زبان ءِ اَرزشت – مراد بلوچ

43

زبان ءِ اَرزشت 

 نبشتہ : مراد بلوچ

دی بلوچستان پوسٹ

ھرچ راجے ءِ واستا آئی ءِ زبان ءُ دود ءُ ربیدگ سک باز ارزشت دار انت،پرچا کہ اے جھان ءَ ھرچ راجے چہ آئی ءِ زبان ءُ دود ءُ ربیدگ ءَ زانگ ءُ پجارگ بیت۔ھمے پیمءَ پہ راجی پجار ءِ مھکم کنگ ءُ برجاہ دارگ ءِ ھاتر ءَ جھد ءُ جپا کشی ءُ کربانی دیگ المی انت۔ پرچا کہ اے نوکیں ءُ دیمروی کنوکیں دنیا سک ترندی ءَ گوں دیمروی کنگ ءَ انت ءُ ھمے رپتار ءُ رواج ءَ گوں گلامیں راجانی دود ءُ ربیدگ ءُ زبان پَشت کپان انت ءُ ما ھم ھمے گلامیں راجانی توک ءَ ھوار ایں۔

منی گُشگ ءِ مول ءُ مراد ھمیش انِت کہ ما بزاں کہ بلوچ ھم ھما گلامیں راجانی توک ءَ ھوار ایں کہ آئی ءِ دود ءُ ربیدگ ءُ زبان بزاں کہ راجی پجار لگتمال کنگ ءُ ھلاس کنگ بوگ ءَ انت۔ پرچا کہ دژمن زانت کہ اگاں بلوچی زبان نہ بیت گڑا بلوچ راج ھم نہ بیت۔

زبان بہ بیت یا کہ دود ءُ ربیدگ اشانی زندگ دارگ ءُ اشانی مھکم کنگ ءِ واستا مُچ راج ءَ کوشست کنگی انت بلے گیشتر ھما کہ زانتکار ءُ سرپدیں کَس انت چو کہ لبزانکار، شائر، گشندہ، ندکار ءُ وانگجاھانی استاد ایشاناں گیشتر جھد کنگ کپ ایت کہ وتی راج ءُ وتی مردماں سرپد بکن انت،بلے مئے بدبھتی ھمیش انت کہ مئے ھرچی سرپد ءُ زانتکار کہ بوتگ انت آیاناں دژمن ءَ وتی ارجان جتگ چیزے برتگ بیگواہ کتگ ءُ چیزے شھید کتگ ءُ ھرکس کہ پشت کپتگ آ چیزے بھا بوتگ ءُ چیزے چہ وتی ترس ءَ گار انت ءُ چیزے کوشست کنگ ءَ انت بلے آیانی دلبڈی دیوک ءُ مدت ءُ کمک کنوک نیست، اے گپ ھم راستے کہ ھر وھد ءَ یک زوراکے یک راجے وتی گلام کنگ لوٹ ایت گڑا درستاں چہ ساری آ راج ءِ دود ءُ ربیدگ ءُ زبان ءَ پچ گیپت ءُ وتی زبان ءُ دود ءُ ربیدگاں آیانی سر ءَ مُش ایت۔

ھمے پیم ءَ مئے ھال ھم ھمیش اِنت۔ مئے زھگاناں وانگجاھانی تہ ءَ اردو ءُ اربی وانینگ بیت۔اے وڑ ءَ مئے زھگ بلوچی نبشتہ کنگ ءُ دربرگ نہ زان انت ءُ مئے دود ءُ ربیدگ ھم بیگواہ کنگ بوگ ءَ انت،پد ءَ مئے راج ءِ نوجوان ھست انت کہ آ تھنا پہ بیست ءُ چار ساھت ءِ واستا بلوچ بنت ءُ گوش انت کہ ما چکیں بلوچانی (بزاں کہ 2مارچ)ءَ ۔ھمے روچءَ بیست ءُ دو وال شلوار پاد ءَ کن انت ءُ یک پاگے سر ءَ بند انت وھدے کہ اے روچ ھلاس بیت گڑا مئے آیانی بلوچیت ھم ھلاس بیت۔ ھمے روچءَ یک نیمگے دژمن مئے براساں بارت ءُ کُش ایت ءُ مئے ماسانی دلاں تراکین ایت مارا سُد ءِ پر نیست ۔بلے ھمے نوجوان یکے ھم بلوچی نبشتہ کنگ ءُ دربرگ نہ زانت ۔وھدے کہ مئے ادیب ءُ شائر جنگ ءُ بند کنگ بنت کہ پرچا شما بلوچی زبان ءِ واستا جھد کنگءَ اِت ، اے کتابجاہ سوچگ بنت پرچا کہ اودا بلوچی کتاب ھست انت، ھما وھد ءَ من ھمے نوجواناں یکے ھم نہ گند ئے کہ ھمے زلم ءُ زوراکی ءُ وتی شائر ءُ زانتکارانی ءُ زبان زانتانی پھازگ ءِ واستا دیم ءَ بوشت انت یکے ھم وتی راج ءِ درداں نہ مار ایت۔ اد ءَ چہ ھمے گِندگ ءَ کیت کہ دژمن وتی زوراں جَنَگ ءَ انت کہ من بلوچ ءِ نام ءُ نشان ءَ گار بکن آں ءُ بلوچ ءِ پجار ءَ ولگوج بکن آں۔

بلے دشمن انگت سرجم سوبمند نہ بوتگ ،پرچا کہ مئے وش بھتی ھمیش انت کہ مئے راج ءِ توک ءَ شھید سبا دشتیاری ءُ سید زھور شاہ ھاشمی ءُ دگہ بازیں شاھزانت ءُ ادیب ءُ زبان دوست ھست انت کہ پہ بلوچی زبان ءُ دود ءُ ربیدگ ءِ واستا کربانی اِش داتگ ءُ انگت جھد ءُ کوشست کنگ ءَ انت۔
من راج ءِ ورنا، نودربر، ادیب، شائر، ندکار ءُ آ دگہ زانتکار ءُ راجدوستاں ءُ زبان دوستاں گوں دزبندی کن آں کہ بلوچی در بہ بر انت ءُ نبشتہ بکن انت وتی راج ءِ زانتکار ءُ زبان دوستاں دلبڈی بدے انت ءُ آیانی کمک ءُ ھمکوپگ بہ بنت ءُ راجءَ سرپدی بدے اَنت کہ وتی زبان ءُ دود ءُ ربیدگ ءَ گار بیگواہ کنگ ءَ بہ رکین ایت، پرچا یک راجے ءِ زندگ ءُ مھکم دارگ ءِ واستا اے چیز المی انت۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔