کسہ نا سرجم اِنت | سنگت آہوگ گُل ئے یات ءَ – حکیم واڈیلہ

396

کسہ نا سرجم اِنت
سنگت آہوگ گُل ئے یات ءَ۔

حکیم واڈیلہ

دی بلوچستان پوسٹ

من زیک ھم چوں ھمروچگیں وڑءَ نیم روچ ءَچہ واب ءَ پاد اتکاں ءُ دست پہ لیپ ٹاپ ءَ شہار دات اَنت کہ پرندوشی سنگتی ءَ “استادانی میان اُستمانی روچ” ئے درگتءَ انپیج ءَنبشتانک ئے دیم داتگ اَت ءُ انپیج موبائل ءَ کارمرز نہ بیت۔ ھیر من انچو کہ لیپ ٹاپ پچ کُت ءُ ایمیل چارت ءُ چاران فائل بروبر اِنت لوٹ اِت پہ سنگتاں فارورڈ کنانی دانکہ نبشتانک شنگ کنگ بہ بیت۔ سنگتءَ میسج کنگ ئے ھاترہ واٹسیپ لیپ ٹاپ ءِ سرا کنیکٹ کُت داں چاراں سئے چار گروپانی تہءَ یکیں گپ ءُ ھال شنگ اِنت ۔

ھال کہ یک پدردیں ھال ئی اَت، گپ کہ باوری گپ ئے نہ اَت۔ آہوگ گُل ءَ وت کُشی کُتگ اے ھال ءَ گُشے جگر بُن دات اَنت۔ من آہوگ گُل ھچ بر نہ دیستگ ءُ اے راستی ھم زانتگ کہ مئے جاور مارا بوت کنت کدی گندگ ءَ ھم مئیل اَنت داں مئے مُلک آجوہ مہ بیت۔ بلے من آہوگ ونتگ، آہوگ گوشداشتگ، آہوگ ئے دربرگ ئے کوشست کُتگ۔ من آہوگ نزانتگ کہ کج ئے مردم اِنت ءُ کئی سیاد ءُ وارث اِنت ۔

آہوگ چہ ھما لہتیں مردماں یک ئے بوتگ کہ آئی ءَ کسی نام ءُ پجاروکی ئے ضلورت نہ بیتگ۔ من وھدیں زیک اے گپ ءَ سرپد بوت اَنت کہ آہوگ نہ تہنا یک جوانیں شاعر ءُ راجی جہدکار اِنت بلکیں آہوگ شھید گلام مھمد ئے کہول ئے مردم اِنت تہ من سک ھیران بوت اَنت (پرچہ کہ من آہوگ باز رندا ھال اھوال بوتگیں بلے کدی ھم چُشیں گپ ئے من سرپد نہ بوتگاں)۔ آہوگ ئے پجار آئی ئے نام آئی ئے کار آئی ئے جہد آئی ئے راجدپتری کارست ئے جوڑ بوگ درست وتی جہد ءُ لائقی ئے وجہ ءَ بوتگ۔ نوروز شھید گلام مھمد ئے گہارزتک الم بوتگ ءُ اے پگر ھم الم چہ ھمودہ گون بوتگی بلے آہوگ وت یک کارست ئے بوتگ ۔

آہوگ ئے شاعری آہوگ ئے ھیال آہوگ ئے گپ آہوگ ئے سوج یک انچیں راہ ئے پیش دارنت کہ آ راہ مدام تہاری ءَ گوں جنگ کنگ ءُ رژنائی ءَ امباز کنگ ئے راہ اِنت ۔

من مدام کہ آہوگ ءَ جیڑیتگ گُڑا یک رژناہ پکریں ورناہیں شاعر ءُ سرمچار ئے دیما اتکگ کہ آئی ئے ھمک شعر ءُ ھمک گال پہ وتن ندر اَنت ءُ آئی ءَ مدام پہ وتن توپنگ بڈا اِنت۔

بلئے آہوگ تئو زان ئے تئی روگ ءَ ادا چنچو جُست ودی کُتگ ھمک مردم چہ وتی نیمگ ءَ کسہ ساچگ ءَ اِنت۔ تئو ھما مردماں چہ یکے کہ آیاں وتی مرگ ئے سرا سیاست نہ لوٹ اِتگ بلے تئی مرگ ئے سرا ھم سیاست بوگءَ اِنت۔ کسے گُشگ ءَ اِنت تئو وت ءَ وت جتگ یکے گُشیت آہوگ جنگ بوتگ۔ کسے گُشگ ءَ اِنت تئی دوزاہیں گل تئی کُشگ ءَ اوار اَنت یکی ءَ گُشت دز ءُ ڈنگانی کار اِنت۔

آہوگ پل من زانان تئو انی ھم وتی پیسبوک پروفائل عکس ئے وڑا اے درستیں گپانی سرا وتی دیم دومی نیمگءَ ترینتگ ءُ نشتگ ءُ نوکیں دگنیائے ندارگاں چارگءَ ئے پرچہ کہ تئی مرگ ئےسرجمیں کسہ ءَ بس ھما تیر سرپد اِنت کہ چہ توپنگ ءَ آس گپتگ ءُ تئی سرا پترتگ۔ ابید چہ آ توپنگ ءُ آئی ءَ آس گپتگیں تیر ءَ مئے کلانی ھاترہ کسہ ناسرجم اِنت۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔