ناڈائن گوردلیمر – منور آکاش |عتیق آسکوہ بلوچ

58

نوبل انعام دوئی کروک ادیبہ

ناڈائن گوردلیمر

منور آکاش |عتیق آسکوہ بلوچ

دی بلوچستان پوسٹ

نوبل انعام دوئی کروک ادیبہ ناڈائن گوردلیمر 20 نومبر 1923ء آ ساؤتھ افریقہ نا شار جوہانسبرگ نا علاقہ سپرنگز ئٹی ودی مس، ہراڑے خیسن نا کان آک ئسرـ او روزگار نا رِد اٹ گھڑی ساز اس ئس و اونا لمہ اسہ نظریاتی انگریز زالبول اس ئس ہرا خڑک ئنا سیاہ فام علاقہ اٹ مخلوق ءِ باہوٹ تننگ نا ہند اس ٹہیفیسوس. ناڈائن گوردلیمر نا ودشت اسہ سیکولر اُرا سیٹی مس، بنائی تعلیم خانقاہی اسکول آن دوئی کرے وڈ واٹرز رینڈ With watersrand یونیورسٹی اٹ داخلہ ہلک. اونا نوشتوک کسّہ غاک 15 سال نا عمر آن شینک مننگ بناء کریر. اسہ نوشتوک ئسے نا دروشم اٹ او تینا کسہ face to face نا سوب آن مونا بس و اونا اولیکو ناول The Lying Days نوزدہ سد و پنجا و سہہ اٹ مونا بس.

گوردلیمر نا پن زوت جہانی بڑزی تیا سر مس. اونا اخلاقی جیرت و آزات آ سوچ ءِ راست و چَپ دو ئنا تپہ نا پارہ غان نغد کاری نا گواچی کننگا. ساؤتھ افریقہ ٹی نسلی بابت سخت آ نغد کاری پالیسی تا سوب آن اونا بھاز آ ناول آتیا پابندی خلنگا. اندا نیامٹ اونا جتا آ ادبی اسلوب و لَس آ بدغی نا پٹ و پول و لس سیاہ فام، سفید فام، ایشیائی کڑدار آتا سوب آن بھاز آ چپیکو دُو نا نقاد آتے اونا انقلابی سیاست دوست بتو. اوکان گڈ A Guest of Honour 1970 ، Burger’s daughter 1990 ، A Sport of Nature 1987 ، My Son’s Story 1990 ، The House Gun 1998 ، 1974 ئٹ The Conservationlist آ اودے بُکر ٹیکی تننگا و 1991ء اٹ ادب نا نوبیل ٹیکی رسینگا۔ ناڈائن گوردلیمر افسانہ، ناول، نغد کاری، ڈرامہ و مضمون آتیان بیدس بھاز آ کتاب آتے رِد و بند تس. زیات وخت جوہانسبرگ اٹ گدریفے و انداڑے 13 جولائی 2014 اٹ کذیت کرے.

ناڈائن گوردلیمر نا درزن آن زیات کتاب شنک مسونو و انداخس افسانہ غاتا کتاب، ولے افسانہ اونا تخیل آتیٹ جاہ ئس ہندی مروک ئس. تینا اولیکو ناول ءِ ایسر کننگان گڈ او اِرا افسانہ غاتا کتاب شنک کریفے و تینا ناول آتیا پوسکنا کسہ غاتا کتاب ءِ گچین سرپد مس.

ناڈائن گوردلیمر نا ادبی دوست تخوکا بندغ آتیٹ ارنسٹ ہیمنگوے، ہنری جیمز و ڈی ایچ لارنس ئسر. دا مُسٹ آ بندغاک اندن ءُ ہرافتا ہڑتوما صنف افسانہ و ناول اٹ اسہ کچ ئنا کاریم ءِ. ناڈائن گوردلیمر نا کسہ غاتا روتہ غاک چاگڑد و نفسیاتی گواچنی تا درشانی نا دود ئتون ترندی اٹ تفوکو ولے او دا دود ئٹ ساؤتھ افریقہ نا بھاز آ ربیدگ آتا دود آتے اوار کریسہ مونا درے. او گشادہ ءُ تلہ ئسے آ سیاسی و چاگڑدی ہڷ و تس آتے نفسیاتی وڑٹ سرحال جوڑ کرے. او اسہ ٹِک ئسے نا درشانی ءِ کیک و دوارہ اندانا کُوک ءِ برز ءُ بالاد ئسے نا وڑٹ تخلیق کیک. اندا سوب آن ناڈائن گوردلیمر نا خوانوکاک دا خرینا راستکی ءِ چارہ.


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔