دا راست ءِ کہ سائنس بھاز شونداری ہلکنے۔ دا راست ءِ کہ اینو پگہ نا انسان نا معلومداریک گیشتر ءُ۔ دا راستءِ کہ اینو نا انسان خلاء ٹی ڈیہہ و جاگہ جوڑ کننگ نا پام ءِ کننگ ءِ۔ ہر پوسکن آ دے اسہ پوسکن ءُ ایجاد اسے نا حوال مِلک۔ دا راست ءِ کہ اینو نا دورباری ٹی ہر زمانہ غان خوانوک آتا کچ زیات ءِ۔ دا راست ءِ کہ ہندا دورباری ٹی انسان داخہ در زر (دولت) ودی کرینے کہ ہچ ءُ وخت اس دا کچ و کیل اٹ زر جمع متہ نے۔ ولے حیرانی نا ہیت دادے کہ دا غٹ آن پد ہم انسان خوار ءِ۔ اینو مچ کرہ ارض نا بقاء بھیم نا گواچی ءِ۔ موسم آک غیر فطری وڑ اٹ بدل مننگ ٹی ءُ۔ پورا دنیا ٹی درجہ حرارست ودنگ ٹی ءِ۔ یخ آک ہنسہ کننگ ٹی ءُ۔ شاعر آتا محبوب انگا موسم ’’سہیل‘‘ داسہ اسہ یات اس مرسہ کننگ ٹی ءِ۔ ایلو پارہ غا معاشی ویل تینے بھاز چسپانی اٹ تالان کرسہ ءِ۔ شونداری ہلوکا ڈیہہ تیٹی بھلو کچ اسے اٹ بندغ آک نیزگار مننگ ٹی ءُ۔ داڑتون اوار اوار آبادی بے کچ ودنگ ٹی ءِ۔ جنگ آک ہم برجا ءُ۔ زلم و زوراکی ایسر متہ نے۔ میڈیا تینا جاگہ غا بھلو انقلاب ئسے۔ ولے دا ہم داسہ حاکم طبقہ غاتا دوٹی ءِ۔ انسانیت اینو ہم انسان آن مُر ءِ۔
بھاز آ نوشتوک و پامدار آک سائنس نا شونداری و سرمایہ دارانہ نظام نا سوگوی ءِ خنار۔ تو پاریر کہ ’’تاریخ ایسر مسُنے‘‘۔ یعنی داسہ خلکت نا جہد کٹانے۔ ولے انت مس؟ نن خننہ کہ ہرا سوال و سوج آک درو نا انسان ءِ پلویڑ کریسُر۔ اینو اوکان زیات سوج آک ودی مننگ ٹی ءُ۔ بھاز انگا پامدار آک دا اَرّفنگ ٹی ءُ کہ خوانندئی گیشتر مسُنے۔ معلوم داری نا کچ و کیل ودانے۔ ہر بندغ اُراٹی تولوک معلوم داری دوئی کننگ کیک۔ گڑا دنیا داخس جاہل و اہمخ آتیان انتئے پُر ءِ؟ ہندا پام دار آک دانا ورندی ءِ دُن ایترہ کہ داسہ تعلیم دوئی کننگ بھاز آسان مسُنے بندغ آک تعلیم ءِ ہڑدے ئی ءُ گڑا اس سرپند مریرہ۔ ہندن کہ نلکہ نا ٹونٹی آن دیر بریک ہندن تعلیم ءِ۔ دا خاطر آن کہ داڑان ہچ ءُ تخلیقی ءُ تحریک یا روحانی ءُ خوراک اس دوئی کننگ نا اومیت کم ءِ۔
ہندا خاطر آن تو سوج آک زیات مننگ ٹی ءُ۔ انت ننے تعلیم دا خاطر آن درکار ءِ کہ داڑان روزگار مِلّے؟ ( دا پین ہیت ئسے کہ داڑان روزگار ہم ملِپک) انت تاریخ دا خاطر آن خواننگے کہ دا اسہ مضمون ئسے۔ یا دا خاطر آن خواننگے کہ داڑان ہراسے شعور و چاہنداری دو بریک۔ او لس زند ٹی کاریم ایتک۔ دن انگا بندغ آتا کمبوتی اف۔ ہرا ہراسے گڑا ءِ مارکیٹ نا رد اٹ اُریرہ۔ اوتا پاننگ ہندادے کہ ہرا گڑا مارکیٹ ٹی بہا مریک بندغ ہمو کاریم ءِ کے۔ ہندا خاطر آن ننا بھاز انگا شاعر آک دا گڑا غا ہم بھاز خوش ءُ۔ کہ اونا شاعری نا کتاب آک ایلوتیان زیات سودا مریرہ۔ دا جتا ءُ ہیت ئسے کہ اوتا شاعری ٹی گڑاس ارے یا اف؟ یعنی سرسہب انگا بندغ و سرسہبی کن لازم مسُنے کہ او بہا مرے۔ اونا جوان ءُ نرخ اس مرے۔ اگہ گڑا اس یا بندغ اس لائخی اس بہا مفک۔ تو دانا سِدا انگا مطلب ہندادے کہ او بندغ بے سہب ءِ۔ نا لائخ ءِ۔ دنیا داری سرسہبی نا نشانی ءِ۔ ہندا خاطر آن ادب نا پن اٹ نوشتہ کروک آک سرکار نا ایوارڈ آتے بھاز خوشی اٹ ہلیرہ۔ بلکن داتکے جنگ ایترہ۔ او ولدونا سرکار ءِ شاباشی ایترہ کہ او ادب نا سرپرستی ءِ کننگ ٹی ءِ۔ ادب ءِ شون تننگ ٹی ءِ۔ ولے سارتر کون ءُ بندغ اف نا حساب اٹی ءِ کہ ہراسٹ نوبل انعام ءِ ہم اَلتو۔ او پارے کہ دافک (ایوارڈ تروک آک) دیر ءُ کہ کنے یا کنا کاریم ءِ جوان پار؟۔
پاننگ نا مسخت دادے کہ دا زمانہ ٹی کہ ہر گڑانا آب‘ یا سرسہبی نا نشانی گڑا تا بہا مننگ ءِ۔ دن انگا زمانہ ٹی ادب نا اخس گرج ارے؟ سائنس نا شونداری نا مون آ فلسفہ خواننگ نا انت ضرورت ءِ؟ لس وڑ نا ساعت تیری تیٹی شاعری نا گرج اس ارے؟ بندغ انتکے تینا مزغ ءِ 3 اٹی شاغے؟
داڑتون اوار اوار ہمو سوج آک ہم اریر کہ ہرافک درو نا انسان ءِ گڑتی ٹی شاغاسُر۔ کہ دا کائنات انت ئسے؟ دانا مسخت اس ارے یا اف؟ انسان نا زند انت ئسے؟ انسان زند ءِ امہ تدیفے؟ انت انسان مشین ئسے‘ اونا جوزہ و احساس نا ہچ ءُ قدر و قیمت اس اف؟
یقین اٹ ہر زمانہ ٹی غٹ بندغ آتا پام دُن متہ نے۔ ولے گڑاس نہ گڑاس بندغ ضرور پام کرینو۔ مزغ ءِ تینا 3 اسے ٹی شاغانو۔ ہندا سوج آک ادب نا بنداو مسُنو۔ ولے ہراتم نن تینا ’’ادب‘‘ آ چک ءِ ہڑسنہ تو ننا ’’ادب‘‘ دن انگا سوج آتیان اورک نظر بریک۔ ننے اینو ہم دا گڑتی ءِ کہ نن تو صوفی ءُ شاعر اس انتئے اف؟ دانا علاج دا مس کہ تاجل ءِ صوفی شاعر اس قرار تننگا۔ ہفت زبان شاعر پاننگا۔ نن تو ناول تو اف‘ ولے ناول نا پن آ انت اس کہ نوشتہ مسُنے۔ اودے جوان پاننگے۔ او ہمو نوشتوک آتے ہم جوان پاننگے کہ ہرافک چِل چِل کتاب نوشتہ کرینو۔ پانے دا کتاب آتیٹی ہچڑاس اف۔ داسہ ایم فل و پی ایچ ڈی نا گو ہم شروع مسُنے۔ ہر اَسٹ ءِ ایم فل کروئی ءِ۔ پانے او گڑاس سرپند مریک‘ مفک۔ ولدو نا ایم فل بھاز آسان ہم مسُنے کہ شخصیت اسے نا بارہ اٹ انت کہ سجے نے نوشتہ کر۔ ایم فل تیار ءِ۔ شاعری و لسانیات نا بارہ اٹ مروکا ایم فل آتے ٹی جاگہ نا جاگہ اس ضرور بلوچستان نا جغرافیہ اوار ءِ۔ اگہ کس اس مکتبہ درخانی آ پٹ و پول کیک‘ تو دا ’’پٹ و پول‘‘ ٹی بلوچستان نا پنی آ (مشہور) دریا تے ہم ضرور شاغک۔ داتا تین پہ تین تعلقداری اس ارے یا اف۔ ولے منہ پنّہ پُر مریرہ۔ ہندن ننے دا گڑتی ہم ارے کہ ننتو انتئے فکری ءُ تحریک اس متہ نے؟ دا گڑتی غٹ نا اف۔ گڑاس بندغ آتا ءِ۔ ہرافک تینے ترقی پسند پارہ۔
تاجل آمبار ۔۔۔ دانا علاج ہم پٹنگا کہ ۔۔۔ جی ۔۔۔ ننتو فکری ءُ تحریک اس ارے۔ ہندن کہ مکتبہ درخانی نا بھلو سِفت و ثناء اس کننگک۔ ہندن ’’لٹ خانہ‘‘ ءِ ہم فکری تحریک اسے نا پن ءِ تننگک۔
لٹ خانہ نا بارہ اٹ دائسکا چندی ہیت آک کننگرہ و دادے باقاعدہ زند انا اسہ فلسفہ سے نا پن ءِ تننگِک۔ او لٹ خانہ نا ہرا بندغ آک کہ تینا نوکری تے اِلار داتے قربانی اس خیال کننگِک۔
دا بابت اٹ اثیر عبدالقادر شاہوانی تینا اسہ نوشت اسے ٹی پائک کہ ’’میر عبداللہ جان جمالدینی تینا تعلیم ءِ ایسر کننگ آن پد نائب تحصیلدار نا حیثیت اٹ سرکاری ملازم مس۔ ولے بلوچ آتیا برطانوی سامراج نا زلم و زوراکی و زند انا ہر بشخ اٹی بلوچ آتتون ناانصافی آ 1950ء اٹی تینا نوکری آن استیفہ تِس و سیاست نا میدان اٹی بس۔ او نیشنل عوامی پارٹی (نیپ) نا پلیٹ فارم آن تینا سیاسی سفر نا بناءِ کرے۔ او تینا نوشت و تران آتے اٹ بلوچ آتے تغ آن سنبھال کننگ نا پارے‘‘۔
وخت اس کہ میر عبداللہ جان جمالدینی دا بابت اٹ تینا کتاب لٹ خانہ ٹی دُن نوشتہ کیک
’’لٹ خانہ داستان ءِ بلوچستان اٹی ترقی پسندی و روشن خیالی نا تحریک نا‘ ہرانا بناء 1950ء آن مس۔ ہراکان دا چشمہ چٹ ہلک اونا پن لٹ خانہ تخنگا‘‘۔
او لٹ خانہ نا بنداو نا بابت اٹ کمال خان شیرانی ءِ غٹ آن بھلا سوب پائک او نوکری آن اولیکو وار استیفہ تروکا ہم کمال خان شیرانی ئس۔
داسہ ہُننگ نا ہیت دادے کہ لٹ خانہ انت ءِ پارہ؟ لٹ خانہ نا واقعی فلسفہ اس ئس؟ فلسفہ انت ئسے؟ انت بیرہ نوکری تے یلہ کننگ اٹ روشن خیالی مُستی ہِنا؟ نوکری اِلنگ نا بھلا سوب انت ئس؟ انت لٹ خانہ تحریک اس پاننگ مریک؟ تحریک کن ہرا گڑاک لازمی ءُ۔۔۔؟
vدا اوفتے کن ایڈوانس ءُ نعرہ اس اَلو۔ راست انگا ہیت دادے کہ اے وخت آ ہم مُچ پاکستان اٹی مارکسی فلسفہ ءِ چاہوکا بندغ آک اورتیا حساب مسُرہ۔ یعنی ہرافک ترقی پسندی و مارکسی فلسفہ نا داواہ ءِ کریرہ اوتا جند داڑان بلد اَلو۔ اگہ اوفک بلد مسُرہ تو دا ردٹ لٹریچر تسرہ۔ اوتا پارہ غان ننے مارکسی فلسفہ‘ مارکسی سیاسیات‘ انقلاب وقومی سوال آتا بابت اٹ ہچو علمی وفکری ءُ کاریم اس دو بفک۔ اوفک دا کریڈٹ ءِ ہم دوئی کیرہ کہ اوتا سوب آن ورنا تیٹی ترقی پسند ادب تون شونک ودی مس۔ اگہ دا ہیت راست ءِ تو ولدونا ہمو سوج ودی مریک اوفتا جند اخہ ترقی پسند ادب تخلیق کریر۔ اگہ اوفتا جند ہچ اس تخلیق کتو۔ تو امر اوتا ’’لٹ خانہ‘‘ نا سوب آن ترقی پسند ادب نا شونک ودی مس۔
اگہ ہمو زمانہ نا جاچ ءِ ہلنگا تو او زمانہ فکری‘ سائنسی‘ جہد ہر بابت اٹ اسہ خاص ءُ زمانہ اس ئس۔ منہ سال مہالو ارٹمیکو بھلا جنگ ایسر مسس‘ ہراٹی کروڑ آ انسان آک خلنگاسُر ہرانا سوب آن مُچ دنیا و خاص وڑ اٹ یورپ متاثر مس۔ جاپان نا شار تیا انسانی تاریخ اٹ اولیکو وار ایٹم بم نا جلہو آک مسُر۔ برطانیہ تینا سپر پاور نا طاقت ءِ گوہا۔ و اونا جاگہ غا امریکہ دا طاقت ءِ دوئی کرے۔ ایلو پارہ غا سوویت یونین سرمایہ دارانہ بلاک نا مونا طاقت اسے نا ردٹ سلوک ئس۔ ولے سوویت یونین نا جند انا نظام نا خرابیک ہم ودی مننگ ٹی ئسُر۔ پورا دنیا ٹی فکری‘ فوجی سائنسی ءُ چک تاڑ اس ئس۔ ارٹمیکو بھلا جنگ آن پد مُچ دنیاٹی امن و ایمنی نا ہیت مننگ اٹی ئس۔ نوشتہ کار آک جنگ آن بیزار مسُر ایمنی نا بابت اٹ نوشتہ غاک مننگ اٹی ئسُر۔ پوسکن آ دورباری و جنگ نا سوب آن انسان ہرا حالیت آتا پلویڑ اٹی بسوسُس اوفک دا نوشتوک آتا نوشتہ غاتیٹی درشان مننگ اٹی ئسُر۔ خاص وڑ اٹ افسانہ و ناول ردوم ہلنگ ٹی ئسُر۔ ایلو پارہ غا قومی سوال‘ قومی تحریک آک ہم طاقت ہلنگ اٹی ئسُر۔ افریقہ بیدار مننگ اٹی ئس۔ فلسطینیک تینا ڈیھ کن جہد کننگ اٹی ئسُر ہندا سوب ءِ کہ اسہ قومی و مزاحمتی ءُ لٹریچر اس ہم نوشت اٹی بننگ اٹی ئس۔ ( برجاءِ)۔
