تہاری دوست بوگا اِنت – بالاچ قادر

46

تہاری دوست بوگا اِنت

بالاچ قادر

دی بلوچستان پوسٹ

مہروان۔۔۔۔۔۔ سلامت بات ئے۔

سُہبی ما نوکی وابءَ چہ پاد اتکگ اتاں کہ ہاسٹلءَ مئے کوٹیءِ لیٹ سُتک۔۔۔۔۔سُچگ ازابے،آتوری لیٹے بہ بیت یاکہ مردمے ھردُکانی سُچگءِ درد یک وڑ اِنت۔ھُدا زانت کہ منا سک باز درد بوت، پمے ھاترا کہ منا سُچگءِ مارشت ھست اِنت۔

مروچی شہدربرجاہ رشءُ کش اَت، جنکیں نودربر ھما پیشی دابءَ سبزگءِ بینچانی سرا نشتگ ات اَنت، نہ گشئے ادا لہتے روچ ساری بلاہیں جُنزے چست بوتگ اَت، اسکینڈلے دیما اتکگ ۔۔۔۔۔۔ نودربرگلءِ ورناہانی شلواراں والےءُ نیم گیش کپتگ اَت۔۔۔۔ اے شورءُ شار، نعرہءُ زہرشانی ،زندہ باد مردہ باد دراہ سرپتءُ کپت اَنت بلئے منی اندر انگت روک اِنت۔

مہروان۔۔۔۔ باز برءَ من ترا گُشتگ کہ اے زاھری دُنیاء چستءُ ایربرزءُ جہل بنت بلئے انسانء ِ اندرءِ آس مُدام روک اِنت ءُ اے آس مردمءَ ہستانکیءُ نیستیءِ دمکاں چکرینیت۔۔۔۔۔۔ گڑا بائدگیں مردم چہ ڈنءِ زہرشانیءَ گیش وتی اندرءَ زہرشانی بکنت،دانکہ اے آس مہ مریت۔۔۔۔۔۔ اندرءِ آس کہ ترھیت گُڑا مردمءِ سنچءُ سما ھوں ایرموش بنت۔

سُہبی ڈاکٹر مبارکءَ گوں دُچار کپتاں۔۔۔۔ جوانیں انسانے، مُدام بگندے چیزےء ِ باروءَ جیڑگا اِنت،ھرورچ نوکیں سرھالےءِ سرا مجلس کنت۔ ڈاکٹر مبارک نفسیات ڈیپارٹمنٹءَ پروفیسرے، شاہزانتیءِ علمءَ ھوں بلد اِنت۔۔۔۔۔۔۔ گپ گپءِ تہءَ منا گُشی تو سک لاگر بوان ئے ، سُہبءَ سروپ بور۔

من زانت ڈاکٹر اَندرءِ دُنیاءَ پہمگءَ نہ اِنت۔اگاں ناں آئیءَ را بائدگیں سما بہ بیت کہ انسان سربُرءَ ھمنچو رپک بہ سازیت بلئے دانکہ تہءِ موسم آدروہ اِنت ، اے رپگءُ ھُنر ھُشکین اَنت۔۔۔۔۔۔ڈاکٹرءَ چاکلیٹےمنا داتءُ شُت۔

انوں کوٹیءَ اتکگاں، لیٹ سہبی سُتکگ،روچءِ برانز ھوں دریگاں چہ سر نہ کش اَنت کہ ڈنءَ جمبر اِنت۔اے موسمءَ من کہ ڈنءَ باں سک بے وڑ باں۔۔۔ منا مئے ھنکینءِ ھما کبر یاد کاینت کہ ڈگارانی آبروءِ دپءَ کوہن کپتگ اَنت، ھردیں ھور بیت کس نروت اے کبراں تگردے پر نہ دنت ءُ ناں کہ میتگءِ مردُماں سما است کبر اں ھور میسینت۔۔۔۔۔۔۔۔۔ھورءَ رند ھرکس کوڈالے زوریتءُ کبراں لگت کنانءَ آپینکءَ روت۔ اے کبر باریں کئیگ اَنت، نوں کوہن اَنت، ھورءِ سرا اَنت، مردمانی پاد روءَ اَنت، بزگ اَنت۔۔۔۔۔ ما کہ کسان بوتگیں ھورءَ پد ھمے کبرستانءَ شُتگءُ کسانیں بندُک بستگءُ آپءِ راہ رو تّرینتگ بلئے نوں اودءَ چُشیں مردمے نیست۔۔۔۔

مہروان۔۔۔۔۔ ۔۔ شالءَ ھمک یک شمبے کہ تو لوٹ اِتگ کہ ما گندءُ نندے بکنیں گڑا کانسی کبرستانءَ عطا شادءِ ادیرہءَ شُتگیں اگاں نیوکاہانءِ کبرستانءَ شُتگءُ کبرانی سرونءِ کپتگیں سنگ مک کتگ اَنت۔۔۔۔۔ ھمے ھبرءَ  تو برے برے گلگ ھوں کتگ کہ کبرستان مُردگانی جاگہ اِنت، تو مارا ادا کارئےءُ گنوغ کنائین ئے۔ من ترا باز رندءَ سرپد کنگءِ جُہد کُتگ کہ کبرستان بازارے، ادءَ اگاں لیٹ روک بکنئے، سنگاں تچک بکنے یا پُل بہ کش ئے تہ باز زیبا بیت۔۔۔۔۔

مہروان۔۔۔۔۔

دیرانت کہ تئی کلوہءُ احوالے نئیت۔۔۔۔ برے یات ھوں باز کائے، اگاں دروگ مہ بنداں مروچاں شپاں واب نئیت ھمشیءِ سوبءَ ھمک روچ کلاسءَ دیراں سرباں۔ھمے دیراں سر بوگ منا باز ھجالت کنت،کلاسءِ تہءَ دل نہ گشیت کہ بہ ننداں ءُ لیکچر گوشبداراں۔

باز براں جیڑاں مئے نیامءَ ھمے دینءُ دنیا چہ کُجا اتکءُ میلانک بوت اَنت؟

تئی روگا چہ رند ھنچو سما بیت کہ ھچ چیز منی نہ اِنت، کُلیں شے منی راہءِ دیما دیوالےءِ دابءَ میلانک اَنت۔۔۔۔انوں کوٹیءَ آس روک اِنت، من نشتگءُ نویسگایاں۔۔۔۔۔ کوٹی تہار اِنتءُ اولی رند اِنت کہ منا تہاری دوست بوگا اِنت، دل گُشی رُژنائیءِ چہرگے ھوں دیما مئیت۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔