نِمدی یے پہ ترا – جاوید شوھاز

74

نِمدی یے پہ ترا

نبشتہ کار: جاوید شوھاز

دی بلوچستان پوسٹ

سلام ءُ دْروت منی ھمبل وش ءُ سلامت بات ئے
من وش ءُ سلامت آں، تو بلکیں منی اکساں منی پیسبُک ءَ آئی ڈی ءَ چہ گِندگ ءَ ئے یا کہ تو پیسبُک مرچاں کارمرز کنگ ءَ نہ ئے ءُ منی پیسبُک آئی ڈی ءَ تو سنگت (پرینڈ) نہ ئے یا منی اکساں گِندگ نہ ئے.

ھما تئی کوْھنیں پیسبُک آئی ڈی من چار ءُ ٹپاس اِت بلے بند اِنت من نہ زان آں دگہ نوکیں آئی ڈی ترا چیریں نامانی سر ءَ ھست یا نیست.
من باز رند ءَ جیڑ اِتگ کہ پہ ترا نمدی یے نبشتہ ءَ بہ کن آں،بلے منی دست ءَ نہ بوتگ یکے وَ پمیشکا نہ بوتگ کہ من نِمدی نبشتہ کنگ ءِ وڑ ءُ ڈول نہ زانتگ ءُ دومی من ھمے نہ زانتگ کہ من کجا چہ نمدی ءَ بنگیج بہ کن ءُ پہ ترا دیم ئِے بہ دے آں منی ھمبل.
من زان آں منی جتا بوگ ءَ چہ رند تو پہ من نہ جیڑ اِتگ، اگاں جیڑ اِتگ گڑا تئی منتوار آں، بلے پرچا کہ من مدام راستیں ءُ ھکیں گپ جتگ پمیشکا ترا منی گپ دوست نہ بوتگ اَنت. من پمیشکا گْوشت کہ تو پہ من نہ جیڑ اِتگ،
منی نمدی ءِ سر نام پہ ترا اِنت بگند ئے تو سرپد مہ بہ ئے کہ من اے نمدی پہ کَے ءَ نبشتہ کُتگ بلے ترا اگاں تھمبُل بہ بیت ءُ منی اے نمدی ءَ بہ وان ئے گڑا تو سرپد بہ ئے کہ اے نمدی پہ من نبشتہ کنگ بوتگ.

منی ھمبل ترا یات کنت کہ من اسٹیٹس ایر کُرت ءُ ترا منی اسٹیٹس دوست نہ بوت اَنت ءُ ترا منی ھما اسٹیٹس یات کنت من نبشتہ کُرت اَت کہ،

“اد ءَ زانت ءُ زانگ ءِ گپ نیست
اد ءَ شِپانک ءُ شوانگ ءِ گپ نیست”

اے اسٹیٹس ءِ سر ءَ تو من ءَ کلوھے ھم دات من ءَ یات اِنت کہ تو چے نبشتہ کُرتگ ات، اد ءَ من نہ گْوش آن ئِے دیم ءَ زندگ بوت آں الم دومی نمدی ءَ گون بیت ءُ ترا منی دگہ اسٹیٹسے یات کنت کہ من اسٹیٹس ایر کُرتگ اَت کہ،

“برابری وَ سک دوریں گپے بلے اد ءَ انساپ زاھِر نہ بیت”

ھمے اسٹیٹس ءِ سر ءَ ترا یات بیت کہ تو من ءَ گُشت کہ سنگت تئی اسٹیٹس شر نہ اَنت بلوچ ئیں مردمے ئے وتی اسٹیٹساں شر کن،
من زانت کہ راستی تھل اِنت ءُ راستی ءِ ایر برگ گْران اِنت.

ھَیر یات باز اَنت بلے اد ءَ ھمینچُک بس اِنت،
منی اے کسانُکیں نمدی ھاس پہ ترا اِنت ءُ منی دوا اِنت سلامت بات ئے گم ءُ سکّی مگندات ئے منی ھمبل۔

تئی کَستر .. جاوید شوھاز.. بیست ءُ یک بھاران ..دو ھزار ءُ بیست امارات ۔۔۔۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔