یوسف پرکانی نا خون – سراج لہڑی

60

یوسف پرکانی نا خون

نوشت: سراج لہڑی

دی بلوچستان پوسٹ
تعلیم دماغ نا بند آ ہمو دَرغ آتے ملک ہراڑان شعور نا روشنائی بریک، تعلیم نا سوب کہی صد سال مالو دا کوڑی آن ہنوکا بندغ آتا پنک اینو ہم زندہ اریر انتیکہ او شعور نا ہمو ہد آتے اسکان سرمریسہ تینا چاگڑد تون اوار تیوی جہان اکن اندنو کاریم کریر کہ ہرافتا سوب اینو ہم اوفتا پن یات مریک و اوفتیان کس انکار کننگ کپک۔تعلیم ءِ اسہ خاصو دروشم اسیٹی ایلوفتے اسکان سرکننگ نا وسیلہ تعلیمی ادارہ غاک مریرہ ہرافتا دروشم مالو نا وخت آتیٹ پین وڑ مسونے ولے اینو بیست و یکمیکوکرن ئٹی دابھلا ادارہ غاتا دروشم ئٹی ساڑی ءُ ہرافک جتا شعبہ آتا بابت اسہ ترتیب اسیتون تعلیم ءِ ایلوفتے اسکان سرکننگ نا پابند ءُ۔

کنا اسَل سرحال یوسف پرکانی ءِ ہرا منہ دے مُست اندا تعلیمی ادارہ غاتا غلط آ رویہ غاتا گواچی مس و ہمیش کن دا جہان ءِ یلہ کرے۔ یوسف پرکانی وت کشی کرے یا او بیماری نا سوب آن کذیت کرے داڑان بیدس دا حقیقت تینا جاگہ غا ساڑی ءِ کہ بلوچستان اٹ ساڑی تعلیمی ادارہ غاک، بولان میڈیکل کالج تون اوار تعلیمی نظام بدحالی تا گواچی ءِ ہرانا سوب آن خوانندہ غاک پریشانی اٹ وت کشی کیرہ یا ڈپریشن نا گواچی مریسہ مرک ئنا گواچی مریرہ۔

ہرا چاگڑد اٹ رشوت خوری، سفارش، طبقہ غاتاخواجہی ، بلیک میلنگ ، کاروباری سوچ تعلیمی نظام آ حاوی مریرہ اوڑے الّمی ہزار آ یوسف پرکانی کون آ ورناک مرک ئنا گواچی مرور۔دا مرک بیرہ ہمو ورنا(مار ، مسڑ ) نا مفک بلکن ہمو تیوہ غا خاہوت ، اونا لمہ باوہ ہم اندا مرک ئنا گواچی مریرہ ہرافک ہزار آ مراد ئتون ہمو ورنا نا خواننگ تون تفیسر کہ کنا چُنا، کنا ایلم ، ہیڑ خوانیسہ اسہ جوانو ہند ئسے آ سرمرو و کنا اُرانا ویل آتا ایسری تون چاگڑد ئٹ اسہ پِن اس ہم کٹو۔

ای دا پاننگٹ اسل رَد مفروٹ کہ یوسف پرکانی نا مرک نا ذمہ وار اندا تعلیمی نظام ءِ ہرا ٹی ہزار آ کمبوتیک اریر، اونا مرک ئنا زمہ وار اندا چاگرد ءِ کہ ہرا خواست آتا مَش ئس اونا مون ایس سلیفے ہرافتا سوب آن او ڈپریشن نا گواچی مس، اونا مرک نا ذمہ وار اندا حکومت ءِ ہرا گاڑی ددیفنگ و درخت خلنگ اٹ ءِ ولے تعلیمی نظام نا نزوری تے خنپک۔

دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔