زیباؔ ءِ زَھگ اَنگت گریوگ ءَ اَت – سمین بلوچ

59

زیباؔ ءِ زَھگ اَنگت گریوگ ءَ اَت

نبشتہ کار: سمین بلوچ

دی بلوچستان پوسٹ

شپ ءِ یک بج ءُ چیزے دمان اَت، من وتی گِس ءِ دیم ءَ تگردے ءِ سر ءَ نشتگ اِت آں،پیالے چاہ منی کش ءَ اِیر اَت ءُ نزر دوست ءِ کِتاب “مات ھور ءِ سر ءَ اِنت” منی دیم ءَ اَت، بتی روک اَت ءُ سِنگے سر ءَ اِیر اَت، تیرماہ ءِ شپ اَت کَوش ءَ پہ تبے شیکگّے بِر اَت ،من گوں کتاب ءَ دلگوش اِت آں ، داں پہ منی گوشاں گونڈوے گریوگانی توار اِنت،من شر وتی گوش داشت آں داں زھگے گریوگ ءَ اِنت.
من وت ھیران بیت آں کہ اِے شپ ءِ یک بج ءَ کئی زھگ اِنت کہ گریوگ ءَ اِنت، بلکیں بیمار اِنت یا کہ باریں دگہ چے ھسابے ؟
من پَدّ ءَ گوں کتاب ءَ دلگوش بوتاں، بلے اِے زھگ ءِ گریوگ بند نہ بیت اَنت ءُ سکّ گریوگ ءَ اَت.
من کتاب ءِ دپ بند کُت ءُ چاہ وتی گُلپتاں ، بتی کُشت کہ باریں رواں ھالے گِر آں اے کئی زھگ اِنت اینگائی شپ ءِ نیم ءَ گریوگ ءَ اِنت ، من وتی چمپل پاد ءَ کُت آں ءُ جامگ گوں بشانگ ءِ در ءَ ٹنگ اِتگ اَت، من جامگ زُرت گْوار ءَ کُت راہ کپتاں ،من داں ھمے گِس ءِ نزیک ءَ شُت آں داں اِے زھگ زیباؔ ءِ لوگ ءِ تہ ءَ گریوگ ءَ اِنت.
زیباؔ مئے ھمساھگ اِنت زیباؔ وتی مات ءُ پِتانی یکّیں چُک اِنت ، زیباؔ ءِ پت زیباؔ ءِ کسان اُمری ءِ وھد ءَ بیران بیتگ،مات ئِے اَنگت ھست بَلے نوں پیر ءُ آجز اِنت.

زیباؔ ءَ شش سال اِنت کہ سُور ئِے کُتگ ، چار جَنکیں چُک ئِے ھست ، زیباؔ ءِ مرد ءَ سالے بیت کہ پہ روزگار ءَ شھر ءَ شُتگ بَلے ھما اِنت کہ گار ءُ بیگواہ اِنت کسے سر ءُ سوج ءَ ئِے ھم نہ دنت کہ چون اِنت ءُ کجا اِنت؟

من لوگ ءِ دپءَ شُتاں داں ھمے زھگ وتی گریوگانی تہ ءَ گْوشگ ءَ ات کہ امّا نان ءَ بدے ، من شُدیگاں ، بلے زیباؔ گْوشگ ءَ اَت کہ لوگ ءَ اِچ نیست منی چُک شپی وَپس من باندا روچ ءَ رواں پہ شُما نان پنڈاں کاراں،بَلے زھگ اَنگت بس کنگ ءِ وڑ نہ اَت ،
من پد ءَ واتر بوت آں وتی گِس ءَ کہ وَرگی چیزے چار آں پہ زیباؔ ءِ زھگاں بَر آں.

من وتی دُرھیں لوگ یک یک کُت بَلے مئے لوگ ءَ ھم اِچ نیست اَت، آرتانی گونی گِس ءِ دیم ٹَنگ اِتگ اَت، پیسر ءَ کمو شکر ھستگ اَت بَلے آ ھم مات ءَ من ءَ چاہ کُتگ ءُ داتگ اِت اَنت ءُ ڈبی دپ پچّ ءَ کپتگ اَت، من پَدّ ءَ اَتک آں وَتی تگردے سَر ءَ نِشت آں ،
مات ءِ ھور ءِ سر ءَ اِنت، پد ءَ ھمے کتاب ءِ وانگ بنا کت بَلے! زیباؔ ءِ زھگ اَنگت گریوگ ءَ اَت ۔۔۔۔۔۔۔۔۔۔۔!!!!


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔