نصیر آباد/ڈیرہ مراد جمالی: فائرنگ کے واقعات میں خاتون سمیت 2 افراد قتل

56

نصیر آباد میں غیرت کے نام پر خاتون کو قتل کرنے کے بعد ملزم فرار

دی بلوچستان پوسٹ نیوز ڈیسک کو موصول ہونے والی اطلاعات کے مطابق بلوچستان کے علاقے نصیرآباد اور ڈیرہ مراد جمالی میں فائرنگ کے واقعات کے میں خاتون سمیت دو افراد قتل اور ایک شخص زخمی ہوا ہے۔

تفصیلات کے مطابق نصیرآباد کی تحصیل تمبو میں پولیس تھانہ خان کوٹ کی حدود گوٹھ عرض محمد میں غیرت کے نام پرچچا نے فائرنگ کرکے اپنی بھتیجی نسیمہ بی بی کو قتل کردیا جبکہ اس کا مبینہ آشنا محمد مراد شدید زخمی ہوگیا ، فائرنگ کے بعد ملزم فرار ہونے میں کامیاب ہوگیا۔

اطلاع ملنے پر خان کوٹ پولیس جائے وقوعہ پہ پہنچ گئی لاش اور زخمی کو ڈیرہ مراد جمالی ہسپتال پہنچا دیا جہاں ضروری کاروائی کے بعد لاش کو ورثا کے حوالے کرکے پولیس نے مزید کاروائی شروع کردی ہے۔

  یاد رہے ضلع نصیر آباد میں غیرت کے نام متعدد افراد قتل کیے جاچکے ہیں جن میں اکثریت خواتین کی ہے جبکہ ان واقعات میں ملوث افراد کے خلاف انتظامیہ کی جانب سے خاطر خواہ کاروائی عمل میں نہیں لائی جاسکی ہے۔

دریں اثنا سٹی پولیس کے مطابق ڈیرہ مرادجمالی کے سولنگی محلہ میں پرانی دشمنی کی بناء پر مسلح افراد نے فائرنگ کرکے نوجوان جان محمد سولنگی کو قتل کردیا اور فرار ہوگئے۔

 اطلاع ملنے پر سٹی پولیس جائے وقوعہ پر پہنچ گئی اور لاش کو تحویل میں لیکر سیول ہسپتال پہنچادیا جہاں ضروری کاروائی کے بعد لاش ورثہ کے حوالے کرکے مزید کاروائی شروع کردی ہے۔