نیمگین روگن ءُ چوٹیں لنکک – ھسا بجار

70

نیمگیں روگن ءُ چوٹیں لنکک

نبشتہ کار: ھسا بجار

دی بلوچستان پوسٹ

بلاه ءِ بیم ءَ بلاه ءِ لاپ – تُرس زوارکے – تُرس ءِ دیم ءَ ھر کس موم بیت ءُ پیٹ ایت – تُری چونیں تُرّم کانے بہ بیت – بزگ ءُ لگتمالانی وَ هبر نہ بیت – تُرسگ هراب نہ انت بلے گوں ایمانداری ءَ –
تُرس ءِ چیر دیگ هراب انت – پہ تُرس ءِ چیر دیگ ءَ مکر ءُ هُنر وَ چا ءُ گنتر –
بلوچ راجی جُنز ءِ تونگری ءَ چہ ما دو ھنر ءُ چالاکی گندگ ءَ ایں ماں بلوچستان ءَ یا بلوچاں گوں – یکے زوراک ءِ ءُ دومی نزورانی گور ءَ –
زوراک ءِ چالاکی یا هُنر پہ زوراک ءَ تاوان انت ءُ همے داب ءَ نزورانی هم پہ نزوریناں تاوان انت –
زوراک ءَ بلوچ ءِ جنگ ءِ دیم ءَ پروش وارتگ تچک ءَ جنگ ءِ پسو ءَ گوں جنگ ءَ دات نہ کنگ ءَ انت ،پمیشکا روبا ءُ پشی ءِ رپکاں کار گرگ ءُ ھر وڑیں ھُنر وتی پروش ءِ چیردیگ ءُ پہ وتی زورگیری ءَ دائم ءَ دارگ ءَ پہ ہھر وڑیں ھنر کنگ ءَ انت – آئی ءِ اے هُنراں چہ ڈلگ تریں هُنرے ، کورگ ءِ پالام کنگ انت – اے ھنر آشکاریں ھنرے ءُ پہ زوراک ءَ زیات نزور ءِ هک ءَ روگ ءَ انت – زِد ءُ کُنّت گیش ودی بوگ ءَ انت همائی ءِ جند ءِ بگیری ءَ روگ ءَ انت ،بلے آئی ءِ دومی ھُنر باز هترناکیں ھنرے ، همے ھُنر یک هدے ءَ همائی ءِ هک ءَ روگ ءَ انت آ ایش انت کہ وت ءَ مھروان پیشدارگ ءُ نزور ءِ دُزواه کنگ ءُ همائی ءِ تہ ءَ وت ءَ جاه دیگ انت – اد ءَ چہ الم پھک دلیں نزور رد وارت کنت ءُ آئی ءَ پہ وت ءَ یک ھیروایے سرپد بیت ءُ وت ءَ سر ءَ داں پاد ءَ پتایت ءُ همائی ءِ دست ءَ دنت – آ همے هیروائی ءِ جامگ ءِ آستینک ءَ مار رودیناں کنت ءُ مدان مدان ءَ وتی ڈنگ ءَ جنان کنت – کہ نزور ءَ هچ سما هم نہ بیت – آ همے ھنر ءَ گوں مدان مدان ءَ نزور ءَ چہ تہ ءَ وران کنت ءُ کواپگ کنت ءُ یلہ ئےِ دنت – پرائی ءَ ناں دود کلیت ءُ ناں راجی بودشت – ءُ ناں پہ آئی ءَ دائمی ایمنی یے – بس موچکیں دیان کنت ءُ گیش ءَ چہ گیش وتی دام ءِ چمگ ئےِ دور دیان کنت داں کِٹیت کِٹیت مریت بلے چہ دام ءِ چمگ ءَ بھ آجو بوت نہ کنت –
دومی نیمگ ءَ همے تُرس ءَ چہ رکهگ ءِ هاتر ءَ نزور هم ھُنر کنت – بلے آئی ءِ ھُنر دو سری تاوان انت پہ آئی ءَ ءُ پہ آئی ءِ راج ءَ – نزور ءِ تُرس ءِ چیر دیگ ءِ ھنر دوکار یکیں جاگہ ءَ کنت – یکے وت ءَ رد دیگ ءُ دومی وتی راج ءَ را گوں زوراک ءِ دیم پہ دیم بوگ ءَ بجینگ ءُ لس مهلوک ءَ ریپینگ – لس مهلوک ءِ پجی ءَ جهان ءَ هم اے کلو ءَ سر کنگ کہ ما برابر ایں ءُ ما گوں وتی واجہ وشھال ایں-
نزور ءِ رپکاں چہ مستریں رپکے مرگاه کنگ ءُ دروگیں شاتکامی کنگ انت – اے شاتکامی هما وهد ءُ پاساں کنگ بوگ ءَ بنت کہ همے نزور ءِ یک بهرے گوں زوراک ءَ وتی بسات ءَ دیم پہ دیم انت – اد ءَ بس همے کنگ بیت نزوراں بہ بکڑ کنگ بیت ءُ لس مهلوک بهر بانگ کنگ بیت – اے وَ راستے کہ جنگ ءَ مشکتی هلواه گوں نیست ءُ مینتگیں شیر ءُ شکر – چہ ھمد ءَ نزور رد وارت جنگولاں گوں دلپروش بیت ءُ همے اداروکی شاتکامی ءِ وت ءَ بهرے کنان بیت –
چُش کنگ ءَ نزور همے سرپد بیت کہ من ءَ چہ زوراک رزا انت ءُ من گوں همے ھنر ءُ رپکاں زوراک ءَ رد دیگ ءَ آں ءُ وتی راج ءِ هزمت ءَ آں – بلے اسل ءَ وت رد ورگ ءَ انت ءُ وتی پجی ءَ وتی راج ءَ هم ریپینگ ءَ انت –
زوراک آئی ءَ پمیشکا شے دیگ ءَ انت کہ اے مراگاه ءُ شاتکامیانی تہ ءَ بس گندگ وَ همے راج ءِ نپ ءَ چیزے بوگ ءَ انت – بلے اسل ءَ همائی ءَ پہ تُمکاری بوگ ءَ انت – اے مراگاه تُری کجام هم دروشم ءَ بہ بنت – آیانی تہ ءَ هچ چشیں چیزے پشت نہ کپیت کہ آیوکیں وهد ءَ پہ نزور ءَ چیزے پشت بہ کپیت –
اے مُچی ءُ مراگاه بس یک انچیں نیمونے انت – چو کہ زوراک ءِ وتی تُرس ءَ چیر دیگ ءُ رپکاں گوں کار کنگ انت ءُ نزور ءِ تُرس ءَ چہ رکهک ءِ نیمون ءَ همے رپکاں کارگ انت،ھر نیمگ ءَ تبائی پہ نزور ءَ انت ۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔