ملا اسمائیل لبزانکی گل ماھینی دیوان

37

ملا اسمائیل لبزانکی گل ماھینی دیوان

دی بلوچستان پوسٹ

8 جون 2019 ملا اسمائیل لبزانکی گل پل آباد ءِ ماھینی دیوان ماں گل ءِ وٹساپی کڈک ءَ برجم دارگ بوت۔ دیوان ءِ دو بھر ات انت۔1۔گل ءِآؤکیں کارانی بابت ءَ باوست ءُ تران 2۔ لچہ وانی۔

اولی بھرءِ پاگواجہ واجہ شاکر مراد ات۔
اولی بھرءَ گل ءِ آؤکیں کارانی بابت ءَ باوست ءُ تران بوت کہ اشی ءِ تہ ءَ ایم کے میرزا، ھارون ارمان، انام رزا ءُ شاکر مراد ءَ تران کنان ءَ گل ءِ دیم ءِ کارانی بابت ءَ وتی وتی شورءُ سلاہ دات انت۔

وھدءِ کمی ءِ سْوب ءَ دیوان ءِ دومی بھر مھتل دارگ ءُ دومی شپ ءَ برجاہ دارگ ءِ پیسلہ کنگ بوت۔

دومی شپ 9 جون ءَ دیوان ءِ دومی بھر لچہ وانی کارمستر شاہ مراد شاہ ءِ پاگواجھی ءَ برجم دارگ بوت، لچہ کاراں ازیز پدا ایم کے مرزا، زپر مساپر، ھارون ارمان، انام رزا، شاکر مرد اوتی لچہ ونت انت ءُ چہ دیوان ءَ داد گپت۔

گڑسرءَ دیوان ءِ پاگواجہ شاہ مراد شاہ ءَ ساڑی ایں باسکانی منت گپت ءُ گْوشت کہ امیت کنیں کہ شما ھر وھد ءَ گل ءِ ماھینی دیواناں وت ءَ ساڑی کن ات۔ پہ زبان ءُ لبزانک ءِ دیمروئی ءَ گل ءِ دیواناں بھر زیرگ ءُ گوں گل ءَ ایماندار ءُ دلپھک بوگ المی انت۔ چہ درستیں باسکاں امیت داریں کہ ھمے پیم ءَ یک مشت ءُ تپاکی ءَ گل ءِ کاراں دیم ءَ بر انت۔

جارچین ءَ دیوان ءِ آسری ءِ جار پرینت، جارچینی ءِ ڈبہ جمیل مھراب ءِ کوپگان ات۔