گچین کاری – جاوید اقبال ساجدی

35

آزمانک۔ گچین کاری

نبشتہ کار۔ جاوید اقبال ساجدی

دی بلوچستان پوسٹ

بچار واجہ بھرام ما پیسر ءَ دو رند ءَ ھم ترا گچین کرتگ بلے تو انگت پما ھچ نہ کتگ ءُ ساری ءِ گچینکاری ءَ رند اے اولی رند انت کہ تو مئے میتگ ءَ اتکگ ئے،نا تو مئے وانگجاہ ءَ پہ ماسـٹرے آورتـگ ،نـا مئے آپ ءِ جـیڑہ ھـل کـتگ ءُ نـا مئے سڑک شـر کـتگ اَنـت۔
شمـبے جـان شمـے گِـلگ منی سـر ءُ چـمان اَنت ءُ پـہ ھک اَنت، بـلے ھـدا زانت اے پنچـیں سـالاں چوشیں پاسے نـہ گْوستگ کہ مـن شمے جـیڑھانی بارو ءَ نہ جـیڑتگ ءُ چـوشـیں رندے نہ بوتگ کہ من شمے جیڑھانی بابتءَ مزن واجہ ءَ را نہ گُشتگ ،انشاء اللہ دیم ءِ شمبے ءَ شمے وانگجاہ ءِ ماسٹر کیت، دیم ءَ ماہ ءَ شمے سڑک ءِ کار ھم بندات بیت، آپ تھنا شمے جیڑہ نہ انت بلکیں اے دْراھیں مُلک ءِ جیڑہ انت بلے انشاء اللہ من وڑے کناں، ھنچوش کہ شما من ءَ اے رندی ئیں گچینکاری ءَ دل ءَ مہ بر اِت، کسم پہ ھدا من شمے بزگی ءَ گندگ ءَ آں کہ من ءَ واب نئیت، گوں ھمـے گپـاں واجـہ بھـرام پاد اتک ءُ میتـگ ءِ چُکـاناں دہ دہ کلدار ئِے دات ءُ کمـاشـاناں یک یک چادر ئِے دات ،دو اکـس ئِے کش اِت ئِے ءُ وتی (Hilux) ءَ سوار بوت ءُ وتی ماڑی ءِ نیمگءَ روان بوت۔

واجـہ بھـرام ءِ روگ ءَ گوں ھمـل اوں رس اِت ءُ چہ کماش شمبے ءَ جُست ئِے کت” اے بھـرام ات”؟
کماش شمبے ءَ پسّہ دات” ھو منی چک واجہ بھرام ات بلے تو چتو زانت”؟
ھمل ءَ پسّہ دات” من پمیشکا زانت کہ ھردیں کہ گچینکاری نزیک بنت گڑا واجہ بھرام میتگ ءَ درائی کنت ، چوناھا وَ اسلام آباد ءَ انت،بلے اے رندی ھبردار کسے ءَ گچین کاری ءَ بہ روت، اے مرد ھر رند ءَ کیت دروگ بندیت ءُشـمارا یک یک چادرے ءُ گونڈواں دہ دہ کلدار دنت ءُ شما ھمے گپ ءَ وش بہ اِت ءُ وتی اووٹ ءَ اے پلینڈ ءَ دے اِت، یک مردمے شمارا ماسٹرے دات کت نہ کنت کہ گونڈو بوان اَنت ، شما انگت ھمیشی ءِ سر ءَ اوست بستگ؟
ھمے مرد ءِ وتی چک ماں اسلام آباد ءَ وانگ ءَ اَنت، انگت ءَ شما گل ات کہ واجہ مئے واجہ انت”۔
کماش شمبے ءَ جُست کت” اگاں ما واجہ بھرام ءَ گچین مہ کن ایں گڑا کے ءَ را گچین بکن ایں”؟
نا شما کسے ءَ را گچین مکن اِت، نبا کن اِت کہ کسے گچینکاری ءِ روچ ءَ پہ گچین کاری ءَ لوگ ءَ در بئیت ، ھما مرد ءَ کہ شما پنچ سد اووٹ دے اِت آئی ءَ انگت پہ شما پنچ سد کلدار ءِ کار نہ کتگ”.
شر اِنت اے رندی ما کسے ءَ را گچین نہ کن ایں،درستیں مردماں یک توارے ءَ گوشت. “

گچینکاری ءِ روچ ءَ کسے چہ لوگ ءَ گچین کاری ءَ در نیاتک ءُ دومی روچ ءَ دو جار شنگ بوت کہ واجہ بھرام ءَ شش سد گچین ءَ چہ باج برتگ بلے دومی جار ءَ ھمے شنگ ات کہ ھمل ءِ جون ماں کور ءِ آ لمب ءَ کپتگ.


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔