جہلاوان ادبی کچاری خضدار نا مجلس

69

جمہ نا دے زیدی سِیخَڑو نا دامان ئٹی اسہ زیبدارو اس ہڈ تننگا ہرانا کماشی ءِ جہلاوان ادبی کچاری خضدار نا فنانس سیکرٹری مہر براہوئی کرے۔

محفل مشاعرہ نا مہمان خاص محمد عارف موسیانی ئس، مہمان تتون سنگتی جہلاوان ادبی کچاری خضدار نا کماش اشرف ادیب کرے۔ محفل مشاعرہ نا بِناء تلاوت ءِ کلام پاک آن مس ہرانا ثواب ءِ الطاف صدیقی دوئی کرے۔

محفل مشاعرہ ٹی بشخ ہلوکا شاعر و ادیب مہر براہوئی، محمد عارف موسیانی، اشرف ادیب، خلیل شہزاد، غنی انجم، عصمت زیب، طاہر ایاز فاروقی، سعید صابر، الطاف صدیقی، سکندر شاہین، سلام ساگر، حمید زیب ئسک بشخ ہلکر ہرافک تینا خیال آتے مونا ایسر۔

مجلس نا مہمان خاص تران کریسہ پارے جہلاوان ادبی کچاری خضدار نا سنگتاتے ایلو کُلّے مہمان تے بروکا زیدی نا ڈغارا بخیرٹ پاوہ، یخین اٹ دا بھاز بھلّو خوشی نا ہیت ئسے کہ ننا زبان ننا پجار زندہ ءِ تو بیرہ ہندا شاعر ادیب آتا سوب آن۔

او مُستی پارے بولی ہر قوم ہر علاقہ نا پجار مریک۔ بولی کن کاریم کروک ورناک شاباسی نا حقدار ءُ۔ زند وفا کرے نن ہمیش ہر مجلس اٹ ساڑی مرون۔

اوکان گُڈ محفل مشاعرہ نا کماش مہر براہوئی پارے جہلاوان ادبی کچاری خضدار نا اینو نا محفل مشاعرہ ءِ جہلاوان نا ڈغار زیدی سِیخڑو آن موارک باد پاوہ، مُر و خڑکان بروکا مہمان و ایلو ورناتے تیوہ غاتے بخیرٹ پاوہ۔ ای جہلاوان ادبی کچاری خضدار نا  تیوی مہرواناتا بھاز بھاز منتوار اٹ ہرا کنے اینو دا مجلس نا کماشی ءِ کنا پنا کریر۔

او پارے ورنا تا دا مُچی زبان ءِ زندہ کننگ کین ءِ۔ یخین چارے ننا ہچّو پین مسخت اس اف ننے نئے کہ جوفئی اس ارے۔

او پارے نن تینا بولی تینا علاقہ ٹی تینا مُست ئنا دود ربیدگ ءِ زندہ کننگ کن نت دُو خلینگن ہندا مسخت کن دنو مجلس ٹہیفنگ اُن۔