چک اِیں بلوچانی
بلوچ قبیلہ سے لے کر قومی تشکیل تک، ایک مطالعاتی تبصرہ – دوسرا حصہ
تحریر: قاضی داد محمدریحان
بلوچ شناخت کی قدامت
بلوچ موجودہ نسلی آمیزش، مہاجرت در مہاجرت ، آبادکاریوں اور نئے قومی ڈھانچے میں ڈھلنے سے پہلے عظیم ایرانی قوم کا حصہ تھا ۔ بلوچوں کے بارے میں اس دعوے کو مکمل رد کیا گیا ہے کہ بلوچ عربی النسل قوم ہے البتہ جس طرح بلوچوں میں دیگر نسلوں کی آمیزش موجود ہے اسی طرح عرب گروہ بھی قلیل تعداد میں بلوچ قوم کاحصہ بن چکے ہوں گے لیکن جس طرح بلوچوں نے موجودہ مشرقی بلوچستان کے وسطی علاقوں میں مبینہ طور پر دراوڑی قبایل کو اپنے اندر ضم کیا ، سندھی قوم کے ساتھ ثقافتی اورنسلی رشتے قائم کیے، پنجاب کی طرف پیش قدمی کرتے ہوئے وہاں نوآدیاں قائم کی اور سرائیکی شناخت کا محرک بنے، ہندوستان سے ہنرپیشہ افراد جم غفیر کی صورت بلوچستان اور بلوچ قومی دھارے میں جوک در جوک شامل ہوئے ، غلامداری زمانے میں بڑی تعداد میں افریقی النسل افراد بلوچستان میں لائے گئے وہ بھی بعدازاں بلوچ قوم کا جز بن گئے، گجرات نے انسانی آبادی کا تبادلہ کیا ،یونانی ،منگول ، تاتاراور ترک نسلی آمیزش ہوئی اور افغانستان کے پشتونوں اور ہزارہ نے قربتیں قائم کیں ۔ مگر بلوچستان میں عربوں نے بلوچوں پر اس قدر گہرے ثقافتی اور لسانی اثرات قائم نہیں کیے اور نہ ہی بااثر گروہ کی صورت انہوں نے یہاں آبادکاری کی ۔اس کے برعکس عربستان کے طول و عرض میں بلوچوں نے موثر آبادکاریاں کیں جو آج بھی وہاں موجود ہیں، بلوچوں کی عربوں کے ساتھ جو بھی رشتہ داریاں قائم ہوئیں وہ بلوچ سرزمین سے باہر بلوچوں نے قائم کیے ۔
بلوچ قبیلہ سے لے کر قومی تشکیل تک، ایک مطالعاتی تبصرہ – پہلاحصہ
عظیم ایرانی قوم کا حصہ ہوکر بلوچوں نے ایرانی شہشاہیت کے سرحدوں کے تحفظ اور ان کو عالمی طاقت بنانے میں کلیدی کرداراداکیا۔بلوچ محض پیادے اور سپاہی نہیں تھے بلکہ کئی سلسلہ حکومتوں کے بارے میں دعوی کیا جاتا ہے کہ وہ اسی سلسلہ نسب سے تعلق رکھتے ہیں ۔اس بارے میں ’بابائے بلوچی رسم الخط سیدھاشمی ‘نے اپنی اردو کتاب’ بلوچی زبان و ادب کی تاریخ‘ میں مفصل ذکرکرتے ہوئے ھخامنشی باشاہوں کو ’بلوچ‘ قرار دیا ۔ اپنے بلوچی شاعری کی کتاب ’گسدگوار‘میں بھی وہ یہی لکھتے ہیں ۔
۱۔ باریگ ھمک راج ءَ جھانگیری ءِ دیستگ
باریگ تئی راج ءِ یلیں کوروش ءِ ڈاھار
۲۔ پہ گْواچنی ایران ءِ شاھنشاھی ءِ ’’بن لاد‘‘
بیست ءُ پنچ سدسال اِنت کہ ایر کرتگ مڑادار
۳۔ چہ مَلّیں مزن کوروش ءَ داریوش ءِ سیمی
سی سال ءُ دوسدسال تئی راج جھاندار
۴۔ بَھمان ئے میاریگ نہ بَہ ئے بھمنتگ جھانے
دلگوش بہ بہ ئے گوں من ءَ بھمانگ ءَ اَنگار
۵۔ کوروش منی ، کوروش تئی ، کوروش تئی راج ءِ
پہ المی ءُ دلجمی ، راجواجہ ءُ وانتکار
۶۔ البا ءِ بْدرنگانی مزار بیم ءُ مزار کود
ماژندران گیلان ءِ سر ءَ اوشتاتگیں بور سْوار
۷۔ اخامنش یا اھمنش یا شرمنش یک اَنت
ٹکے پہ بلوچ راج ءَ مزن منگہ ءُ نامدار
ترجمہ :
۱۔ ہر قوم نے دنیا پر حکمرانی کا زمانہ دیکھا ہے
تمہاری قوم کا زمانہ ، بہادر کوروش کا دشمن کے مقابل خبرداراور چوکس رہنا تھا
۲۔ ثابت شدہ ہے کہ وہ ایران میں شہنشاہیت کے بنیادگزار تھے
دوہزار پانچ سو سال ہوچکے ہیں ، اس قابل احترام (سلسلہ حکومت ) کی بنیاد رکھی گئی تھی
۳۔ جنگجو کوروش بزرگ سے لے کرداریوش سوم تک
دوسو تیس سال ، تمہاری قوم دنیا پر حکومت کرتی رہی
۴۔ اگر حیرت زدہ ہوئے تو کوئی بات نہیں ،ایک دنیا حیرت زدہ ہوچکی ہے
میری طرف متوجہ ہوں ،حیرت کو درکنار کرکے
۵۔ کورش میرا، کوروش تیرا، کوروش تمہاری قوم کا
یقین واثق کے ساتھ ، قوم کے رہنما اور صاحب علم
۶۔ ’البا‘کی چوٹیوں کے خوفناک اورطاقتورباگھ( مزار یعنی ٹائیگر)
مازندران گیلان پر ایستادہ گھڑسوار
۷۔’اخامنش‘ یا’اھمنش ‘یاشرمنش‘ ایک ہی ہے
بلوچ قوم سے ایک قبیلہ ، صاحب عزو جلال اور نامور(۴)
* حوالہ جات:*
۴۔ھاشمی ، سید ، گسدگوار ، ناشر: سیدھاشمی اکیڈمی ، اشاعت اول: مئی ۲۰۰۵،صفحات:۲۲۔ ۲۳
