لُمہ نا مودہ! – نوشت: زرین بلوچ

37

لُمہ نا مودہ!

نوشت: زرین بلوچ

دی بلوچستان پوسٹ

اوو لمہ زاکر مار اس الو شادس ئس
لمہ نی شادس گوانُس،
لمہ نا مون پِسّی نا پِت ٹی
لُمہ نہ تینا لال ءِ گوانُس
لمہ نی زاکر جان گوانُس

خڑینکیا خن تیتو دا لُمہ تینا مار ءِ نازیفیکہ، ای پو متوٹ دا لُمہ مودہ کرنگ ئس ہمو مار کن کہ دئے سال ء ہرا نا ہچ ڈس اف یا دا لمہ نازیفسہ لولی پاریکہ ہمو مارکن کہ داسکان اونا زندہ مرنگ نا اودے اُمید ئس۔

بلوچستان نا ہر لُمہ نا اُست ٹُکر ءِ، ہر اسٹ ءِ خن جنگ نا خاخر ٹی ہُشنگانے، کوئٹہ ٹی 2018 ٹی ہرا وخت سیما نا توار نا رندٹ بھلو ریلی اس کشار تو اوڑے اسے نیاڑی اس لٹ بند مریسہ کھلان پد ٹی ئس، دوٹی تہ ہلکٹ ہریفیٹ لُمہ نی دیرُس انتئے بسونُس؟ نی تو برنگ کروفیس ریلی تون؟ تو او پائے ای سمیع نا بد نصیب آ لُمہ اُٹ کنے نو سال ء سمیع نا درد کھسفتو و داسا پیدل برنگ کھسفو ءِ؟ نو سال ءِ ای تُغ خنتنُٹ، مُچا نن تولیوہ سمیع کن دُعا کیوہ ولے دُعاک ہم لگیپسہ، اینو اگہ خُدا کنا اسے دُعا اس ہم بنگکہ گُڑا دا ملک نا اسے ٹکر اس ہم بچیتوکہ داخس لمہ نا بد دعا دانا رندٹ ارے۔ ہندُن امتیاز نا لُمہ اوغسہ پاریکہ کہ کننگ کن پیسہ اف ننتو ولے امتیاز کن عئید کن پُچ ہلکُٹ کہ نوائے مار کنا برے۔ غفار نا لُمہ نا ہرا وخت سکرات ئس توار کرے “کنا ایمان کن دُعا کپیرے کنا جاگہ غا غفار کن دُعا کیرے”۔ مہر گُل مری نا لُمہ آخری ساہ اسکان مار نا تینا کسر ٹی خن تے سخت کریسس ولے مار بتو۔۔۔۔۔۔

انت پاؤ امر پاؤ؟ بلوچستان ٹی ہر لمہ نا اُست ٹھپی ءِ ہر لُمہ مودہ اٹ خڑینک شولِک ولے بلوچستان نا ہر مار وطن ءِ تینا لُمہ پائک، بلوچستان نا ہر مار تینا پیدا کروکا لمہ ءِ خڑینک شولنگ کن ہلیسہ لُمہ وطن نا آجوئی کن مُخ تفوک سلوک مریک۔ ہندا مار تیان اسٹ اس زاکر مجید ءِ.
زاکر مجید 2009 ٹی 8 جون نا دے دشمن نا دوٹی تما، اغواء مس، دا ورنا او وخت آ بی ایس او آزاد نا وائس چیئرمین ئس۔ بی ایس او آزاد نا ہمو وخت نا سنگت آتیان ارا وخت ای زاکر مجید نا باروٹ ہرفیت تو او پاریر انت کہ بی ایس او ءِ زاکر مجید ہمود ئس۔ اینو بی ایس او اخس نُم زندہ خنیرے زاکر مجید نا کڑدار ہمود ئس۔ لمہ وطن نا مابت، قوم دوستی نا جوزہ، علم و عمل نا دوستی۔۔۔۔ زاکر مجید اسے توار اس ئس ہرادے اینو ہر بلوچ بنِک، زاکر اسے کتاب اس ئس ہرادے اینو ہر بلوچ خوانک، زاکر مجید قوم پرستی ئس، زاکر مجید علم دوستی ئس، زاکر فرزانہ نا ایلم ئس، زاکر بابر نا ایلم ئس، زاکر زاہد نا سنگت ئس، زاکر کمبر نا سنگت ئس، زاکر فکر نا خواجہ ئس، زاکر دشمن کن ہکّل ئس و زاکر بی ایس او آزاد ئس۔۔۔

اینو زاکر نن کِن نُم کِن و تیوہ غاتیکن زندہ ءِ ولے اگہ زاکر ہنانے تینا لُمہ آن ہنانے، زاکر ءِ نن تیوہ غاک خوانہ ولے اودے پٹیرہ تو اونا لُمہ نا خنک پٹیرہ، زاکر آن پد کس اس سلیسونے تو اونا لُمہ سلیسونے، خیرات مرین دا لُمہ غا تیکن کہ اینو دا مودہ توریرہ، اینو دا خڑینک شولیرہ

مودہ اس جوڑ مس لمہ نا لولی
خن تیان خڑینکاک دتر نا بولی
ہر دم ہشکتا اُست نا خاخر
ٹھپی او ٹکر جغر نا بند اس
خڑینک اٹ اسٹ مس لمہ نا پلو
مودہ اس جوڑ مس لمہ نا لولی

اسے دے ٹک ترو آزادی نا دے، اوکان پد کس ہوغوف، کس تینا چھُنا تہ پٹوف، آزاتی ننا منزل ءِ ننا غم تا ایسری ءِ، نہ ننا زاکر آک گوئنگور نہ لُمہ غاک مودہ کرور نہ فرزانہ غاک اوفتے کن پند خلور، ہندا خاتران اینو آجوئی نا رندٹ نن نُم کھل روان اُن، روان مرون ۔


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔