بے سوبیں پندل – زاھد ھسین دشتی

41

بے سوبیں پندل

نبشتہ کار: زاھد ھسین دشتی

دی بلوچستان پوسٹ

بنی آدم دائم جنزان اِنت کہ من دیم ءَ بُرو آں ءُ زند ءِ ھمک پڑ ءَ من اُوں ھوار بہ باں چے ءَ کہ اد ءَ کس چہ دومی کم نہ اِنت ،مئے وھد ءُ باریگ ءَ بلوچ زالبول وانگ ءُ زانگ ءِ نیمگ ءَ چہ باز کم بوتگ انت انچو کہ آرت ءِ تہ ءَ واد ءِ بروبر ءَ ، بلے مروچی زند ءِ ھمک پڑ ءَ زالبول گوں انت ،وانگ ءُ زانگ ءَ باز لائک انت ءُ دیم ءَ شتگ انت ،مروچی ڈاکٹر، انجینئر ،اکنامکس، ءُ ایندگہ پڑ ءَ بہ چار ات مئے زالبول ھوار انت بزاں آ چہ کس ءَ کم نہ انت ھمک جاہ ءَ آ وتی لائکی ءَ پیش دارگ انت،بلوچ زالبولانی سر ءَ آیانی لوگ ءِ مردماں سک باز پھر بند انت آ دور ءُ دریں جاھاں وانگ ءُ زانگ ءَ انت ،بلے لس مردم نہ سگّ ایت کہ بلوچ زالبول چو بہ وان انت دیم ءَ در بیا انت ۔

کمیں وھدے بیت کہ بلوچستان( یونیورسٹی ) مزنشھدربرجاہ ءَ انچیں پندلے سازگ بوت کہ ھود ءِ جاہ منندیں ھاس کن بلوچ زالبول وتی وانگ ءُ زانگ ءَ یلہ بہ کن انت ءُ وتی گساں بُرو انت بلے آیانی لوگ ءِ مردماں آیانی سک باز پھر ات آیانی سر ءَ بھیسہ داشتگ آ وانگ ءَ چہ در آیگ ءَ نیشتگ اِش،ایشی ءِ مزنیں چست ءُ ایر بوت انگت ءَ گیشیں پٹ ءُ پول برجاہ انت ۔ انگت ءَ ایشی ءِ بنکی آسر دیم ءَ نیاتکگ ۔

“چو کہ من میرو ءَ لُڑ ءَ گنداں بالگتر بورانی چراگ جاہ انت”

اے ھبر ھلاس نہ بوت بازیں مردم ءَ دل ھم لاپ ءَ نہ ات ، بلے اناگت ءَ چاگردی رسانکدار(سوشل میڈیا ) ءِ سر ءَ دگہ یک بدیں ھالے شنگ بوت کہ کس بلوچی تامُراں کار مہ کنت ،یک بلوچی ازمکارے ءَ پہ کمو وھد بلوچ چاگردے تہ ءَ پہ وت مزنیں نامے کش اتگ ات ۔آ ھم ھوش ء وت نہ ات ، بلے آئی ءَ وتی تامر ( ویڈیو) ءِ بیانے شنگ کتگ ات بلوچ گوں بلوچ ءَ را ایر جیگ ءِ جھدے کتگ ات ،بلے اے رندی ھم آ بے سوب بوت اَنت ۔ بلوچی تامر ءِ ازمکار سوب مند بوت اَنت۔ آ بس ھمے یکیں زالاکو وت گار ءُ بیگواہ بوت پد ءَ چاگرد ءِ تہ ءَ ایشی آ نام نہ بوت ،ھمے بزان یک زندگیں مردمے پد ءَ مُرت ءُ انگت اے گپ نہ گیش اتگ ات کہ انوں پد ءَ یک بدیں ھالے شنگ ءُ تالاں انت کہ ڈیرہ بگٹی ءَ (گرلز کالج) زلبولانی شھدربرجاہ ءِ (ھاسٹل) نندجاہ ءَ کیمرہ جنگ بوتگ ، بزاں کہ اے پندل سازوک انچیں پندل سازگ ءَ انت ما کجا نہ کجا بلوچ زالبولیں نودربراں چہ وانگ ءَ دور بہ کن ایں۔ ھمک ھنداں ایشانی پندل بے سوب بنت ،زانگ بہ بیت بلوچ وتی ھون ءَ بکش اِیت بلے وتی ازت ءِ جست ءَ کجام ھم وھد ءَ کنت ۔ بلوچ ءَ وانگ ءِ پڑ ءَ دور ءِ ھاتر ءَ ھمک روچ نوک نوکیں پندل سازگ بیت ۔

انو کجام مزنیں شاھدربر جاھے ءَ کسے بروت آئی ءَ الم بلوچ زالبول وانگ ءُ زانگ ءَ گندگ بوگ ءَ انت آ چہ وتی گس ءَ باز گستا انت بلے پہ ایمانداری ءَ وتی وانگ اِش برجاہ داشتگ، بلوچ ءِ زھگ ءَ سد آپریں انت کہ آ ترس ءُ بیم ءَ سر گوْزتگ پہ وانگ ءَ دست مان کتگ، بلے لس مردم نوں بلوچ ءِ وانگ جاہ ءِ دیم ءَ چوں دیوال مِکّ انت ،بلے انشاءاللہ اے بے سوب بہ اَنت۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔