مئے شھدیں زبان – ھمیدہ بلوچ

64

مئے شھدیں زبان

نبشتہ کار: ھمیدہ بلوچ

دی بلوچستان پوسٹ

بلوچی زبان مئے وتی شھدیں زبان انت، زُبان مہ بیت راج نہ بیت، بے زُبان ءَ راج چو جون ءَ اِنت بزان بدن ھست ءُ ساہ ماں نیست، چوناھا ما شَر گوں ھُورتی ءَ بچار اِیں ھچ چُشیں راجے نیست آئی ءَ بے زُبان ءَ دیمروی کُتگ،اگاں کُتگ ئِے گُڑا اول وتی زُبان ءَ را زندگ کُتگ ئِے گُڑا دیمروی کُتگ ئِے.

مرچی مارا انچوش مجگی گلام اِش کُتگ کہ ما وتی زُبان ءَ گپ کنگ ءَ یا نبشتہ کنگ ءُ وانگ ءَ پہ وت کم شَرپّی یے سرپد بہ ایں،مارا انچوش رد داتگ اِش کہ ما اگاں کسے ءِ دست ءَ بلوچی وانگی یے بہ گند اِیں آرا پہ تژن گْوش اِیں” تو وتی زندگی برباد گوں بلوچی وانگیانی وانگ ءَ برباد کتگ ،تو باید اِنت انگریزی بُوان یا اردو بوان پہ وت شَریں زندگی یے جوڑ کن، بلے مارا اے سما نیست کہ زاتی زندگی، زندگی گْوشگ نہ بیت شَریں زندگی ھما اِنت کہ سرجمیں راج ءَ را گوں ھوری ءَ بہ بیت، شَریں زندگی ھما اِنت ترا وت ءَ زُبان ءُ وت واجھی بہ بیت، شَریں زندگی ھما اِنت تو وتی مال ءُ مڈیانی وت واجہ بہ بہ ئے ۔

زبان ءِ دیمروی کنگ ءِ واستا ھر پڑ ءَ جھد کنگی اِنت، مارا وتی زبان زندگ دارگی اِنت ،وھدے کہ زبان مئے دست ءَ شت گڑا مارا دنیا ءِ توک ءَ کدر ءُ بستار نہ بیت، وھدے کہ زبان گار ءُ بیگواہ بوت ما ءُ شما گار ءُ بیگواہ بہ ایں ـ

ما دنیا ءِ تہ ءَ آ دگہ راجاں بہ چار ایں ، دنیا ءِ تہ ءَ زندگ اَنت گڑا آوانی زبان زندگ اِنت ،آ وت ءَ را زندگیں راج گش اَنت ،انچوش ما چم شانگ بہ دے ایں، پاکستان ءِ تہ ءَ دری راجاں بہ چار اِیں ،پنچاپی ، سندی، آیاں وتی زبان مکتبانی توک ءَ دیم ءَ آؤرتگ اَنت ،بلے مئے بلوچی زبان پرچا وانگجاھاں وانینگ بوگ ءَ نہ اِنت؟

مئے نزوریانی وجہ انت ما وتی زبان پشت ءَ داشتگ ءُ چہ درستاں پشگپتگ ایں، راج ء بلوچ اِنت ھر پڑ ءَ پشت ءَ انت ، زبان ءِ زندگ دارگ ءِ واستا جھد کنگی اِنت ، بلے انگت باز کم انت ۔

درستیں نودربراں گوں دزبندی انت کہ ما ءُ شما درست یک مشت بہ بہ ایں ما پہ وتی زبان ءَ جھد بہ کن ایں ءُ وتی زبان ءُ راج ءَ زندگ بہ کن ایں ، زبان ءِ زندگ کنگ ءَ الم جھد ءَ بہ کن ایں ، بلوچی زبان مئے ءُ شمئے ایمان اِنت ، بلوچی زبان مئے ساہ انت، بلوچی زبان مئے آپ اِنت، انچش کہ انسان بے آپ ءُ ورگ ءَ زندگ بوت نہ کنت ءُ انسان ءَ آپ مہ رس ایت آ ساہ دنت مر ایت ھمے وڑ ءَ بلوچی زبان مئے ماتیں زبان اِنت ، اگاں ما زبان ءَ زندگ مہ دار ایں گڑا انچش ساہ دنت ءُ بیران بیت۔


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔