گڑا آ زوراک ئسر، دے مُچ ئنا ژند آ بدن ننکا بیرم تیا سوچ آتا سوب آن تغ آن باغی ئس. میرو نا بابت تاتی ماہ گنج نا ہیتاک افسانوی ئسر یا گواچنی؟ حانی دا خیال نا پٹ و پول ئٹی ئس.
او خدا جان! امرو کیفیت ئسے. حانی تیوہ غا نن پالو مَٹ کریسہ گدریفیکہ، دے مُچ آ خواری کش آ زند آن بدن نا اُزبہ غاک شَل مریسہ ئسر، اسٹ ایلو تون کُور گرنگ آ خیال آک ئسر، دنکہ روح سرگڑدانی اٹ پیری خلنگ آ مرے.
حانی تینتون اَلو. لمہ، حانی نا دا کیفیت ءِ پہہ مسوسُس. ہر وخت گلوبال و شوخ مروکا حانی، مونجا و تینے ٹی گم مروک لمہ نا خن تیٹ بسوسُس. لمہ باز وار تینے بے پام کرے ولے حانی نا کیفیت داسہ مَٹ مریسہ ئس. لمہ ءِ بے جاراتی پلویڑ کرے. بھاز وار حانی آن اونا طب ئنا سوج کرے ولے حانی پاریکہ ‘لمہ ای جوانٹ.’ دیر ہتنگ کن ہنوکا حانی ہرا ہمیش کسر ٹی گلوبال، ددینگاکہ، فطرت نا عاشق حانی ہراتم سنگت آتیتون دیر اتنگ کن ہناکہ گڑا کسر اٹ شوخی تون ہناکہ، تینتون باگل پاریکہ، مَش تا عاشق اس ئس، پاریکہ:
“ای مَش تیان جوزہ و جیرات ہیل کیوہ، باوہ نا ڈَول مریرہ، ہر حالیت اٹ گَور ءِ بڑز توروک سلوک مریرہ، ہچبر مایوس کپسہ، ننا ودشت ءِ کیرہ.”
حانی فطرت نا عاشق اس ئس یا گڑا فطرت نا اسہ گچینو رنگ اس. ہراتم کچھی آن خراسان یا خراسان آن کچھی کن کاروان آک لڈ و ہنپ کریرہ گڑا حانی تینے بیرفسہ تینا کاروان تو ہناکہ و پاریکہ:
“ننا لڈ و ہنپ خلیس و بیم نا سوب آن مفک و نہ کہ پشیوانی نا درشانی مریک، دا تباہی یا بربادی نا نشانی مفک. داتو مہر نا سفر مریک، دا عشق ئنا کاروان مریرہ، تینا ڈغار تون مہر، تینا تہذیب تون عشق. ہتم نا است خواہی مریک، دا مُد آتیتون مہر نا شاہدیک مریرہ. ای اندا سوب آن تینے بیرفوک سرہلیوہ کہ بولان نا رنگ آتیتون ہمرنگ مریو. دا کاروانک بولان نا زیبائی مریرہ و دا زیبائی نا اسہ بشخ اس مننگ نا کوشست ءِ کیوہ.”
حانی ہراتم دا کسر تیٹ شوخی تیتون ہنیکہ گڑا اندن گمان مسکا کہ قدرت نا فطرت نا زریعہ اٹ تینا وجود نا درشانی ءِ کننگ ءِ ولے داسہ حانی گومرینگوک ئس، فطرت نا رنگس دنکہ تہاری تیٹ اندر مسونے، شوخی تیان پُر آ حانی نا دنکہ تیوہ غا گڑاک لٹنگانو.
گراناز و نوری ہم حانی نا دا حالیت ءِ اوننگ کتویرہ، تینا سنگت کن اوفک ہم فریشان مسرہ. لمہ تا خلق نا بزرگ مامد بخش آن دم ہم کریفے تا ولے دُراخی بخت اٹ متو. شوگ نا مَش ئنا زی آ ‘خان نا مسیٹ’ (خان اعظم میر نوری نصیر خان نا بننگ آ جوڑ کروکا مسیت ہراکہ داسہ اسہ عقیدت جاہ اس جوڑ مسونے.) آ ہم دریتا کہ دیخہ دُراخ مرے ولے حانی اس کہ دُراخی ءِ تتویکہ. حانی گڑاس بے گواہ کریسوس یا تیوہ غا گڑاتے گم کریسوس. خیال آتیٹ میرو نا مسوسُس. لمہ مالو آن فریشان اس حانی کن، داسہ باوہ ہم فریشان مس. ہڑتوماک سلہ کننگ آن گڈ حانی نا برام نا فیصلہ ءِ کریر.
“داوار کانہ کچھی ٹی حانی ءِ برام ایتنہ.” حانی نا باوہ پارے. حانی نا لمہ امنّا کرے ولے دم درود و دارو دواں ءِ برجاء سلوک مس. حانی دنکہ کس ئنا پٹ و پول اٹ ئس. دیر اتنگ کن دوزان نا چشمہ غا ہنوس گڑا اونا خنک میرو ءِ پٹّارہ.
اگست نا تُوہ ئنا دیک ئسر، نوک ئنا ہفت ئس. حانی نا طب دے آن جوان مسکہ ولے ننکان طوبے نا پاش مننگ تون حانی نا طب بد مریسہ ہناکہ، او گدان آن مُر ہناکہ تُوسکہ و طوبے ءِ سیل کریسہ کریکہ. بیرم تیا مروس گڑا پالو تے بدل کریسہ ہناکہ، دڑد اس ئس، بے جاراتی اس، تینون ہلوک تموک ئس حانی، طوفان آتیتون دنکہ تنیا جنگ تننگ اس حانی. مُج ئس، تارمہ غا نن ئس، حانی دے ئنا پٹ و پول اٹ ئس. چانڑدئی آ نن اٹ پنوکا بدن آن حانی نا دڑد زیات مسکہ. طوبے نا شوخی تا زیات مننگ آن حانی نا حالیت زیات بد مسکہ. ننکان تغ نہ بننگ نا سوب آن حانی نا خنک پروک خیسن ہڑسینگوک خننگارہ.
اینو چانڑدہ نا نن ئس. حانی نا طب دیخہ دُراخ خننگاکہ. حانی دے آن دیر کننگ آن گڈ بے شولسہ تینا پوسکنا پچ آتے بیناسُس. اونا چوٹیل ٹی تفوکا گنگرو نا توار و پیشانی آ تموکا پژہ غاک، اُف اللہ! امرو گچینو ندارہ اس ئس. حانی اینو تینا شباب اٹ ئس. لمہ ہم بھاز خوش اس کہ اونا حانی نا طب اینو جوان ئس. لمہ تینا مسڑ نا زیبائی آ ناز ئٹی ہم ئس. انتئے ناز کپروس، حانی خلق اٹ تیوہ غاتیان زیبا ہم تو ئس. مسڑ ءِ کس نزر کپ، لمہ طافو آن دیخہ مونی ارفیسہ مسڑ نا لخ آ اسہ مَونو ٹک اس خلک. حانی نا دروشم چانڑدہ نا طوبے آنبار گروشک تننگ ئس. فطرت نا گوازی اس یا بس تیوہ غا گڑاک بریبر اوار تمنگ ئسر. حانی بیرفنگسہ ئس، دنکہ برامی ئسے.
ننکا گدان نا مونا لگوکا خاخر نا رہی آ تیوہ غاک تولوک ئسر. خاخر نا روشنائی ٹی حانی نا دروشم ٹک تروکا دے آنبار گروشک تننگ ئس. حانی طوبے کن کسر اُروک ئس. شوگ نا مش حانی و طوبے نا نیامٹ بننگ ئس. ہڑتوماتا دنکہ زیبائی نا مقابلہ مروئی مرے.
(برجا ءِ…)
