مہر میر/ عتیق آسکوہ بلوچ
بڈّو گدان آن دیخہ مُر تِکّئی آ سلوک غوَکنگ ئس…… بابا کُوک تس اومر اُر بڈّو دیر آ غوَکنگ ءِ، بلکن کسری یا مہمان ئسے. ای گدان آن پیشن مسوٹ و بھلو بھلو گام ارفیسہ بڈّو ءِ توار کریٹ……. بڈّو کنے خنیسہ مونی ہنیسہ ئس….. ای خناٹ مُسہ بندغ مُر سلوک کُوک تننگ ئسر کہ کس ارے خلق ئٹی…… ای خناٹ تا تو درست کریٹ الّہ نور جان، مامد و حیدر خان ئسر…… ای بڈّو ءِ ترند آن کُوک تریسہ نریفیٹ و مہمان آتا پارہ غا ترندی تون ہناٹ……. باوہ ہم گدان آن پیشن مریسہ مہمان تے خناسُس……. ای ہراتم مہمان تے تُد کریسہ گدان کن سر ہلکٹ گڑا خناٹ باوہ اسہ ٹپّر اس ارفیسہ گدان نا ایلو پارہ غا درنگ نا سیخا ٹی ہنیسہ اودے مہمان تیکن تالان کرے…… ای مہمان تیتون اوار بابا نا رہی آ سر مسوٹ، اووو… سلام ولیک…. الّہ نور جان ترندو گٹ ئسے تون توار ئسے تون پارے، بابا دوتے مریفسہ بشخندہ سیتون الّہ نور جان نا پارہ غا ہنیسہ پارے والیک سلام…. ببو خیرٹ، اللہ خیر اٹ ہتے نمے…… بابا مہمان تے خمب کننگ آن گڈ اوفتے تولنگ نا پارے و کنے پارے اومر دُدینگسہ خواہ و تاس ءِ ات مہمان تے دیر ایت…… ای گدان نا پارہ غا بھلو بھلو گام ارفیسہ لمہ جیجا ءِ توار تسوٹ؛ آئی خواہ و تاس اس ایت….. ای بانٹفر نا رہی آ ئسوٹ کہ لمہ جیجا توار تس کہ کنا مار خواہ نا دِیک بھاز یخ مفرور نی تینا باوہ نا کلّی ءِ دَر ہرا گندار تون تنگوک ءِ……. ای کلّی و تاس ءِ ارفیسہ سر ہلکٹ. لمہ جیجا گدان نا پزدر ءِ’ ہرا زیات تر بڑز کروک مسکہ’ اودے شیف کرے انتئے کہ ایلو پارہ غا تولوک مہمانک خننگسہ ئسر…… ای مہمان تا رہی آ سر مسوٹ باوہ کنے توار تس اومر مہمان تے دیر ایت…. ای کلی نا بابیرہ ءِ ملیسہ دیر تے تاس ٹی شاغاٹ مہمان تے دیر تسوٹ و کلّی ءِ ایلو پارہ غا مَش تون اسہ بوچ ئسے آ ٹنگاٹ و تولسٹ….. باوہ ترندو توار ئسے تون پارے نور جان دیر کنگرے؟ …… الّہ نور جان پرے جی گنج کنگن. باوہ کنے توار تریسہ پارے الّہ ءِ تینا حوال کر، ای پاریٹ جی لائخ اُس…. باوہ پارے نور جان حوال ایت…. الّہ نورجان تینا ہمراہ تے پارے ماما حیدر خان حوال ایتبو، ہڑتوماک اسہ جاہ پاریر “جی مرے نے….” الّہ نور جان حوال تننگے بناء کرے…… حوال خیر ءِ تیوہ غاک تینا ہند آتیا تینا زند ئتون مشغول ءُ….. زند تدینگسہ ءِ….. رب پاک ننے پڑدہ ٹی تخیسہ ننا کمکار ءِ….. خلق زڑخو نا پاناد ئٹی ءِ…… پِر بھاز مسونے…. بزگل نا خواست پورہ مننگ ءِ…… خولم نا لاب اٹ داوار جوانو بشخ اس رسینگتو واہم رب ئنا منتوار اُن….. وخت جوان تیر مننگے……. اوتان و داد علی نا خلق ہم ننا چوڑی در ءُ…….. بزگل تون کنا بھلا مار و خوارزادہ ءُ، باوہ و ای اوفتا حوال ءِ بِننگ ئسونہ الّہ نور جان نا حوال برجا ئس، الّہ نور جان پارے کہ بھلا مار بادو بھلن مسونے، سوچ خلکٹ کہ اونا برام ءِ کریفیو….. چوڑی در ہمسایہ اوتان نا مسڑ تون اونا سانگ خدو چلّہ ٹی کچھی ٹی مشکاف نا ہند آ مسونے دا وار زڑخو ٹی اونا برام نا نیت ءِ…… اندا رِد اٹ تیاریک برجاء ءُ و دا تیاری تا رِد اٹ ای نا رہی آ بجّار نا خواست ئتون بسونٹ…… بابا ترندو توار ئسے تون پارے نور جان بھاز خوشی مس ہر گڑا گنج ءِ…… الّہ نور جان حوال ءِ برجاء تخیسہ پارے اللہ جان نا اولیاد و مال اٹ برکت شاغے…….ای اندا اُمیت تون نا خلق نا پارہ غا مامد و حیدر خان تون اوار سر ہلکٹ……. داسہ نما آباتی بسونن….. پین خیر ءِ……..
الّہ نور جان نا دا ہیت ئتون اوار تیوہ غا اسہ جاہ پاریر “اللہ تیوہ غاتیا خیر کے ننے آ ہم……” منہ ساعت نا چُپی آن گڈ الّہ نور جان ترندو توار ئسے تون تینا ہمراہ مامد و حیدر خان ءِ پارے سنگتاک حوال ہلبو…. اڑتوماک اسہ جاہ پاریر “جی….” الّہ نور جان’ باوہ نا پارہ غا پام ءِ کریسہ پارے جی کرم بخش حوال ایت…… بابا کنے توار کریسہ پارے اومر حوال ایت….. ای پاریٹ جی باوہ جان لائخ اُس….. باوہ حوال تننگ ءِ بناء کرے نور جان حوال خیر ءِ، اللہ پاک نا مہربانی ءِ خلق ٹی تیوہ غاک تینا چُنا تیتون خوش و آسودئی نا زند اس گدریفنگ ءُ……. وخت جوان تیر مننگ ءِ….. پِر دا وار ننا علاقہ ٹی جُوان متنے…. بزگل تون کنا مار و شوان نبی داد ءُ….. خولم نا لاب آن گڈ بزگل ناڑ ٹی خوائنگ ءِ داسہ بزگل ءِ شوان مَش ئٹی مُر درینے…..ایلو منہ ہیٹ تینا پال نا کُننگ کن تینا رہی آ تورینٹ…. چُنکا ایلم بزگل نا سوب آن ارٹمیکو پارہ غا دوزان نا دِیر نا رہی آ وتاخ کرینے….. ای چوڑی در ہمسایہ غاتیتون انداڑے مامد گوزی ٹی تولوکٹ….. داسہ کنا طب ہم موکّل تفک کہ سیال آتا رہی آ کاؤ بریو…… بس اومر ءِ تینا خذمت کن خلق اٹ تینا رہی آ تورینٹ…… داسہ گدان ٹی تولوک توفک ءِ صاف کننگ ئسوٹ، بھاز دے آن صاف کتنٹ تا کہ بڈّو (ڈھنگ) نا غوَکنگ نا توار مس ای سرپند مسوٹ کہ مہمان ئسے یا کسری کس ئسے….. ای اومر ءِ پاریٹ کہ اِن اُرتا دیر ءِ ای ہم گدان آن پیشن مسوٹ گڑا نمے خناٹ بھاز خوشی مس….. ایلو پین خیر ءِ….. باوہ نا ایسری ہیت ئتون اوار تیوہ غاک یکجاہ مریسہ پاریر “اللہ خیر کے، تیوہ غاتیا خیر کے….”
باوہ دیخہ چُپی آن گڈ پارے نورجان’ بجّار ننا تہذیب نا ہمو گچین آ دود ءِ ہرا ننا چاگڑ نا سیوت، اسٹ ایلو تون کمک و زند نا ویل آتے ایسر کننگ اٹ سگّ بشخک. بجّار نا ربیدگ برام نا دود ءِ چاگڑدی زمہ واری جوڑ کریسہ بندغ ئسے دا اہم آ سیالی تون اوار کننگ اٹ کمک تون اوار بجّار ننا چاگڑد ءِ اسٹ آ معاشی بست و بند تون اوار کریسہ اودے سوگَو کیک ایلو پارہ غا بجّار نا دود ننا رہی آ خاہوت نا بست و بند اٹ نرینہ ءِ زمہ وار جوڑ کریسہ اودے چاگڑد نا ہم اسہ زمہ دارو بندغ اس جوڑک، ننا معاشی بڈ آن آزات مریسہ تینا چنا تا برام و سانگ ءِ کریسہ خاہوٹ نا لڑ ءِ برجا تخنگ نا لائخ مرینہ و بجّار نا وڑ ئنا دود آک ننا چاگڑدی بست و بند ٹی ہڈ تروک سیالی ءِ برجا تخیسہ ننے اسٹ ایلو تون تفوک تخک. نور جان اسہ بندغس اخس کہ زَر ئٹی سوگو مرے بجّار کریسہ نئے بیرہ چاگڑد تون تینا سیالی ءِ برجا تخک بلکن بجّار ءِ ایلو زَر ئٹی نزور آ بندغ آتیکن ہم گچینو ربیدگ اس گوندک، دادے اسُل معاشی نزوری اس سرپند مننگپ، اندا سوب آن سردار آن ہلیس شِوان اسکان دا دود ءِ تینا چاگڑدی حق نا وڑ اٹ تینائی کیرہ کہ دا طبقاتی حق و کس ئسے نا نزوری نا شاہدی پاننگپ.
باوہ جان کنے پارے اومر اِن چاہ ءِ اُر جوڑ مس کہ آخہ، زو اس ہتیوہ تا. ای بش مسوٹ دُدینگاٹ گدان نا ایلو پارہ غان لمہ جیجا چاہ ءِ تیار کروک کنکن کسر اُروک ئس، ای مہمان تے چاہ خنیفیٹ….. الّہ نور جان پارے کہ کرم بخش نن گڑا کانہ، ننے الّہ مِسکان پارے کہ ننے ولی داد نا خلق آ ہم ہنوئی ءِ، کان کہ اُرے مروئے ننے…….. باوہ کنے کُوک تس؛ اومر اِن ہمو مورّک آ کُچین ءِ ات تینا کاکا ءِ بجّار ایت. ای دُدینگسہ ہناٹ کُچین ءِ ایسٹ، الّہ نور جان تینا خیری تون کُچین ءِ تفے و رُخصت کریسہ اوفک سر ہلکر…….
