8 جولائی 1972ء نا سُہب او تینا ہفدہ سالہ ایڑ نا مسڑ لمیس نجم تون تینا گاڑی ٹی تُوس، اندن کہ او کار ءِ سٹارٹ کرے اسہ ترندو تراک اس مس، موساد نا ٹہیفوکا پلاسٹک بمب ترخّا و عربی بولی نا بھلا کسّہ گو، صحافی، راہشون، مزاحمت کار، عکس کَش و عاشق’ غسان کنفانی تینا ایڑ نا مسڑ تون اسہ پُرشور ءُ ڈول اسیٹی تینا بشخ آتیتون اوار دا سلوکا کوڑی آن ہنا. اگہ او زندہ مروس تو 81 سال نا مسکہ. ولے انت او گواچنی کسک؟ ببو دیخس اُرن؛
غسان فائز کنفانی 8 اپریل 1936ء ٹی فلسطین نا شار عکّا ٹی اسہ عیسائی خاہوت اسیٹی ودی مس. اونا باوہ فائز عبدالرزاق کنفانی اسہ وکیل اس ئس. فائز بناء آن سیاسی رِد اٹ متحرک ءُ بندغس ئس و اودے برجائی تون ڈائری لکھنگ نا عادت ئس. او وخت وخت تیوہ غا اُرا والا تے اسہ جاہ مُچ کریسہ تینا زند ئنا اہم آ واقعہ غاتا حوال ءِ دا ڈائری آن خوانسہ بنفیکہ.
پاننگ مریک کہ زند ئنا جدوجہد و لَوز آتا تاثیر نا رِد اٹ غسان نا بنائی ودشت دُن مس. اونا عمر دوانزدہ سال ئس ہراتم اسرائیل ہڈ تننگا و یہودی کوزہ گیر آک عرب آباتی تیا جلہو کریسہ اولیکو دے آن تینا بد آ کاریم تا بناء ءِ کریر.
فلسطینیک اسرائیل نا ہڈ تننگ ءِ “النکبہ” (رسوائی) نا پِن اٹ یات کیرہ. بھاز سال آتیان گُڈ او تینا مار نا پِن آ نوشتہ کروکا چِھٹی اٹ ہمو دے تے بھاز یات کرے. اونا لَوز آتیٹ؛ “ای رسوائی ءِ تینا اُست ئٹی دڑیسہ محسوس کریٹہ، ہڑدے کنا اسٹ نہ اسہ درستی اس سلاء تے دا کوزہ گیر آتا مُونا بٹیسہ اوفتیان تینا ساہ ئنا رَک ءِ دوئی کریسہ فلسطین آن نرّاکہ و کنے لگاکہ دنکہ کنا شَرف نا اسہ پین بشخ اس تالان مسونے.”
ہراتم اپریل 1948ء ٹی عکّا آ باضابطہ اسرائیلی جلہو مس تو گڈ سر اٹ غسان نا خاہوت ءِ ساہ ءِ بچفسہ نرّوئی تما، او اول سر اٹ لبنان نا تاریخی شار صیدا ٹی جہی مسر، اوکان غازیہ، حلب و زبدانی آن مریسہ دوارہ دمشق (شام) ٹی ہندی مسُر.
اونا باوہ لَڈ و ہنپ آن منہ وخت مُست تینا زند ئنا تیوہ غا بچفوکا زَر آتے فلسطین ٹی پوسکنا اُرا نا ٹہیفنگ اٹ خلکوسُس (ہرانا پورہ ہڈ تننگ آن مالو اوفتے اوکان پیشن مروئی تما.) گڑا ہراتم اوفک دمشق آ سر مسر تو منہ لائخی، دیخہ احساس ءِ بے سہبی، بے کچ غم و دیخہ در زر آن بیدس اوفتیتون ہچس اَلو. غسان ہرا منہ وخت ءِ جُگ آتا خلق آتیٹ و اوکان گُڈ بھاز سختی تون گدریفے او اوفتے ہچبر بے خیال کتو. او تینا خاہوت نا بروک آ زر آتے زیات کننگ کن چُنک سنی ٹی لفافہ جوڑ کننگ و عدالت آتا مُونا عرضی نویسی آن ہلیس ریڈیو نا پروگرام، اخبار تا پروف ریڈنگ و نیوز ایڈیٹنگ ڈَول آ کاریم تا بناء ءِ کریسُس. صحافت نا روزگار تو اودے بھاز چَس تس، اندن بروکا زند اٹ اونا تعلقداری وڑ نا وڑ اسیٹ صحافت تون ہمیش تفوک مس.
1952ء ٹی ہراتم اودے اسکول نا سرٹیفکٹ رسینگا گڑا او فلسطینی مہاجرین نا خیمہ نا خلق اٹ ساڑی اقوام متحدہ نا اسہ اسکول اسیٹی ڈرائنگ ماسٹر نا لگّا. انداڑے او بیم نا گواچی فلسطینی چُناتا زند ءِ اسہ کچ ئسے اسکان آسراتی بشخنگ کن اوفتے برجاء ڈول تینا ٹہیفوکہ کسّہ غاتے بنفنگ ءِ بناء کرے. پارہ کہ اونا اسکول ٹی کم و وَد 1200 چنا خوانارہ و اونا خڑکی نا اثر دا ئس کہ اوفتیان ہفتاد فیصد خوانوکاک بھلن مریسہ مزاحمت نا کسر ءِ تینائی کریر.
اندا ہمو کِرن ئس کہ ہراتم اونا اوڑدئی عرب قوم پرستی نا فلسفہ نا اولیکو بنیات تخوک آتیان اسٹ “جارج حبش” تون مس و اونا افکار آتیان متاثر مریسہ غسان اونا جماعت “حرکتہ القومیین العرب” (موومنٹ آف دی عرب نیشنلسٹس) (M.A.N) ٹی اوار مس. اندا دے تیٹ او دمشق یونیورسٹی نا شعبہ عربی ادب ٹی داخلہ ہلک و ’’العرق والدیانۃ فی الأدب الصہیونی‘‘ (صہیونی ادب ئٹی نسل پرستی و مذہبیت نا خواننگ) نا سرحال آ مقالہ نوشتہ کریسہ تینا ڈگری ءِ ایسری تس. 1956ء ئٹی او اسہ سرکاری اسکول اسیٹی عکس گِری نا استاد لگیسہ کویت آ ہنا، ہراڑے اونا ہیڑ فائزہ و اسہ ایلم اس مالو آن ہندی ئسر.
غسان تینا ہیڑ فائزہ تون بھاز مابت تخاکہ و ہمیش تینا سرسہبی تیٹ اونا حوصلہ بشخنگ ءِ اہم تکّاکہ. 1957ء ٹی ہراتم غسان نا اولیکو وار اسہ جہانی اخبار “الرائی” (پَنت) نا ادارت ءِ شنبھالا گڑا اونا عمر بیرہ 21 سال ئس. 1960ء ٹی او بیروت آ بس و M.A.N نا حوالکار (ترجمان) ہفت روزہ “الحرّیتہ” (آزاتی) نا ادبی ادارت نا فرض ءِ ایسری تریسہ کرے. 1963ء ئٹی او “المحرّر” نا مدیر اعلیٰ مس. او جتا وخت آتیا “الانوار” و “الحوادث” نا ادارت و کالم نگاری نا خذمت آتے ہم ایسری تریسہ کرے.
بحیثیت مزاحمت کار او اسہ گوڑیفوکو انقلابی اس ئس ہرا ہچبر اسہ سُم اس ہم خلتو، بلکن اونا سلاء اونا قلم ئس و اونا میدان جنگ اونا اخبار نا دفتر ئس. بناء ٹی او قوم پرست سیاست آ یخین تخاکہ، اندن جمال عبدالناصر نا فلسفئہ متحدہ عرب قومیت ٹی او جُوان کشش محسوس کرے، ولے وخت ئتون اوار اوار اونا خیالات آتا دیم روی مریسہ کرے و او عرب قومیت و ناصرازم آن مریسہ پکا ءُ مارکسی لیننسٹ اس جوڑ مس. اونا سنگت و سیاسی مرشد جارج حبش منہ سنگت نا ہمرئی تون ’’الجبھۃ الشعبیۃ لتحریر فلسطین‘‘ (عوامی محاذ برائے آزاتی فلسطین) (PFLP) نا بنیات ءِ تخا گڑا اودے دا پوسکنا تنظیم نا حوالکار و سیکرٹری معلومداری گچین کننگا. ہموتم او الہدف پِنی اخبار ءِ کشا و مَرک اسکان دانا مدیرِ اعلیٰ مس.
غسان PFLP نا حوالکار نا حیثیت اٹ 1968ء ئٹی آسٹریلوی صحافی رچرڈ کارلٹن ءِ ہرا انٹرویو ءِ تس اونا منہ منٹ نا ویڈیو یوٹیوب آ ساڑی ءِ. انٹرویو اونا پِنی آ داستانی دروشم نا دفتر ٹی تننگاسُس، دیوال آتیا فلسطین نا بھلو نقشہ ئسے نا رہی آ ماؤ، کارل مارکس، لینن و ہوچی منھ نا عکس آک خلوک ءُ، شیف آ جمال عبدالناصر نا اسہ عکس اس ہم ارے ولے تیوی آن بھلا پوسٹر چی گویرا نا عکس ئنا ءِ. ہراتم انٹرویو کروک سوج کرے کہ نی مذاکرات انتئے کپیسہ؟
غسان سوج کرے؛ دیر تون مذاکرات؟
رچرڈ کارلٹن پارے؛ اسرائیل تون.
غسان اسہ ساعت اس ہم اُرے نہ کریسہ پارے؛ نی پاننگ خواسہ کہ لِخ داسہ زمغ ئتون گپ و تران کے؟
اونا زند ئنا گُڈیکو سال آتیٹ اونا سیاسی کاریمک زیات مسوسر. اونا تنظیم PFLP نا باسک آک پوسکن پوسکن کمیونسٹ والا نشہ انقلاب نا جوزہ ٹی داڑا سر مسر کہ فلسطینی مزاحمت ہمو وخت اسکان سرسہب مننگ کپک ہراتم اسکان ہمسایہ ملک آتیٹ مارکسزم نا راج مفک، اندا خاطر اوفک ہمسایہ عرب حکومت آتا (خاص وڑ اٹ اردن نا شاہ حسین نا حکومت) ءِ ری ایکشنری و سامراجی کمکار گوندسہ اوفتا خلاف مسلح جدوجہد ءِ بناء کریر، ہرانا سوب آن دا مس کہ جہان عرب ئٹی فلسطینی مزاحمت نا ہمدڑد آک کم و مخالف آک زیات مسر. تینا ہیت نا گواچن آ مطلب ءِ پاننگ و دادے عرب و غیر عرب بنوک آتیکن ٹہیفنگ نا تیوہ غا بڈ اسٹ آ غسان نا کوپہ غاتیا بس تما. گڑا گُڈیکو مسہ سال اسکان او بھاز زیات ادبی تخلیقات مرتب کروکا دروشم اٹ شینک کننگ کتو.
غسان نا زند ئنا اسہ بھاز دوست بروکو بشخس شامی ادیبہ غادۃ السمان تون اونا افلاطونی ڈَول نا بے کچ عشق ئس. غسان دا وخت آ کینیڈین نژاد زالبول “Anne” تون برامی بیروت ٹی ہندی ئس و غادۃ لندن ٹی ہندی ئس، غسان غادۃ نا پِن آ ہرا چِھٹی تے نوشتہ کرے اوفتا مجموعہ 1992ء ٹی شینک مس، او اسہ اسُل جتاؤ جہان ئسے. روشنائی تا شار و مشرقِ وسطیٰ نا قلب، بیروت، غسان نا دوست بروکا شار ئس.
غسان تینا ایلو بچوکا زند ءِ (چیر زمین تینے ڈھکنگ و منہ پیشن نا دورہ غاتیان بیدس) اندا شار ئٹی گدریفے و انداڑے اسرائیلی نا اندر آ ایجنسی “موساد” نا خونی آ جلہو ٹی او تینا زند ءِ زند آ ندر مننگ نا دوٹی تس. لیمس اونا دوست بروکا ہیڑ ئنا مسڑ ئس، او ہر سال اونا ودی دے آ خاص اوڑکن اونا عمر ئنا رِد اٹ کسّہ نوشتہ کریسہ ٹیکی نا دروشم اٹ تسکہ. اونا کسفنگ نا دے لمیس اوڑتون ئس و دوارہ او ہڑتوماک ایلو جہان نا پند آ ہم اوار سر ہلکر.
غسان کنفانی 36 سال نا عمر اٹ ہراتم دا جہان آن ہنا گڑا اونا کالخوائی ٹی شش ناول، پنچ افسانوی مجموعہ، مسہ ڈرامہ و مسہ تحقیقی مقالہ مطبوعہ آ دروشم اٹ ساڑی ئسر. اونا سیاسی کاریمک، اخبار آتا ادارت، کالم نگاری، مصوری و پوسٹر سازی داڑان بیدس ءُ. اونا مسودہ غاتیان رسینگوکا تصنیف آک ہرا دا وخت اسکان شینک مسونو اوفتا کچ 28 اسکان سر مسونے. غسان داخہ در کثیر الجہات و زند آن پُر ئس کہ اندن لگاکا کہ او دا منہ وخت اٹ بھاز زیات کاریم کننگ خوائسکہ. اونا سنگتاک و تدوکا خڑک وخت اٹ عربی زبان نا بھلا شاعر محمود درویش اونا یات اٹ ہرا مضمون ءِ نوشتہ کرے اونا سرحال ئس؛ “محاولۃ رثاء برکان” (اسہ آسکوہ ئسے نا مرثیہ ءِ نوشتہ کننگ نا کوشست).
غسان نا یات اٹ اسہ ایوارڈ ئسے نا بناء مس ہرا ہر سال عربی زبان ٹی فکشن نا تیوہ غان گچین آ کتاب ءِ تننگک. اونا دوستخواک غسان کنفانی فاؤنڈیشن نا پِن اٹ اسہ تعلیمی این جی او اس ٹہیفینو ہرا مہاجر آتا چُناتیکن کم و وَد 150 آن زیات اسکول آتا بست و بند ءِ سنبھالک. انٹرنیٹ آ اسہ اندنو اسکول ئسے نا عکس ہم ساڑی ءِ ہرانا لوگو ٹی قرآن مجید جوڑ کروک ءِ و شیف آ اسکول نا پِن نوشتہ کروک ءِ؛ “مدرسۃ الشہید غسان کنفانی الإسلامیۃ” شہید غسان کنفانی اسلامی سکول. ہمو غسان ہرا عیسائی اس ہم ئس و کمیونسٹ ہم، تینا زند ءِ ندر کننگ نا سوب آن مذہب و ادیان آتیان خلاس مابت دوئی کرینے.
ادبی خدمت آتیا اسہ چمشانک ئس:
عربی ادب تشبیہات آن ہمیش پُر مریک، غسان نا رہی آ ہم تشبیہات آک بھاز ءُ. اونا تشبیہات آک جتا و گوڑیفوک مننگ تون اوار معنہ خیز ہم مریرہ، ولے او گواچن اٹ تکنیک نا بادشاہ ءِ. اونا افسانہ غاک اندنو استادانہ ءُ ڈَول اسیٹ گَوفنگرہ کہ بندغ ہبکّہ سلیک. منٹو ہرا بلکن اردو نا تیوہ غان بھلا افسانہ نگار ءِ، اگہ نمے یات ءِ کہ نم ہراتم اولیکو وار اونا اسہ گچینو افسانہ اس خوانار ءِ گڑا نما انت حالیت مسوسُس، یخین اٹ ہراتم افسانہ ایسر مس گڑا منہ ساعت کن نم شَل مریسہ سلورے، اسہ بھاز زیات پُر تاثیر ءُ افسانہ ئسے نا قرات آن گڈ بلکن نما دیخہ در خید آک ہم چُرور.
منٹو نا تاثیر نا ترندی لَس وڑ اٹ اونا افسانہ غاتا ایسری آ پاش مریک، اندن لگک دنکہ تاثرات آتا اسہ بھلو دیر اس اسہ بند ئسے نا پد آن ڈھکوک سلوک ئس و یکدم تون سیلاب ئسے نا ڈَول آ بسونے لگّانے، ولے غسان نا افسانہ غاتیٹ تاثیر نا اندنو ترندی اس (گَوفنگ و تکنیک نا فرخ تون) بیرہ ایسری ٹی آخہ بلکن تیوہ غا افسانہ غا اسہ کچ بشخوک مریک، خوانوک نا سینہ غا اسہ اسہ چھٹانک کریسہ بڈ زیات مریسہ کیک داڑاسکان کہ احوال نا بناء آن دَم سلینگ آ مریک.
1961ء ئٹی 25 سال نا عمر اٹ اونا اولیکو افسانہ غاتا مجموعہ ” موتُ سریر رقم” (بیڈ نمبر دُوانزدہ نا مَرک) شینک مس. ہرانا اسہ کسّہ (بید نمبر دُوانزدہ نا مَرک) ءِ اینو ہم عربی افسانہ غاتا تاریخ نا منہ گچینا کسّہ غاتیٹ حساب کننگک. دا افسانہ ءِ پِنی آ انگریز مَٹ کروک و ادیب ڈینس جانسن ڈیویز (ہرادے مصر والاک مابت آن عبدالودود ہم پارہ) انگریزی ٹی مَٹ کریسہ آکسفورڈ یونیورسٹی آن گچین آ عربی کسّہ غاتا اسہ مجموعہ اسیٹی شینک کرے (ہراڑا پروفیسر آربری مقدمہ نوشتہ کرے). دا کسّہ ٹی او ہسپتال و ناجوڑ آتا تہہ ئنا احوال و محسوسات نا اندنو گچینو ندارہ کشی اس کرینے کہ دا افسانہ دا وخت آ نیویارک یونیورسٹی نا سکول آف میڈیسن نا نصاب اٹ اوار ءِ.
غسان نا فنی لائخی تا بارہ اٹ اسہ ہیتس دادے کہ فلسطین اونا تیوہ غان بھلا نزوری ہم ارے و تیوہ غان بھلا طاغت ہم. طاغت دا وڑ کہ اگہ او فلسطین ٹی مروکا ترند آ آزموندہ غاتیان گدرینگپروس گڑا داخسو عمر اسیٹ او دنو کڑمبو و خوڑتو بیانہ اس تننگ کتوکہ، و نزوری دا معنہ اٹ کہ اونا پِن نا بَننگ تون اونا سیاسی کاریمک و قضیہ فلسطیبن تون اونا سیالی نغد کار آتا جذبات و دوست بننگ و نہ بننگ ئنا نیام اٹ بریک و اونا فن ءِ ہمو معروضی چمشانک نصیب مفک. ننا جند ئنا آزموندہ اٹ دُن مس کہ غسان نا اسہ بھاز خلیفوکا افسانہ ئسے نا مَٹ ءِ (ہرا فلسطین نا سرحال آ اَلو) ہراتم اسہ ادبی مجلس اسیٹی مونا اتنگا گڑا تیوہ غا ساڑی آ مخلوق فلسطین نا قضیہ نا بابت اٹ ہیت ءِ بناء کرے داڑ اسکان کہ اسہ بھلو استادِ ادب اس دا افسانہ نا فنی بشخ آتا پارہ غا ساڑی مخلوق نا پام ءِ کریفے.
1963ء ئٹی اونا ناول رجال فی الشمس (دیمون آ منہ بندغ) شینک مس، پاننگک کہ اگہ تیوہ غا فلسطینی مزاحمت نا بندغی بشخ آتا لائخی و نزوریک اسہ جاہ کس اس اوننگ خوائے گڑا دا ناول ءِ خواننگ گنج ءِ. ناول نا کلائمکس دادے کہ مسہ فلسطینی تینا وطن ءِ یلہ کریسہ غیر قانودی وڑ اٹ سِیم آن ایمون مننگ خوارہ گڑا اندن اوفک اسہ تیل والا ٹرک ئسے نا ڈیور ءِ گڑاس تریسہ اونا خالی آ ٹینکی ٹی تینے ڈھکرہ و او اوفتے باسنی آن دیر مروکا ریگستان اٹ دریسہ ءِ.
اوفک مُد ئنا ترندی نا سوب آن اسٹ اسٹ آ مَرک ئنا گواچی مریرہ ولے دزگیر مننگ نا خُلیس آ کُوک و پاڑو ہم کپسہ. ناول دا لَوز آتیا ایسر مریک؛ لماذا لم یدقّوا جدران الخزان؟ (آخر دُنو انتس مس کہ اوفک ٹینکی نا دیوال آتے ٹپتور ہم؟) دا لَوز آک فلسطینی مہاجرین آتا خُلیس و تینے آ مروکا زُلم آ اوفتا چُھپی نا رِد اٹ اسہ اندنو بڑز بالادو تبصرہ ئسے کہ ورندی اَف. اینو ہراتم کہ غسان نا خُون ءِ 45 سال مسونے، اینو ہم دا لَوز آک فلسطین و اسرائیل نا آباتی ءِ بشخ و پانت کروکا ناجائز آ دیوال تون اوار فلسطینی خلق آتیٹ دیوال آتیا نوشتوک خننگک.
1966ء ئٹی اونا ناول ما تبقیٰ لکم (ہراکہ نیتون بچانے) شینک مس، دا ناول رجال فی الشمس نا ارٹمیکو بشخ سرپند مننگک. تیوہ غا عرب جہان دادے ساعت آتیتون ہلک دوئی کرے. دا ناول اٹ اندنو گوڑیفوکو خیال (تھیمز) و تکنیک نا آزموندہ ءِ کننگا ہرافتا گرنچی و کڑمبی عربی افسانہ نگاری ٹی اسُل پوسکن ئسر (بلکن بشخنداری تون اردو افسانہ نگاری کن ہم اسہ بھاز گوڑیفوکو و بڑز ءُ گڑا ئسے.) دا ناول ءِ احسن قصتہ فی العالم العربی (عرب جہان نا گچین آ کسّہ) نا ایوارڈ تننگا.
اونا گڈیکو اِرا ناول “امّ سعد” (سعد نا لُمہ)، و ’’عائد إلیٰ حیفا‘ (ایفا ءِ چَپی کروکاک) ہم اولیکو ناول و افسانہ غاتیانبار عرب جہان و عربی بولی ءِ خوانوک آتیتون اوار پیشن نا مخلوق کن ہم گچین آ توشہ نا دروشم اٹ بسر و نغد کار آک اونا فن ءِ سفت کریر. خاص وڑ اٹ عائد إلیٰ حیفا تاثیر نا رِد اٹ اندن ترند و خُلیفوک ئس کہ اسرائیلی غاصب حکومت ءِ دانا اثر ءِ ایسر کننگ کن ورندی ناول نوشتہ کرفوئی تما. رجال فی الشمس، ما تبقیٰ لکم آ فلم آک جوڑ مسونو، و امّ سعد ءِ ڈرامئی دروشم تننگانے. غسان ءِ اونا صحافتی و ادبی خذمت آتا امنّائی ٹی اودے مَرک آن گڈ 1973ء ئٹی انٹر نیشنل آرگنائزیشن آف جرنلسٹس ایوارڈ (I.OJ) و 1975ء ئٹی افریشیائی ادیب آتا کانفرنس نا پارہ غان لوٹس ایوارڈ تننگا.
…………………………..
غسان پارے :
★ آزاتی نا ہچو بدل اس اَف، آزاتی تینٹ بدلی ئسے.
★ انتئے دُن ءِ کہ منہ بندغ ءِ کہوئی تمک گڑا ایلو مخلوق زند مننگ کیک.
★ الّمی دا اَف کہ ننے آن ہرکس تینا ساہ ءِ ندر کے، گواچن آ الّمی دا ہیت نا ءِ کہ کس ہمو وخت اسکان سلیپ، داڑ اسکان کہ تمہ.
★ ہراتم اسہ ورنا اس تینا لمہ وطن نا رَک ئنا پوشاک ءِ بینہ گڑا دوارہ اودے تینا لمّہ نا دعا تا ہچّو پَکار اس مفک.
★ جہان نا تیوہ غا خڑینک آک اسہ جاہ مریسہ اندنو اسہ چُنکو کشتی ئسے سیبو تننگ کپسہ ہراٹی ہمو لمّہ باوہ ءِ ارفنگ نا ہمت مرے ہرا تینا بے گواہ مروکا چُنا ءِ پَٹنگ کن پیشن مسونو.
★ بندغ نا دیمروی نا تیوہ غا سخت آ پند اٹ تیوہ غان گچینا دوا ءِ ایجاد کرینے او بے خیال کننگ نا لائخی ءِ.
★ کنے اُمیت اَف کہ نی وختس واپس بروس، چُک تینا کُدام ءِ یلہ کے گڑا ہراکہ واپس بریک.
★ ای ہر ہیت ءِ نے پاریسہ ہننگٹ انتئے کہ نا کمبوتی کنے بھاز محسوس مننگ ءِ، بلکن….. داڑان زیات پاؤ…… داسہ ای نا نئے مننگ آن دَمدر مسونٹ. کنے نا ساڑی مننگ درکار ءِ، بھاز زیات، داخہ در زیات اخس کہ ای سمبھالنگ کپر. ای ہچبر ٹَک خلتویسٹ کہ ای نیکن چِھٹی نوشتہ کروٹ و نی مُر ہم مریسہ کروس؟
★ نن ٹہیفیسن کہ “ای” مننگ نا مطلب نن ہڑتوماک اُن، گڑا کنے نا پَکار داخہ ترندی تون انتئے محسوس مریسہ ءِ؟
★ زند اسہ دروغ ئسے، نئے تو ہمو وخت ہرادے ای نیتون گدریفیٹ و ہرادے نے آن بیدس، او ہڑتوماک زند پاننگ اٹ بریبر امر مننگ کیرہ؟
★ نی اخس پٹ و پول کروس نے بند آ کُوٹی ٹی دیمون رسینگپک.
★ اگہ نی کنے رسینگتویس گڑا کنا وجود نا اسہ بھلو بشخ اس بُس مرو.
…………★★★………
