چیدگ – غمخوار حیات | ھلیل بلوچ

43

آزمانک
چیدگ
(چہ براہوئی ادب ءَ)

آزمانکار: غمخوار حیات | رجانک: ھلیل بلوچ

دوشی آزمان سُھر اَت۔۔۔ انچو سُھر۔۔۔ چوکہ آس ءِ نْیام۔۔۔ چوکہ گواڑگ۔۔۔ چوکہ گلاب۔۔۔ چوکہ بانورے ءِ اولی شپ ءِ گُد۔۔۔ انچو سُھر چوکہ آس ءِ تہا مان کنگ ءَ پد آسن۔۔۔ چوکہ زگریں ھون۔۔۔ چوکہ بامردے ءِ جگر۔۔۔ چوکہ دَستانی ھِنّی۔۔۔ چوکہ سندور ءِ ٹِکّ۔۔۔

من پہ سرگنوکی ھمے سُھریں رژنائی ءِ راز ءِ شوھاز ءَ درکپت آں۔ چہ کوٹی ءِ کوھاں آدیم بوت آں۔ گَوری ءِ جل ءُ شیپانی تہا ھمے رژنائی گیش بوھان اَت۔ راہ ءَ بازیں چیلّ ءُ چُرّ، تلار ءُ شیپ اَتک۔
من کمو وتی سرا ھیال کُت گڑا سما کَپت من پاد شپاد آں کہ منی پاد چہ کُنٹگاں پُرّ آبلہ بوتگ اِت اَنت۔ تُنّ منا ھوشام ءَ جنگ ءَ اَت بلے رژنائی منا وتی نیمگ ءَ چِکّگ ءَ اَت۔ منا ھمّت دیگ ءَ اَت۔ ھمے رژنائی ءِ گِندگ ءِ منی واھشت گیش بوھان اَت۔ من تچگ بندات کُت۔ شپ ءِ نیم ءَ من دیست من دَشت یے ءَ سر بوتگ آں۔ نزّیک ءَ ھِچ وڑیں ھَلک نیست۔ تھنا لھتیں سِنگ ءُ بوچ اَنت۔ ھمے سِنگانی تہا چہ یک سِنگے ءَ ھمے رژنائی شِنگ بوھگ ءَ اِنت۔ من نزّیک شُت آں ھما سِنگ ھورتی ءَ چار اِت گُڑا ھما سِنگ ءِ سرا کسّے ءِ ھون تْرینز گپتگ اِت اَنت۔ ءُ چہ ھمیشی رُژنائی تالان بوھگ ءَ اَت۔ اے رژنائی منی چمّانی تہا شُت۔ منی چمّ تہار بوت اَنت۔ منی سر ڈمبرگ ءَ اَت۔ منی گم ءُ گرٹّی بوھان اِت اَنت۔

ھمے وھد ءَ پیر مردے ءَ منا توار جَت، من ھمانگو چارِت گُڑا دیست یک زئیپ اُمرے۔۔۔ آئی ءِ ریش، بروت، مُود ءُ گُداں چہ ھمے زاھر بوھگ ءَ اَت کہ دیر اِنت وتارا ساپ ءُ سینگار نہ کُرتگ ئِے۔ تُپنگ ءُ کَلّی یے کوپگ ءَ اِت اَنت۔ بلے ھِچ وڑا تکانسُر نہ اَت۔ منی دست ئِے گِپت اَنت ءُ گْوشت ئِے: “منی چُک! ھیر اِنت؟ اینکس پریشانی ءِ سَوَب؟”

من گْوشت: “اے رُژنائی ءَ گِندگ ءَ ئے؟” گْوشت ئِے “ھو”
من گْوشت: “اے رُژنائی ءِ راز ءَ شوھاز ءَ دراَتکگ آں کہ اے چہ کُجا شِنگ بوھگ ءَ اِنت ءُ ایشی سَوَب چے اِنت؟ ایشی چمّگ کُجا اِنت؟ گُڑا من جنان پْروشاں اے سِنگ ءَ سر بوت آں۔۔۔ وھدے کہ من اے سِنگ ءِ سرا تْرینز گِپتگیں ھون دیست اَنت تہ من گیشتر اجکّہ ءُ ھیران بوت آں۔ اے چونیں ھون اَنت کہ چریشاں رُژنائی یے شِنگ بوھگ ءَ اِنت؟”

پیر مرد ءَ بچکندان ءَ گْوشت: “ھَو اے ھیرانی ءِ گَپ یے وَ اَست کہ چونائی ءَ مئے چاگرد ءَ ھمُک روچ بازیں مردُمانی ھون رِچ اَنت بَلے آھانی ھوناں چہ ھِچ وڑیں رُژنائی یے شِنگ نہ بیت۔”
آئی ءَ چہ وتی کَلّیگ ءَ منا آپ دات ءُ گْوشت: “اَبّلی! اے آ وڑیں لس مردُمے ءِ ھون نہ اَنت کہ بے مکسد ءَ رِچ اَنت، اے ھون یک بلائیں مَکسدے ءِ ھاترا رِتکگ اَنت۔” آئی ءَ آسردے کشّ اِت ءُ گْوشت: “اے ھون ھما نرمزار ءُ شھزادگیں ورنائیگ اَنت کہ آئرا اے اِمروز ءَ یک چیزے ءِ کمّی نہ اَت، آئی ءَ ھر چیز بہ لوٹ اِتیں آئرا لوگ ءِ تہا رَس اِت، آ بودناکیں وَرنایے اَت، آئرا زمین ءُ میراس اَست اَت، بلے آئی ءَ وتی دْرستیں چیز ماڑی، گاڑی، زرّ، ورنائی، نوابی، شھزادگی دْرست یلا دات اَنت اے سرڈگار ءُ اے راج ءِ وش ھالی ءِ ھاترا ھمے کوہ گیاباں سر گِپت۔ نرم ءُ نازُرکیں بوپ ءُ بالشت ئِے یلا دات اَنت ھمے سِنگ ئِے سرجاہ کُت اَنت۔۔۔ گوں ما ھَوار۔۔۔ وھدے ھُشکیں نان ءِ وَرَگ۔۔۔ وھدے تُنّ ءُ شُد ءَ سپر ئِے کُت۔۔۔ آئرا ھمے جاگہہ ءَ دژمن ءَ شہید کُت۔ اے سِنگ ھمائی چیدگ اِنت۔ اے رُژنائی ءِ شینک ءُ بْرانزانی رندگیری ءَ بکن تئی در پہ دری ھلاس بیت۔ آئی ءِ گُشتن یے کہ

“پہ سرانی نْدر کنگ راج ھلاس نہ بنت، دژمن ءِ دیم ءَ سرانی جھل کنگ ءَ ھلاس بنت۔”

تو ھرچ وڑیں کُربانی ءِ دیگ ءَ تیار بئے۔۔۔ اے چیدگ ءِ رُژنائی ترا زانت ءُ سرپدی دَنت، ترا چہ تہاری ءَ کشّ ایت ءُ رُژنائیں سُہب یے ءِ واجہ جوڑ کَنت، ھما سُہب کہ آئی ءِ تہا تو ءُ تئی راج سوبین بیت، ھما سُہب کہ آئی ءِ ھاترا اے وَرنا ءَ وتی زِند ءِ ھر مُراد زھگ، مات، پِت، بْرات، گُہار، سْیاد دْرست یلا دات اَنت۔ آ زِندگ اِنت ھمے رُژنائی ءِ تہا شوھاز ئِے کَن۔۔۔ آ نہ مِریت۔۔۔ ما دْرست مَرگ ءِ آماچ بہ ایں۔”

آئی ءِ توار تْرند بوھان اَت۔ آئی ءَ گْوشت: “ما ھما وھد ءَ آئی ءِ وڑ ءَ زِندگ بوت کنیں کہ ما بہ ماریں کہ ما آسودگ ءُ آسرات نہ ایں، مئے زِند مئے نہ اِنت، مئے زمین پہ ما پَشت نہ کَپتگ، ما ھما وڑ ءَ زندگ بُوت کنیں کہ ھمے رُژنائی ءَ دیم ءَ بران کنیں، وتا ھمے وڑ ءَ یک مَکسدے ءِ ھاترا نْدر بہ کنیں گُڑا ما زِندگ بوت کنیں، مئے پُشپد۔۔۔ مئے راج ایمنی گِندیت، اے شھزادگیں ورنا ءِ دِل ءِ مُراد سرجم بنت، آئی ءِ ارواہ آسودگ بیت۔”
من پہ لرزگی جُست کُت: “اے ھَند ءُ دَمگ ءِ نام؟”

آئی ءَ پسّو دات: “اے چیدگ ءِ نام سرلَٹھ اِنت۔”

—–

دلگوش: اے آزمانک براہوئی لبزانک ءِ نامداریں آزمانکار واجہ غمخوار حیات ءِ آزمانکی دپتر “چیدہ” ءَ چہ گچین کنگ ءُ رجانک کنگ بوتگ۔ اے آزمانک ءِ رجانک کنگ ءِ مول ءُ مُراد براہوئی لبزانک ءُ ساچشت ءَ توامیں بلوچانی گْور ءَ سر کنگ اِنت۔ داں کہ بلوچانی زُبان بلوچی ءُ براہوئی گوں وت ھمگْرنچی ءَ دیمروئی بکن اَنت – رجانکار


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔