شھید اسد بلوچ ئے درونتے پہ بلوچ راج ءَ – سیف بلوچ

102

شھید اسد بلوچ ئے درونتے پہ بلوچ راجءَ

سیف بلوچ

دی بلوچستان پوسٹ

آئی ئے تہا ( ھما چاگرد ءُ مردمانی تہا) ھما بد امنی، بد نظمی، بے ڈسپلنیں چیز بنت، اودءَ راھ ءُ رھبند نہ بیت، پرچا کہ اودءَ گلامیں راج بیت اودءَ رھبند ئے پرک ءُ درک ھچ نبیت۔ ھما سوچ گلام بیت، آئی تہا بد امنی بیت، ھون ھرابی بیت، دُزی بیت، زنا خوری بیت۔ وڈ وڈیں چاگردی جیڑہ اَست اَنت کہ ھما گلامیں چاگرد تہا ھر وھدءَ گندگءَ کاینت ۔

مروچی ما یک جھدءِ کنگائیں، انکلابی رنگءَ دیما روگائیں، ھمے چاگرد کہ اے اِلّت ءُ اے ھرابیاں دوچار انت، ما اے چیزانی پاک کنگ ئے ھاترہ یک resistance ءِ یک انکلاب ءِ دیما برگائیں کہ اے ھرابیں چاگردءَ بدل کنگ ءُ ساپ ء پلگاریں چاگردءِ جوڈ کنگ ھاترہ جھد کنگائیں۔ اگاں آ سیاسی پِڑ ببیت یا سلاھ بندیں پِڑ ببیت کہ ھما گلامی کہ مئے گُٹءَ لوپ انت، آ گلامیءَ چے وتءَ رکینگ ءُ وتی راجءَ یک ساپ ءُ پلگاریں چاگرد ءِ دئیگ۔ مروچی اے جھد تہا ما سیاسی ءُ سلاہ بندیں پِڑءَ روچ بہ روچ وتی گاماں دیما برانیں ءُ وتی منزلءَ نزیک کنانیں۔

اِدءَ مئے ءُ شمے کردار چے بیت؟ اگاں یک نوجوان ءِ بیت آئی کردار اِدءَ ھمیش بیت کہ آئی ءِ بنیادی سوچ کہ جوڈ بیت آ یک ھنچیں رنگءَ جوڈ بہ بیت کہ آ زانتکاری ءَ چہ چکار بہ بیت، آ ھمک چیزءَ پوہ بہ بیت- آ وتی چاگرد سرءَ ھمینچو پٹ ءُ پول بکنت ءُ بزانت کہ پدل اے چیز منی چاگرد تہا اَست اَنت ءُ زاھر بوئگ ءَ اَنت ءُ ایشاں من کجام رنگءَ دور بکناں؟ اول اے زمہ واری آئی سرءَ بیت کہ آ وتی چاگرد ءَ پلگار کنگ ھاترہ گوں وتی راجءَ نزیکی ئے جھدءَ بکنت ءُ سیاسی رنگءَ سرپدی مھم ئے بنداتءَ بکنت ءُ چاگردی ناشرکاریاں ساپ ءُ پلگار کنگ ئے جھدءَ بکنت۔ نوجوان ئے دومی کردار اے بہ بیت کہ اے انکلاب کہ جنزان اِنت، گلامی ئیگ انت کہ زالمیں ریاست پاکستان مئے ڈیھءَ پہ تاکت زورءَ نشتگ، اول ایش انت کہ ما وتی راجءَ چتور آئی ءَ چے رکینیں ءُ گلامیءَ چے سِندیں ءُ آجوئی رنگءَ دیما بریں؟ گڈءَ آئی ءِ پروش دئیگ ءِ ھاترہ مارا آئی مکابلہءَ یک تاکت ءِ جوڑ بوئگی ایں- آئی سیاست کہ مئے گلام دارگ ھاترہ کارمرز بوئگائیں گڈءَ اِدءَ منی ءُ تئی سیاست ھم آئی ئے سیاست دیما ٹکراؤ ئے رنگءَ بہ بیت۔ مارءَ وتی سیاسی دود ءُ ربیدگ جوڈ کنگی انت ءُ وتی راجءَ زانت دئیگ ئی اِنت، سرپدی دئیگ ئی اِنت، اے منی ءُ تئی نوجوانانی زمہ واری انت۔
ھما زوراکی کہ مئے سرءَ بوئگائیں پوجی رنگءَ آئی دارگ ھاترہ مارا ھما کچءَ یک تاکتءِ جوڈ بوئگی ایں کہ آئی زوراکیاں کاؤنٹر کت بکنیں۔
بلوچ نوجوانانی مستریں زمہ واری ایش انت کہ آ بلوچ جُنز تہا بَھر بزور اَنت ءُ وتی چاگرد ئے ناشرکاریاں ھلاس کنگ ئے جھدءَ بکن اَنت۔ اے دُز ءُ ڈنگانی دیما چو کوہءَ مِک بہ بنت۔

مستریں چیز اے نہ اِنت کہ من ءُ تو آئیءَ توپک ئے زورءَ داریں۔ مستریں تاکت سیاست انت، مستریں تاکت ایش انت کہ وتی راج ئے تَبءَ پوہ بہ بئیں ءُ گوں وتی راجءَ نزیکی بکنیں ءُ اے زوراکیانی بابتءَ راجءَ را سرپدی بہ دی ایں- گڈا اے ناشرکاراں گچین کنیں ءُ راج ئے دیما کاریں، پدءَ گوں راجءَ اے جُستءَ کنیں ” اے مئے چاگرد ئے ناشرکاریں مردم اَنت ءُ ما وتی انکلابی جھدءَ دیما برگائیں اے مئے راھ سرءَ ایریں کنٹگ اَنت، ایشانی گوما کجام رنگءَ پیش بیائیں؟” گڈا بلوچ راج وت پیسلہ کنت کہ ایشانی گوما چے رنگءَ پیش آئیگی انت۔

مروچی منی تئی زمہ واری ایش بیت کہ وتی راجی جنزءَ چینچو مھکم بکناں؟ ھما اول روچءَ کہ منی تئی جھد ئے بنیاد ایر کنگ بوتگ گڈا آ جدید سائنسی ءُ سیاسی بنیادءَ منا ءُ ترا وتی جھد دیما برگی ایں۔
اَنچو کہ پیسرءَ بلوچ ئے تاریکءَ بچار ئے کہ ما سلاہ بندیں رنگءَ وتی جنزءَ دیما برتگ ءُ پدا سردکاری آماچ بوتگیں، ھاموش بوتگیں۔آ وھدءَ سیاسی ءُ سائنسی طریقہ نبوئگ ئے وجہ چے من تو وتارءَ دیما بُرت کت نہ کتگ۔

مروچی مئے نوجوانانی زمہ واری ھمیش بیت کہ گیش ءَ چہ گیش سائنسی ءُ سیاسی رنگءَ وتی جھدءَ دیمءَ بہ برنت۔ من تو وتی پگرءَ سیاسی پگر جوڈ بکنیں ءُ وتی ھکمت عملیءَ سائنسی جوڈ بکنیں۔ دشمن ئے چال کہ منی تئی سرءَ بوئگائیں، آوانی مکابلہءَ مارءَ پیسرءَ تیار بوئگی انت۔ اے وڈیں چیلنجز کاینت ایشانی دیمپانی کنگ ھاترہ مارءَ سیاسی ءُ سائنسی رنگءَ اوشتگی انت۔
وتی جنزءَ ساپ ءُ پلگار کنگ ئے گیش جھدءَ بکنیں کہ گلیں راج ئے چم منءَ ترءَ سَک اَنت، بلوچ راج ئے باندات منی ءُ تئی کوپگ ءَ اِنت- گلیں راج ھمے لوٹءَ کنت کہ اے جھد مئے رژنائیں باندات ھاترہ بوئگءَ اِنت- آ یک آجوئیں چاگرد ءِ وابءَ گندگ ءَ اَنت کہ اودءَ منی تئی راھ ءُ رھبند بنت، اودءَ منی تئی بالادستی بیت ءُ اودءَ برابری ئے نظام جوڈ بیت۔ اے نظامءَ کہ من تو آرگ ئے جھدءَ کنگائیں، ایشی تہا منی تئی ھر پیسلہ کہ بنت پہ بلوچ راجءَ آ منصفانہ ءُ برابری ءِ رنگءَ بہ بنت۔ ھما راجی گداراں کہ تو سزا دیئے گڈا تئی توکءَ ھمینچو اخلاقی جرات بہ بیت کہ تو آئی پُشپداں ھمینچو متمئن کت بکن ئے کہ اے آئی کتگیں کار ئے سزا آئی را دئیگ بوتگ- چونائیءَ جھدانی تہا اے المی اَنت- مروچی آ کہ جَنَگ بوئگءَ اَنت گڈا آ چہ منی تئی چاگردءَ چے جَنَگ بوئگءَ اَنت، منی تئی چاگردءَ سلکاری کنگءَ اَنت۔ اے نہ اِنت تو آ سلکاراں اَنا ءِ رنگءَ بزور ئے، زِد ئے رَنگ ءَ بزور ئے، وگرنہ اے منی تئی آؤوکیں وھدءَ تباھی جوڈ بنت۔

گیشتر ھمے جھدءَ بکنیں کہ راجی مپاد…. راجی مپاد چی اِنت؟ مروچی ما جھد ئے کنگائیں آئی تہا بلوچ ئے مڈی، ننگ ءُ ناموس، بلوچ ئے گیرت… ھمے چیزانی ھیالداری بکنیں۔ نوجوان اگاں اے چیزانی ھیالداریءَ کنت ءُ جھد کنت گڈا بلوچ راج جوانیں رنگءَ منی تئی پُشتءَ کئیت اِنت۔
مروچی نوجوان جوانیں رنگءَ جُنز تہا بَھر زورگءَ اَنت۔ مروچی بلوچ راج ئے یک جوانیں contribution ءِ جوانیں ھمگرنچیءِ گوں بلوچ راجی جُنزءَ بوئگائیں۔
زی ھمک ردیءِ کہ بوتگ آ مئے نا تجربہ کاری وجہءَ چے بوتگ اَنت۔ مروچی ھما ردیاں چے سبق دربرگی اِنت ءُ آؤکیں وھداں پدءَ ھما ردیاں مکنیں کہ من تو وتی راج ئے باندات ایں۔
مروچی مئے جھد یک ھما اسٹیجءَ اتکگ سر بوتگ کہ دگنیاءِ تہا topic ءِ جوڈ بوتگ۔ دگنیاءِ ھما انٹیلیجنس ایجنسیز کہ است اَنت اودءَ مئے جنز زیر بھث بوئگءَ انت۔
اِدءَ اگاں ھما ملٹی نیشنل کمپنی پیداکاں سرمایہ کاری ھاترہ، آوانی سرمایہ کاری اوشت آماچ اِنت اے جھد ئے بدولتءَ، چائنا اینچو زر پروجیکٹ کنگائیں مروچی اگاں اوشت آماچ انت مستریں وجہ بلوچ راجی جُنزیں۔ اے جُنزءَ ھما نوجواناں کہ بَھر زُرتگ گڈا آوانی زمہ واری ھمے بیت کہ جُنزءَ ساپ ءُ پلگار دارگ ھاترءَ وتی راجی مپاد ءُ وتی راجی مڈیٹانی سک باز ھیال داریءَ بکن انت۔ وتی گِدانانی ھیال داریءَ بکن انت۔ آ ورنا کہ گوں من ءُ گوں تو گون اَنت ھماھانی پکر اے کچءَ جوڈ کنگی انت کہ باندءَ آ یک چاگردءِ تہا رؤت گڈا آ پرشتہ ءِ دابءَ دیما بیئیت۔ آ را بلوچ راج ھمے دابءَ سرپد بہ بیت کہ اے منی ننگ ءِ پاسدار انت، مروچی ایشیءَ اگاں توپک گون انت گڈءَ منی پھازوک انت۔

اے زور ءُ تاکت کہ منء ترءَ دئیگ بوتگ ھمے راج وجہءَ دئیگ بوتگ- اگاں ھمے تاکتءَ وتی راج سرءَ کارمرز بکنیں گڈءَ باندءَ کجام رنگءَ مئے راج گوں ما ھمراھداری کنت۔
منی تئی ءُ نوجوانانی زمہ واری ھمے بیت کہ وتی جنزءَ پلگار دارگ ئے جھدءَ بکنیں۔ اے چیزانی ھیال داری الم کنگی انت۔ اگاں ما اے ھیالداریءَ مکنیں گڈا باندہ ھما بے سوبیں جُنز کہ بوتگاں….. ( اَنچو کہ زپاری اومان ئے توکءَ یک بے سوبیں جُنزءِ رنگءَ دیما اَتکگ، انچو کہ ایندگہ جاھاں جُنز بندات بوتگاں پدءَ جنز وت ھلاس بوتگاں ءُ سردکاری ئے آماچ بوتگاں) گڈا من تو ھمے بے سوبیں جُنزءِ دابءَ دیما کائیں۔
جنزانی منظم کنگ ئے زمہ واری نوجوانانی دستءَ اِنت، جنزانی تہا گرمائش آرگ نوجوانانی دستءَ اِنت، جنزاں منزلءَ سر کنگ نوجوانانی دستءَ اِنت۔
اِدءَ نوجوانانی زمہ واری ھمیش بیت کہ ایشیءَ پلگار دارگ ئے جھدءَ بکن انت کہ اے منی تئی گڈی جنگ انت، ایشیءَ من تو الم داں منزلءَ سر بکنیں۔

اگاں اے چیزاں ما وتی تہا نیاریں ءُ جنز ئے بنیادی چیزاں لگتمال کنیں، آ تاکت کہ منء ترءَ راجءَ داتگ اگاں آ تاکتءَ من تو وتی راج سرءَ کارمرز کنیں گڈءَ مئے جنز ھم ھما بے سوبیں جنزانی رنگءَ بیت۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔